ପ୍ରଧାନମନ୍ତ୍ରୀଙ୍କ ‘ମନ୍ କି ବାତ’ର ୯୯ ତମ ଅଧ୍ୟାୟରେ ଅଙ୍ଗଦାନ ଉପରେ ଆଲୋଚନା, ଅଙ୍ଗଦାନକୁ ନେଇ ପ୍ରଧାନମନ୍ତ୍ରୀ ଦେଲେ ଏଭଳି ପରାମର୍ଶ
କନକ ବ୍ୟୁରୋ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପ୍ରାୟୋଜିତ ‘ମନ୍ କି ବାତ’ କାର୍ଯ୍ୟକ୍ରମର ୯୯ ତମ ଅଧ୍ୟାୟରେ ସେ ଆଜି ଦେଶବାସୀଙ୍କୁ ସମ୍ବୋଧିତ କରିଛନ୍ତି । ଏହା ମନ୍ କି ବାତ୍ କାର୍ଯ୍ୟକ୍ରମର ୯୯ ତମ ଅଧ୍ୟାୟ ହୋଇଥିବା ବେଳେ ଚଳିତ ବର୍ଷ ଏହା ତୃତୀୟ ଅଧ୍ୟାୟ ।
Kanak News is now on WhatsApp
Join and get latest news updates delivered to you via WhatsApp
ଦେଶବାସୀଙ୍କ ସହ ନିଜ ବିଚାର ସେୟାର କରିବା ବେଳେ ପ୍ରଧାନମନ୍ତ୍ରୀ କହିଛନ୍ତି କି, ଏବେ ମନ୍ କି ବାତ କାର୍ଯ୍ୟକ୍ରମର ୯୯ ତମ ଅଧ୍ୟାୟରେ ଆମେ ପହଂଚିସାରିଛୁ । ଏପ୍ରିଲ ୩୦ ତାରିଖରେ ଏହି କାର୍ଯ୍ୟକ୍ରମର ୧୦୦ତମ ଏପିସୋଡକୁ ନେଇ ଲୋକଙ୍କ ଭିତରେ ବହୁତ ଉତ୍ସାହ ରହିଛି । କହିରଖୁ କି ପ୍ରତି ମାସର ଶେଷ ରବିବାରରେ ଅଲ୍ ଇଣ୍ଡିଆ ରେଡିଓରେ ପ୍ରଧାନମନ୍ତ୍ରୀଙ୍କ ମନ୍ କି ବାତ କାର୍ଯ୍ୟକ୍ରମ ପ୍ରସାରଣ କରାଯାଉଛି ।
ମନ୍ କି ବାତର ୯୯ ତମ ଅଧ୍ୟାୟରେ ପ୍ରଧାନମନ୍ତ୍ରୀ ଅନ୍ୟର ସେବା ପାଇଁ ନିଜର ଜୀବନକୁ ସମର୍ପିତ କରୁଥିବା ଲୋକଙ୍କ ଉପରେ ଚର୍ଚ୍ଚା କରିଛନ୍ତି । ପ୍ରଧାନମନ୍ତ୍ରୀ କହିଥିଲେ କି ଅଙ୍ଗଦାନ ଆଜିର ଦିନରେ ଅନ୍ୟକୁ ଜୀବନଦାନ ଦେବାର ଏକ ବଡ ମାଧ୍ୟମ ପାଲଟିଛି । ମୃତ୍ୟୁ ପରେ ଜଣେ ଲୋକର ଶରୀର ଦାନ ଫଳରେ ୮ରୁ ୯ଜଣ ଲୋକଙ୍କର ଜୀବନ ବଞ୍ଚିପାରୁଛି । ଏହି କ୍ରମରେ ସେ ଅଙ୍ଗଦାନ କରିଥିବା କିଛି ପରିବାର ସହିତ ଲାଇଭ କଥା ହୋଇଥିଲେ ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି କି ଅଙ୍ଗଦାନକୁ ପ୍ରୋତ୍ସାହିତ କରିବାକୁ ପୁରା ଦେଶରେ ଏକ ନୂଆ ଯୋଜନା ଉପରେ କାମ ଚାଲିଛି । ଏହି କ୍ରମରେ ଅଙ୍ଗଦାନ କରୁଥିବା ବ୍ୟକ୍ତିଙ୍କ ପାଇଁ ସେହି ରାଜ୍ୟର ସ୍ଥାୟୀ ନିବାସୀ ହେବା ବାଧ୍ୟତାମୂଳକ ଆଇନକୁ ହଟାଇ ଦିଆଯିବାକୁ ନିଷ୍ପତ୍ତି ନିଆଯାଇଛି । ଏହାସହ ଅଙ୍ଗଦାନ ପାଇଁ ସର୍ବାଧିକ ବୟସ ସୀମା ୬୫ ବର୍ଷକୁ ମଧ୍ୟ ସମାପ୍ତ କରାଯାଇଛି । ଏବେ କୌଣସି ବୟସର ଲୋକ ଅଙ୍ଗଦାନ କରିପାରିବେ ବୋଲି ପ୍ରଧାନମନ୍ତ୍ରୀ କହିଛନ୍ତି ।