ପାଖାପାଖି ୭ ଦିନ ବିଳମ୍ବରେ ମୌସୁମୀ ଛୁଇଁଲା କେରଳ । ଆରବ ସାଗରରେ ‘ବିପର୍ଯ୍ୟୟ’ ଭୀଷଣ ସାମୁଦ୍ରିକ ଝଡ଼ର ରୂପ ନେଇ ଉତର ଦିଗ ମୁହାଁ
କନକ ବ୍ୟୁରୋ : କେରଳ ଛୁଇଁଲା ମୌସୁମୀ । ୭ ଦିନ ବିଳମ୍ବରେ ଦକ୍ଷିଣ ପଶ୍ଚିମ ମୌସୁମୀ ବାୟୁ କେରଳରେ ପ୍ରବେଶ କରିଛି । ତେବେ ଭାରତୀୟ ପାଣିପାଗ ବିଭାଗ ବା ଆଇଏମଡି ଚେତାବନୀ ଦେଇଛି ଯେ ସାମୁଦ୍ରିକ ଝଡ ‘ବିପର୍ଯ୍ୟୟ’ କାରଣରୁ ମୌସୁମୀର ପ୍ରଭାବ ବର୍ତମାନ ଏତେଟା ରହିବ ନାହିଁ । ଜୁନ୍ ୧ରେ ମୌସୁମୀ କେରଳରେ ପହଂଚିବାର ଥିଲା, କିନ୍ତୁ ୭ ଦିନ ବିଳମ୍ବରେ ଏଥର କେରଳର ବିଭିନ୍ନ ସ୍ଥାନରେ ବର୍ଷା ଆରମ୍ଭ ହୋଇଛି । ଆଇଏମଡିର ସୂଚନା ଅନୁଯାୟୀ, ଆସନ୍ତା ୨ ଦିନ ମଧ୍ୟରେ ବଙ୍ଗୋପସାଗର, ଆରବ ସାଗରର ଅଧିକାଂଶ ଅଂଚଳ ସମେତ ସମଗ୍ର କେରଳ ଓ ତାମିଲନାଡୁ ସହ ସମ୍ପୂର୍ଣ୍ଣ ଦକ୍ଷିଣ ଭାରତରେ ବିସ୍ତାରିତ ହେବ । ଆସନ୍ତା ୪୮ ଘଂଟା ମଧ୍ୟରେ ଏହା ଉତରପୂର୍ବ ଭାରତରେ ମଧ୍ୟ ପ୍ରବେଶ କରିବ ଏବଂ ପରେ କେନ୍ଦ୍ରୀୟ ଭାରତ ଆଡ଼କୁ ଅଗ୍ରସର ହେବ । ଏହାପୂର୍ବରୁ ଗତ ବର୍ଷ (୨୦୨୨) ମେ ୨୯, ୨୦୨୧ରେ ୩ ଜୁନ୍ ଏବଂ ୨୦୨୦ରେ ଜୁନ୍ ୧, ୨୦୧୯ରେ ଜୁନ ୮ ଏବଂ ୨୦୧୮ରେ ମେ ୨୯ରେ ମୌସୁମୀ କେରଳ ଛୁଇଁଥିଲା । କିନ୍ତୁ ଚଳିତ ବର୍ଷ ୮ ଦିନ ବିଳମ୍ବରେ ପହଂଚିଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଆରବ ସାଗରରେ ବାତ୍ୟା ‘ବିପର୍ଯ୍ୟୟ’ ଅଧିକ ଘନୀଭୂତ ହୋଇ ଏକ ଭୀଷଣ ସାମୁଦ୍ରିକ ଝଡ଼ର ରୂପ ନେଇଛି ଏବଂ ଏହା ଉତର ଦିଗକୁ ଗତି କରୁଥିବା ଭାରତୀୟ ପାଣିପାଗ ବିଭାଗ ବୁଧବାର ପ୍ରକାଶ କରିଛି । ୨୪ ଘଂଟା ଭିତରେ ବାତ୍ୟା ଉତରମୁହାଁ ହୋଇ ଗତି କରିବା ସହ ପରେ ପରବର୍ତୀ ୩ ଦିନ ଉତର, ଉତର-ପଶ୍ଚିମ ଆଡ଼କୁ ଗତି କରିବ । ବାତ୍ୟା ଯୋଗୁଁ ସମୁଦ୍ର ମଧ୍ୟରେ ପବନର ବେଗ ଘଂଟା ପ୍ରତି ୧୩୫ରୁ ୧୪୫ କିଲୋମିଟରରେ ପବନ ବୋହୁଥିବା ସୂଚନା ରହିଛି । ଆସନ୍ତା ୩ରୁ ୪ ଦିନରେ ଭିତରେ ଏହା ଘଂଟା ପ୍ରତି ୧୬୦ କିମ ଛୁଇଁପାରେ ବୋଲି ଆକଳନ କରାଯାଉଛି ।