‘ଓଡ଼ିଶା-ମୋ ପରିବାର’ କାର୍ଯ୍ୟକ୍ରମ ଘୋଷଣା କଲେ ମୁଖ୍ୟମନ୍ତ୍ରୀ । ପରିବେଶ ସୁରକ୍ଷା, ରକ୍ତଦାନ ସେବା-କଲ୍ୟାଣ ଏବଂ ବିପନ୍ନ ଓଡ଼ିଆଙ୍କୁ ସହାୟତା ଏହି କାର୍ଯ୍ୟକ୍ରମର ମୂଳ ଲକ୍ଷ୍ୟ
କନକ ବ୍ୟୁରୋ: ଆରମ୍ଭ ହେଲା ବିଜେଡିର ‘ଓଡିଶା-ମୋ ପରିବାର’ କାର୍ଯ୍ୟକ୍ରମ । ଏହି କାର୍ଯ୍ୟକ୍ରମ ସଂପର୍କରେ ଆଜି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ତେବେ ‘ଓଡିଶା-ମୋ ପରିବାର’ରେ ମୁଖ୍ୟତଃ ୩ଟି ବିଷୟକୁ ଗୁରୁତ୍ୱ ଦିଆଯାଇଛି । ପରିବେଶ, ସ୍ୱାସ୍ଥ୍ୟ ସେବା କଲ୍ୟାଣ ଓ ବିପନ୍ନ ଓଡିଆଙ୍କୁ ସହାୟତା ଉପରେ ଗୁରୁତ୍ୱ ଦିଆଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ, ବିଜୁ ଜନତା ଦଳ ଓଡିଶାବାସୀଙ୍କ ଆର୍ଶୀବାଦରେ ଓଡିଶା ମା’ର ସେବା କରି ଚାଲିଛି । ସେବା ସଂଗ୍ରାମ ଓ ସ୍ୱାଭିମାନ ହେଉଛି ବିଜୁ ଜନତା ଦଳର ଆଦର୍ଶ ଆଉ ଓଡିଶାବାସୀଙ୍କ ଆର୍ଶୀବାଦ ହେଉଛି ବିଜେଡି ଶକ୍ତି । ତେବେ ସାଢେ ୪ କୋଟି ଓଡିଶାବାସୀ ହେଉଛନ୍ତି ମୋ ପରିବାର, ସେମାନଙ୍କ ମଙ୍ଗଳ ପାଇଁ ଦଳ ସବୁବେଳେ କାମ କରିଆସୁଛି ଆଉ ଏହି କାମକୁ ଆହୁରୀ ଆଗକୁ ନେବା ପାଇଁ ଓଡିଶା-ମୋ ପରିବାର କାର୍ଯ୍ୟକ୍ରମ ଆରମ୍ଭ ହୋଇଛି ବୋଲି କହିଛନ୍ତି ନବୀନ ।
ଓଡିଶା-ମୋ ପରିବାର କାର୍ଯ୍ୟକ୍ରମରେ ୩ ଟି ବିଷୟ ଉପରେ ଗୁରୁତ୍ୱ ଦିଆଯାଇଛି । ପରିବେଶ ସୁରକ୍ଷା – ଯେଉଁଥିରେ କି ବିଜେଡିର କର୍ମୀଭାଇ ଭଉଣୀମାନେ ବ୍ୟାପକ ବୃକ୍ଷ ରୋପଣ କାର୍ଯ୍ୟକ୍ରମ ହାତକୁ ନେବା ସହ ଏଦିଗରେ ଲୋକଙ୍କୁ ସଚେତନ କରାଇବେ । ରକ୍ତ ଦାନ ସେବା ଓ କଲ୍ୟାଣ- ଯାହାକି ଜୀବନ ବିନ୍ଦୁ ଭଳି କାର୍ଯ୍ୟକ୍ରମ । ତେବେ ଏହାର ଏକମାତ୍ର ଲକ୍ଷ୍ୟ ହେଲା ରକ୍ତଦାନକୁ ଏକ ସାମାଜିକ ଆନ୍ଦୋଳନରେ ପରିଣତ କରିବା । ସେହିପରି ବିପନ୍ନ ଓଡିଆଙ୍କୁ ସହାୟତାର ଉଦ୍ଦେଶ୍ୟ ହେଲା, ଦେଶ ବିଦେଶରେ କାମ କରୁଥିବା ଓଡିଶାବାସୀମାନେ ଅନେକ ସମୟରେ ଅସୁବିଧାର ସମ୍ମୁଖୀନ ହେଉଛନ୍ତି , ସେମାନଙ୍କର ବିପଦ ସମୟରେ ସେମାନଙ୍କ ସାଥିରେ ରହି ସେମାନଙ୍କୁ ଓ ତାଙ୍କ ପରିବାରକୁ ସହାୟତା ଯୋଗାଇବା ପାଇଁ ବିଜୁ ଜନତା ଦଳର କର୍ମାମାନେ କାମ କରିବେ ବୋଲି କହିବା ସହ ବିଜେଡିର ଏହି ପ୍ରୟାସ ରାଜ୍ୟବାସୀଙ୍କୁ ସେବା ଯୋଗାଇବାରେ ସଫଳ ହେବ ବୋଲି କହିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।