ଧନ୍ୟବାଦ ରାଲିରେ ପାକିସ୍ତାନ ଉପରେ ପ୍ରବଳ ବର୍ଷିଲେ ମୋଦି । କହିଲେ, ବନ୍ଧୁତା ପାଇଁ ହାତ ବଢାଇଥିଲି କିନ୍ତୁ ପଛରୁ ଛୁରୀ ମାରିଲା ପାକିସ୍ତାନ ।
ନାଗରିକତା ଆଇନକୁ ନେଇ ସାରା ଦେଶରେ ନିଆଁ ଜଳୁଥିବା ବେଳେ ଦିଲ୍ଲୀର ରାମଲୀଳା ମୈଦାନରେ ଏହାକୁ ନେଇ ମୁହଁ ଖୋଲିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହି ଆଇନ କାହାକୁ ପ୍ରଭାବିତ କରିବ ନାହିଁ ମୋଦି ସ୍ପଷ୍ଟ କରିଛନ୍ତି । ମୁସଲିମ୍ ସମ୍ପ୍ରଦାୟର ଗୋଷ୍ଠୀକୁ ଲକ୍ଷ୍ୟ କରି ଏହି ଆଇନ ପାରିତ କରାଯାଇନାହିଁ । ତେଣୁ ବିରୋଧୀ ଦଳ ଏହାକୁ ନେଇ ଲୋକଙ୍କୁ ଭମ୍ରିତ ନ କରିବାକୁ କହିଛନ୍ତି ମୋଦି । ଏହାଛଡା ମମତାଙ୍କ ଉପରେ ପ୍ରବଳ ବର୍ଷିଛନ୍ତି ପ୍ରଧାନମନ୍ତ୍ରୀ । ଏସବୁ ଭିତରେ ଧନ୍ୟବାଦ ରାଲିରେ ପାକିସ୍ତାନକୁ ଟାର୍ଗେଟ କରିବାକୁ ଭୁଲିନାହାନ୍ତି ମୋଦି ।
Kanak News is now on WhatsApp
Join and get latest news updates delivered to you via WhatsApp
ନିଜ ଅଭିଭାଷଣରେ ମୋଦି କହିଛନ୍ତି, ୨୦୧୪ରେ ବିଜେପି ସରକାର ଗଢିବା ପାଇଁ ବହୁମତ ହାସଲ କରିବା ପରେ ଶପଥ ଗ୍ରହଣ ସମାରୋହରେ ପାକିସ୍ତାନକୁ ଆମନ୍ତ୍ରିତ କରାଯାଇଥିଲା । ଏପରିକି ମୁଁ ନିଜେ ଲାହୋର ଯାଇଥିଲି, ବନ୍ଧୁତାର ହାତ ବଢାଇଥିଲି କିନ୍ତୁ ପ୍ରତିବଦଳରେ ପଛରୁ ଛୁରି ମାରିଥିଲା ପାକିସ୍ତାନ । ଭାରତ ବିରୋଧରେ ଆତଙ୍କବାଦ କାର୍ଯ୍ୟକଳାପକୁ ପୋତ୍ସାହନ ଦେବା ଠାରୁ ଆରମ୍ଭ କରି ଅନ୍ତର୍ଜାତୀୟ ସ୍ତରରେ ଭାରତ ବିରୋଧରେ ବିଷ ଓଗାଳିଥିଲା ପାକିସ୍ତାନ । ଏପରିକି ପାକିସ୍ତାନ ସେନା ମଧ୍ୟ ବାରମ୍ବାର ସୀମାରେ ଉତ୍ତେଜନା ସୃଷ୍ଟି କରିବା ଭଳି ପରିସ୍ଥିତି କରିବାକୁ ପଛାଇନଥିଲେ ।
ଏହାଛଡା ମୋଦି କହିଛନ୍ତି, କଂଗ୍ରେସ ଓ ସେମାନଙ୍କର ସହଯୋଗୀ ଦଳ ଏଥିପାଇଁ ଚିନ୍ତିତ ଯେ, କାହିଁକି ମୋଦିଙ୍କୁ ମୁସଲିମ୍ ବହୁଳ ଦେଶର ସମର୍ଥନ ମିଳୁଛି । କାହିଁକି ମୁସଲିମ୍ ବହୁଳ ଦେଶଗୁଡିକ ମୋଦିଙ୍କୁ ଏତେ ପସନ୍ଦ କରୁଛନ୍ତି । ଏବେ ସାଉଦି ଆରବ, ବାହାରିନ୍, ୟୁଏଇ ସହ ଭାରତର ସମ୍ପର୍କ ପୂର୍ବ ଅପେକ୍ଷା ଅଧିକ ମଜବୁତ୍ ହୋଇଛି । ଏହାବାଦ୍ ଶରଣାର୍ଥୀ ଓ ଅନୁପ୍ରବେଶକାରୀଙ୍କ ମଧ୍ୟରେ କଣ ପାର୍ଥକ୍ୟ ରହିଛି ତାହାକୁ ନେଇ ବଡ ବୟାନ ଦେଇଛନ୍ତି ମୋଦି । ଗୋଟିଏ ପଟେ ଅନୁପ୍ରବେଶକାରୀ କେବେ ନିଜର ପରିଚୟ ଦେଖାଇବାକୁ ଚାହୁଁନଥିବା ବେଳେ ଅନ୍ୟପଟେ ଶରଣାର୍ଥୀ ମାନେ କେବେ ନିଜର ପରିଚୟ ଲୁଚାନ୍ତି ନାହିଁ । ତେଣୁ କିଛି ଅନୁପ୍ରବେଶକାରୀ ଯେଉଁମାନେ ଦେଶରେ ଅଶାନ୍ତି ସୃଷ୍ଟି କରୁଛନ୍ତି ସେମାନଙ୍କ ସତ କାଳେ ସାମ୍ନାକୁ ଆସିଯିବ ସେଥିପାଇଁ ଏହି ବିଲକୁ ବିରୋଧ କରାଯାଉଛି । ତେବେ ବିଲକୁ ବିରୋଧ କଲାବେଳେ ହିଂସା ସୃଷ୍ଟି ନ କରିବାକୁ ଆହ୍ୱାନ ଦେଇଛନ୍ତି ପ୍ରଧାନମନ୍ତ୍ରୀ ।