ଟ୍ୱିଟରର ନୂଆ ମାଲିକ ଏଲନ ମସ୍କ: ମସ୍କଙ୍କ ଟ୍ୱିଟ୍ ବଢାଇଲା କର୍ମଚାରୀଙ୍କ ଚିନ୍ତା
କନକ ବ୍ୟୁରୋ: ଏପ୍ରିଲରେ ଟ୍ୱିଟର କିଣିବା ନେଇ ଚୁକ୍ତି ହେବା ପରେ ନକଲି ଆକାଉଂଟ କେତେ ଅଛି ଜବାବ ମାଗିଥିଲେ ମସ୍କ । ଯାହାର ଉତରକୁ ନେଇ ସନ୍ତୁଷ୍ଟ ହୋଇନଥିଲେ ମସ୍କ । ପରେ ଡିଲ୍ ବାତିଲ ଯାଏ କଥାଯାଇଥିଲା । ଆଉ ଏହି ସମୟରେ ସିଇଓ ପରାଗଙ୍କ ସହିତ ବିବାଦ ବଢିଥିଲା । ୧୪.୨ ଡଲାର ପ୍ରତି ସେୟାର ପିଛା ଅର୍ଥାତ୍ ମୋଟ୍ ୩.୩୭ ଲକ୍ଷ କୋଟିରେ ଟ୍ୱିଟରକୁ କିଣିବା ପାଇଁ ପ୍ରସ୍ତାବ ଦେଇଥିଲେ ମସ୍କ । ପରେ ନକଲି ଆକାଉଂଟ ପାଇଁ ଜୁଲାଇରେ ମସ୍କ ଏବଂ ଟ୍ୱିଟର ମଧ୍ୟରେ ବିବାଦ ମୁଣ୍ଡ ଟେକିଥିଲା । ପରେ ଅକ୍ଟୋବରରେ ନିଷ୍ପତି ବଦଳାଇଛନ୍ତି ମସ୍କ ।
Kanak News is now on WhatsApp
Join and get latest news updates delivered to you via WhatsApp
ଏପ୍ରିଲ ୧୩ରେ ଟ୍ୱିଟରକୁ କିଣିବାକୁ ଯାଉଛନ୍ତି ବୋଲି ଘୋଷଣା କରିଥିଲେ ବିଶ୍ୱର ସବୁଠୁ ବଡ ଧନୀ ବ୍ୟକ୍ତି ଏଲନ ମସ୍କ । ଆଉ ଏବେ ଅକ୍ଟୋବରରେ ସେ ନିଜ ଟ୍ୱିଟର ଆକାଉଂଟରେ ଚିଫ୍ ଟ୍ୱିଟ୍ ଲେଖିବା ସହିତ ଏକ ଭିଡିଓ ସେୟାର କରିଛନ୍ତି । ଯେଉଁଥିରେ ସେ ଏକ ହାତ ଧୁଆ ବେସିନ ଧରି ପ୍ରବେଶ କରିଛନ୍ତି । ଆଉ ଉପରେ ଏକ ଇଂଲିଶ ରୂଢୀକୁ ଲେଖିଛନ୍ତି, ଲେଟ୍ ଦାଟ ସିଙ୍କ୍ ଇନ୍ । ନିଜ ଅନ୍ଦାଜରେ ଭିଡିଓ ଟ୍ୱିଟ୍ କରି ବିତର୍କ ସୃଷ୍ଟି କରୁଥିବା ଏଲନ ମସ୍କଙ୍କ ଏହି ଭିଡିଓ ଉପରେ ଲେଖିଥିବା ରୁଢୀର ଅର୍ଥ, ସବୁ ବୁଝି ସାରିଛି ଏବେ କାର୍ଯ୍ୟକାରୀ କରିବାର ସମୟ.. ପୁରୁଣା ଯିବେ ନୂଆ ଆସିବେ । ଆଉ ଅଫିସରେ ନିଜ କର୍ମଚାରୀଙ୍କ ସହ କଥା ବାର୍ତା କରୁଥିବାର ଫଟୋ ମଧ୍ୟ ସାମ୍ନାକୁ ଆସିଛି । ଅର୍ଥାତ୍ ଟ୍ୱିଟରରେ ଏବେ ସେ ତାଙ୍କ ଚିନ୍ତାଧାରାକୁ ପ୍ରୟୋଗ କରିବାକୁ ଯାଉଛନ୍ତି । ଆଉ ଏହି ଟ୍ୱିଟ ର କିଛି ଘଂଟା ପରେ ସିଇଓ ପରାଗ ଅଗ୍ରୱାଲ, କମ୍ପାନୀର ସେଫଟି ଦାୟିତ୍ୱରେ ଥିବା ବିଜୟ ଗାଡ୍ଡେଙ୍କ ସମେତ ୪ ପ୍ରମୁଖ ଅଧିକାରୀଙ୍କୁ ବହିଷ୍କାର କରିଛନ୍ତି ।
ପରାଗ ଅଗ୍ରୱାଲ ଓ ଅନ୍ୟ ଟୁଇଟର କର୍ମଚାରୀଙ୍କୁ ବରଖାସ୍ତ କରାଯିବା ନେଇ ମସ୍କ, ଟୁଇଟର କିମ୍ବା କୌଣସି ଅଧିକାରୀଙ୍କ ପକ୍ଷରୁ ବିଧିବଦ୍ଧ ସୂଚନା ଦିଆଯାଇ ନାହିଁ । ଅନ୍ୟପଟେ ଶୁଣା ଯାଉଛି ଆଗକୁ ଆହୁରି କର୍ମଚାରୀଙ୍କ ବି ଚାକିରି ଯାଇପାରେ ।
ଟ୍ୱିଟରରେ ସବୁଠାରୁ ଅଧିକ ଫଲୋଅର ଥିବା ବ୍ୟକ୍ତି ଥିଲେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ । ଆଉ ଆମେରିକାର ନିର୍ବାଚନ ବେଳେ ବିବାଦ ପରେ ଟ୍ରମ୍ପଙ୍କ ଆକାଉଂଟ ବନ୍ଦ କରିଦେଇଥିଲା ଟ୍ୱିଟର । ଆଉ ମସ୍କ ଟ୍ୱିଟରର ସିଇଓ ହେବା ପରେ ଏହି ଟ୍ୱିଟ୍ ଯେଉଁଥିରେ ସେ ଦ ବାର୍ଡ ଇଜ୍ ଫ୍ରିଡ୍ ଲେଖିଛନ୍ତି । ଆଉ ପରବର୍ତୀ ସମୟରେ ଟ୍ରମ୍ପଙ୍କୁ ବ୍ଲକ କରିଥିବା ଟିମ ସଦସ୍ୟଙ୍କୁ ବହିଷ୍କାର କରିଥିବା ଖବର ସାମ୍ନାକୁ ଆସିଛି । ତେଣୁ ଏବେ ଟ୍ରମ୍ପ ପୁଣିଥରେ ଟ୍ୱିଟରରେ ଏଂଟ୍ରି ମାରିପାରନ୍ତି । ହେଲେ ଫ୍ରିଡ୍ ଲେଖି ମସ୍କ ଟ୍ୱିଟ୍ କରିବା ପରେ ସମସ୍ତେ ନିଜ ନିଜ ମତ ରଖିବେ ବୋଲି ଇସାରା କରିଛନ୍ତି । ଆଉ ସମସ୍ତଙ୍କ ମତକୁ ଅଗ୍ରାଧିକାର ଦେଇ କିପରି ଆଗକୁ ବଢୁଛନ୍ତି ମସ୍କ ତା ଉପରେ ସମସ୍ତଙ୍କ ନଜର ।