ଚାଷୀ ଆଖିରୁ ନିଦ ଚୋରୀ କରିଛି ଲଘୁଚାପ ବର୍ଷା ! ଜୋରସୋରରେ କଟାଚାଲିଛି ଜମିରୁ ଫସଲ, କିନ୍ତୁ ସଂରକ୍ଷଣ ପାଇଁ ଜାଗା ନାହିଁ
କନକ ବ୍ୟୁରୋ : ପ୍ରଥମେ ମରୁଡି ପରେ ଚକଡା ପୋକର ମାଡରେ ଠିକରେ ଅଣ୍ଟା ସଳଖି ଠିଆ ହୋଇନଥିବା ଚାଷୀ ଏବେ ଲଘୁଚାପ ବର୍ଷାକୁ ନେଇ ଚିନ୍ତାରେ ପଡିଯାଇଛନ୍ତି । ଅଦିନିଆ ଲଘୁଚାପ ଶ୍ରୀଲଙ୍କା ମୁହାଁ ହୋଇଯାଇଛି ସତ । କିନ୍ତୁ ୧୫ ତାରିଖରୁ ପ୍ରବଳ ବର୍ଷା ନେଇ ପାଣିପାଗ ବିଭାଗ ପକ୍ଷରୁ ସତର୍କ ସୂଚନା ଜାରି କରାଯିବା ପରେ ଚିନ୍ତାରେ ପଡିଯାଇଛନ୍ତି ନବରଙ୍ଗପୁରର ଚାଷୀ । କ୍ଷେତରେ ହସୁଥିବା ପାଚିଲା ଧାନ ଓ ମକା ଫସଲକୁ ତରବରିଆ ଭାବେ ଅମଳରେ ଲାଗିପଡିଛନ୍ତି ଚାଷୀ । ଜମିରୁ ଫସଲ କାଟିବା ପରେ କିନ୍ତୁ ଚିନ୍ତାରେ ପଡିଯାଇଛନ୍ତି ଚାଷୀ । ଜମିରୁ ଫସଲ କାଟି ଆଣିବା ପରେ ତାକୁ କେଉଁଠି ରଖିବେ ତାକୁ ନେଇ ଅଡୁଆରେ ପଡିଛି ଚାଷୀ । ବର୍ଷା ଦାଉରୁ ଫସଲର ସଂରକ୍ଷଣ ପାଇଁ ଜିଲ୍ଲା ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଇ ନଥିବାରୁ ଚାଷୀ ଅସନ୍ତୋଷ ପ୍ରକାଶ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଜମିରୁ ଫସଲ କାଟି ଆଣିବା ପରେ ଚାଷୀ ରଖିବା ପାଇଁ ଜାଗା ନଥିବାରୁ ଜାତୀୟ ରାଜପଥରେ ସୁଖାଉଥିବାର ଘଟଣା ସାମ୍ନାକୁ ଆସିଛି । ତେବେ କେଉଁ ମୁହୂର୍ତ୍ତରେ ଯେ ବର୍ଷା ହୋଇ ସବୁ ଧୋଇନେବ ତାହା କେହି ଜାଣିନାହାନ୍ତି । ସେପଟେ ବର୍ଷା ନେଇ ପାଣିପାଗ ବିଭାଗ ପକ୍ଷରୁ ସୂଚନା ଦିଆଯିବା ପରେ ପରିସ୍ଥିତିର ମୁକାବିଲା ପାଇଁ ପ୍ରସ୍ତୁତ ଥିବା କହିଛନ୍ତି ଉମରକୋଟ ବିଡିଓ ।
ଚଳିତ ବର୍ଷ ଚାଷୀ ବିଭିନ୍ନ ଅସୁବିଧାର ସମ୍ମୁଖୀନ ହୋଇଛନ୍ତି । ଚାଷ ଆରମ୍ଭରୁ ବର୍ଷାର ଅଭାବ ଯୋଗୁଁ କେତେକ ଜିଲ୍ଲାରେ ସୃଷ୍ଟି ହୋଇଛି ମରୁଡି । ଆଉ କେତେକ ସ୍ଥାନରେ ଚକଡା ପୋକ ଧାନ ଖାଇଦେବା ପରେ ଅଗାଡିକୁ ନେଇ ଚିନ୍ତାରେ ପଡିଥିବା ଚାଷୀ ଜମିରେ ଫସଲକୁ ଜାଳି ଦେଇଛନ୍ତି । ଏବେ ଅଦିନିଆ ଲଘୁଚାପ ଚାଷୀର ନିଦ ହଜେଇ ଦେଇଛି ।