ଫରେନସିକ୍ ଲ୍ୟାବରୁ କେମିତି ଗାଏବ ହୋଇଗଲା ମୃତ୍ୟୁ ମାମଲାର ଫାଇଲ? ପ୍ରଶ୍ନ ଉଠାଇଲେ ପରିବାର, ସିବିଆଇ ତଦନ୍ତ ଦାବି କଲେ ସଂପର୍କୀୟ ।
କନକ ବ୍ୟୁରୋ: ନୀଳଗିରିର ବହୁ ଚର୍ଚ୍ଚିତ ଶାନ୍ତିଲତା ହତ୍ୟାକାଣ୍ଡ ମାମଲାର ତଦନ୍ତ ରିପୋର୍ଟ ପୋଲିସ ହେପାଜତରୁ ହଜିଯିବା ପରେ ପ୍ରଶ୍ନ ଉଠାଇଛନ୍ତି ପରିବାର ଲୋକ । ଏହାକୁ ଏକ ଷଡଯନ୍ତ୍ର କହିବା ସହ ମାମଲାର ସିବିଆଇ ତଦନ୍ତ ଦାବି କରିଛନ୍ତି ଶାନ୍ତିଲତାଙ୍କ ସ୍ୱାମୀ ଓ ଝିଅ ।
Kanak News is now on WhatsApp
Join and get latest news updates delivered to you via WhatsApp
ଶାନ୍ତିଲତାଙ୍କର ମୃତ୍ୟୁକୁ ଏହା ଭିତରେ ପାଞ୍ଚ ବର୍ଷ ବିତି ଯାଇଥିଲେ ବି ମାକୁ ଝୁରି ହେଉଛି ଝିଅ ଋତୁପର୍ଣ୍ଣା । ମା’ର ଫଟୋକୁ ଦେଖି ଗୁମୁରି ଗୁମୁରି କାନ୍ଦିବା ଛଡା ବାଟ କିଛି ନାହିଁ । ହେଲେ, ମାକୁ ଯେଉଁମାନେ ହତ୍ୟା କରିଥିଲେ, ସେ ଏପର୍ଯ୍ୟନ୍ତ ଧରାନପଡିବା ତାଙ୍କୁ ବେଶି କଷ୍ଟ ଦେଇଛି । ଆଉ ଏତିକିବେଳେ ଫରେନସିକ୍ ଲାବରୁ ତାଙ୍କ ମାଙ୍କ ହତ୍ୟାକାଣ୍ଡ ମାମଲାର ଫାଇଲ ହଜିଯିବା ଆହୁରି କଷ୍ଟ ଦେଇଛି ।
- ଫାଇଲ ଗାଏବ, ପ୍ରଶ୍ନ ଉଠାଇଲେ ପରିବାର
- ସିବିଆଇ ତଦନ୍ତ ଦାବି କଲେ ସମ୍ପର୍କୀୟ
ପୋଲିସ ହେପାଜତରୁ ଶାନ୍ତିଲତାଙ୍କ ମର୍ଡର କେସର ଫାଇଲ ଗାଏବ ହୋଇଯିବାକୁ ସହଜରେ ଗ୍ରହଣ କରିପାରିନାହାଁନ୍ତି ତାଙ୍କ ପରିବାର ଲୋକ । ଶାନ୍ତିଲତାଙ୍କ ସ୍ୱାମୀ ଓ ଝିଅ ଫାଇଲ ହଜିଯିବା ପଛରେ ଷଡଯନ୍ତ୍ରର ଗନ୍ଧ ବାରିଛନ୍ତି । କାହାକୁ ବଞ୍ଚାଇବା ପାଇଁ ଏଭଳି ଉଦ୍ୟମ କରାଯାଇଥିବା ଅଭିଯୋଗ କରିଛନ୍ତି । ରହସ୍ୟ ଉପରୁ ପରଦା ହଟାଇବା ପାଇଁ ମାମଲାରେ ଡିଜିପିଙ୍କ ହସ୍ତକ୍ଷେପ ଲୋଡିଛନ୍ତି ଓ ସିବିଆଇ ତଦନ୍ତ ଦାବି କରିଛନ୍ତି ।
- ୧୩ ନଭେମ୍ବର ୨୦୧୭
- ସ୍ଥାନ- କଦମ ସାହି, ନୀଳଗିରି
ଘର ଭିତରେ ଶାନ୍ତିଲତା ଏକୁଟିଆ ଥିବାର ସୁଯୋଗ ନେଇ କେହି ତାଙ୍କୁ ଅତି ନୃଶଂସ ଭାବେ ହତ୍ୟା କରିଥିଲେ । ବ୍ୟାଙ୍କରେ ଚାକିିରି କରିଥିବା ସ୍ୱାମୀ ସନ୍ଧ୍ୟାରେ ଘରକୁ ଫେରିବା ପରେ ପତ୍ନୀଙ୍କ ମୃତ ଦେହ ଦେଖି ଆବାକ ହୋଇଯାଇଥିଲେ । ଏନେଇ ଥାନାରେ ଅଭିଯୋଗ କରିଥିଲେ । ଅଭିଯୋଗକୁ ଭିତ୍ତି କରି ପୋଲିସ ତଦନ୍ତ ଆରମ୍ଭ କରିଥିଲା । କିନ୍ତୁ ହତ୍ୟାକାଣ୍ଡ ରହସ୍ୟ ଉପରୁ ପରଦା ହଟାଇ ପାରିନଥିଲା । ସାଢ଼େ ତିନି ବର୍ଷ ପରେ ମାମଲା କ୍ରାଇମବ୍ରାଞ୍ଚକୁ ଯାଇଥିଲା । କ୍ରାଇମବ୍ରାଞ୍ଚର ଡିଏପି ନୀଳଗିରି ଆସି ଯାଞ୍ଚ କରିଥିଲେ । ତଦନ୍ତ କରି ସମସ୍ତ ତଥ୍ୟ ରାଜ୍ୟ ଫରେନସିକ୍ ଲ୍ୟାବକୁ ପରୀକ୍ଷା ପାଇଁ ପଠାଇଥିଲେ କିନ୍ତୁ ବିଡମ୍ବନାର ବିଷୟ ରାଜ୍ୟ ଫରେନସିକ ଲାବକୁ ଯାଇଥିବା ଫାଇଲ ଏବେ ହଜି ଯାଇଛି । ଏନେଇ ଲ୍ୟାବ ପକ୍ଷରୁ ଥାନାରେ ଏତଲା ଦିଆଯାଇଛି । ଯାହାକୁ ନେଇ ଉଠିଛି ପ୍ରଶ୍ନ ।
– ଏସଏଫଏସଏଲ ଭଳି ସମ୍ବେଦନଶୀଳ ଜାଗାରୁ ଫାଇଲ ଚୋରି ହେଲା କେମିତି?
– ହତ୍ୟାକାଣ୍ଡ ଫାଇଲ ବନ୍ଦ କରିବା ପାଇଁ ଚାଲିଛି କି ଷଡଯନ୍ତ୍ର?
– କାହାକୁ ବଞ୍ଚାଇବାକୁ ଚେଷ୍ଟା କରାଯାଉଛି କି?