ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛନ୍ତି ଭିତରକନିକାର ଗୋରୀ ଓ ମଲ୍ଲୀ କୁମ୍ଭୀର। ନିସଙ୍ଗ ଜୀବନ ବିତାଉଛି ମଲ୍ଲୀ ଅଣ୍ଡା ଦେବା ପାଇଁ ବାନ୍ଧୁଛି ବସା
କନକ ବ୍ୟୁରୋ: ମହାନଦୀ, ବ୍ରାହ୍ମଣୀ, ବୈତରଣୀ ନଦୀର ତ୍ରିକୋଣଭୂମିରେ ଗଢି ଉଠିଛି ପ୍ରକୃତିର ଅପରୂପ ସମ୍ଭାର ଭିତରକନିକା । ଭିତରକନିକାର ପ୍ରାକୃତିକ ସୌନ୍ଦର୍ଯ୍ୟ ପର୍ଯ୍ୟଟକଙ୍କୁ ଯେତିକି ଆକୃଷ୍ଟ କରେ, ସେହିପରି ଭିତରକନିକାରେ ବାସ କରୁଥିବା ଦୁଇଟି ଧଳା କୁମ୍ଭୀର ପର୍ଯ୍ୟଟକଙ୍କୁ ଭିତରକନିକା ଆସିବାକୁ ବାଧ୍ୟକରେ । ଭାରତର ଅନ୍ୟ କୌଣସି ସ୍ଥାନରେ ପ୍ରାକୃତିକ ପରିବେଶରେ ଧଳା କୁମ୍ଭୀର ଦେଖା ଯାଉନଥିବାରୁ ଭିତରକନିକାର ଦୁଇ ଧଳା କୁମ୍ଭୀର ମଲ୍ଲୀ ଏବଂ ଗୋରୀର ବିଶେଷ ମହତ୍ୱ ରହିଛି । ୧୯୭୫ ମସିହାରେ ଜନ୍ମଲାଭ କରିଥିବା ଗୋରୀକୁ ୪୮ବର୍ଷ ପୁରିଯାଇଛି । ମାତ୍ର ଗୋରୀ ଠାରୁ ଅନ୍ୟ କୌଣସି ଧଳା କୁମ୍ଭୀର ସୃଷ୍ଟି କରାଯାଇ ପାରିନାହିଁ । ଗୋରୀ ଯୌବନର ଅପରାହ୍ନରେ ପାଦ ଥାପିଛି । ଆଉ ଗୋରୀ ମାଆ ହେବ ବୋଲି ବନବିଭାଗ ଏବଂ ପରିବେଶବିତମାନେ ଆଶା ରଖିନାହାଁନ୍ତି । ମାତ୍ର ମଲ୍ଲୀ ୨୦ବର୍ଷରେ ପଦାର୍ପଣ କରିବା ସହ ଯୌବନରେ ପହଁଚିଛି । ଏଯାବତ୍ ମଲ୍ଲୀ ସହିତ ମଧ୍ୟ କୌଣସି ପୁରୁଷ କୁମ୍ଭୀର ମିଳନ ପକ୍ରିୟାରେ ସାମିଲ ହୋଇନାହିଁ । ତେବେ ମଲ୍ଲୀର ମାତୃତ୍ୱ ଲାଭ କରିବାକୁ ନେଇ ମଧ୍ୟ ପ୍ରଶ୍ନ ଉଠିଛି ।
Kanak News is now on WhatsApp
Join and get latest news updates delivered to you via WhatsApp
ଭିତରକନିକାର ଦ୍ୱିତୀୟ ଧଳା କୁମ୍ଭୀର ମଲ୍ଲୀ ପୂର୍ବରୁ ୨ଥର ଅଣ୍ଡା ଦେଇଥିଲେ ମଧ୍ୟ ସେଥିରୁ ଛୁଆ ବାହାରି ନଥିଲା । ଏଥର ତାର ଚାଲି ଚଳନ ଓ ବ୍ୟବହାରରେ ପରିବର୍ତନରୁ ଚଳିତବର୍ଷ ପୁଣି ଅଣ୍ଡା ଦେବ ବୋଲି ବନବିଭାଗ ସୂତ୍ରରୁ ଜଣାପଡିଛି । ମଲ୍ଲୀ ପୁରୁଷ କୁମ୍ଭୀର ସହ ମିଳନ ପକ୍ରିୟାରେ ସାମିଲ ହୋଇନଥିବାରୁ ଏଥର ଯଦି ଅଣ୍ଡା ଦିଏ, ସେଥିରୁ ଛୁଆ ସୃଷ୍ଟି ହୋଇନପାରେ । ଆବଦ୍ଧ ଜଳାଶୟ ମଧ୍ୟରେ ଥିବା ମଲ୍ଲୀ ମାଆ ହେବ ନା ଭାରତର ପ୍ରଥମ ଧଳା କୁମ୍ଭୀର ଗୋରୀ ପରି ମାତୃତ୍ୱରୁ ବଞ୍ଚିତ ହୋଇ ରହିବ, ତାହାକୁ ନେଇ ବିଭିନ୍ନ ମହଲରେ ପ୍ରଶ୍ନ ଉଠିଲାଣି । ମଲ୍ଲୀ ୨୦୧୮ ମସିହାରେ ୧୮ଟି, ୨୦୨୧ ମସିହାରେ ୨୩ଟି ଅଣ୍ଡା ଦେଇଥିଲେ ମଧ୍ୟ ସେଥିରୁ ଛୁଆ ବାହାରିନଥିଲା । ପୂର୍ବରୁ ଗୋରୀ ସହ ପୁରୁଷ କୁମ୍ଭୀରର ମିଳନ ପାଇଁ ଉଦ୍ୟମ ହୋଇଥିଲା, ସେଥିରେ ଗୋରୀ କ୍ଷତାକ୍ତ ହୋଇଥିଲା । ମଲ୍ଲୀ ସମ୍ପର୍କରେ କୁମ୍ଭୀର ବିଷାରଦଙ୍କ ସହ ଆଲୋଚନା କରି ପଦକ୍ଷେପ ନିଆଯିବ ବୋଲି କହିଛନ୍ତି ଡିଏଫଓ ।