ମହାମାୟୀଙ୍କ ମହାଷ୍ଟମୀ: ପୂଜା ମଣ୍ଡପରେ ମାଆ ଜଗତଜନନୀଙ୍କ ଆରାଧନା, ପୀଠରେ ଚାଲିଛି ନବମୀ ପୂଜା
ସୁଉଚ୍ଚ ତୋରଣ ସାଙ୍ଗକୁ ରଙ୍ଗବେରଙ୍ଗ ଆଲୁଅ ମାଳାରେ ଝଲସୁଛି ପୂଜା ପେଣ୍ଡାଲ
କନକ ବ୍ୟୁରୋ: ଉତ୍ସବ ଓ ଉତ୍ସାହର ସହ ଚାଲିଛି ଜଗତଜନନୀଙ୍କ ପୂଜା । ଆଜି ମାଆ ଦୁର୍ଗାଙ୍କ ମହାଷ୍ଟମୀ ପୂଜା । ଆଖି ପାଉନଥିବା ତୋରଣ ଓ ମଣ୍ଡପରେ ମାଆଙ୍କ ଆବାହନ ସହ ମହାଷ୍ଟମୀ ପୂଜାରେ ମାଆଙ୍କ ଦର୍ଶନ ପାଇଁ ଭକ୍ତଙ୍କ ଭିଡ ଛୁଟିଛି ପୂଜା ମଣ୍ଡପକୁ । ଲକ୍ଷାଧିକ ଶ୍ରଦ୍ଧାଳୁ ମାଆଙ୍କ ଦର୍ଶନ ସହ ପୂଜା ଦେଖିବାକୁ ଭିଡ ଜମାଉଛନ୍ତି । ମାଆଙ୍କ ବିଶ୍ୱରୂପ ଓ ବେଶଭୂଷା ଦେଖିବାକୁ ଶ୍ରଦ୍ଧାଳୁ ଆତୁର ରହିଛି । ଆଖି ଝଲସା ଆଲୋକମାଳାରେ ସଜା ହୋଇଛି ସାରା ଓଡିଶାର ପୂଜା ପେଣ୍ଡାଲ ।
Kanak News is now on WhatsApp
Join and get latest news updates delivered to you via WhatsApp
ରାଜଧାନୀ ଭୁବନେଶ୍ୱରର ସହିଦ ନଗରରେ ଚାନ୍ଦି ମେଢ ସାଙ୍ଗକୁ ମାଆଙ୍କ ସୁନା ମୁକୁଟ ଦେଖିବାକୁ ପ୍ରବଳ ଭିଡ ଜମୁଛି । ସେହିପରି ପୁରୁଣା ଷ୍ଟେସନ ବଜାର ପୂଜା ମଣ୍ଡପରେ ଚାନ୍ଦି ମେଢ ଦେଖିବାକୁ ମିଳିଛି । ଭୁବନେଶ୍ୱରର ୧୭୧ଟି ସ୍ଥାନରେ ମାଆଙ୍କ ପୂଜା ଅନୁଷ୍ଠିତ ହେଉଛି । ସେପଟେ କଟକ ସହରର ବିଭିନ୍ନ ପୂଜା ମଣ୍ଡପ ଓ ଶକ୍ତିପୀଠରେ ମାଆଙ୍କ ଆରାଧନା କରାଯାଉଛି । କଟକରେ ପ୍ରାୟ ୧୬୫ଟି ମଣ୍ଡପରେ ମାଆଙ୍କ ଆରାଧନା କରାଯାଉଛି । ପୁରୀରେ ମଧ୍ୟ ବେଶ ଧୁମଧାମରେ ଚାଲିଛି ଶାରଦୀୟ ଦୁର୍ଗାପୂଜା । ଆକର୍ଷଣୀୟ କରିବା ପାଇଁ ପୂଜା କମିଟି ପକ୍ଷରୁ ସୁନ୍ଦର ସୁନ୍ଦର ସୁଉଚ୍ଚ ତୋରଣମାନ କରାଯାଇଛି ।
ସେପଟେ ପୀଠରେ ଆଜି ମାଆଙ୍କ ନବମୀ ପୂଜା । ଶନିବାର ରାଜ୍ୟର ସମସ୍ତ ଶକ୍ତିପୀଠରେ ଜଗତଜନନୀଙ୍କ ମହାଷ୍ଟମୀ ପୂଜା କରାଯାଇଛି । କଟକର କଟକ ଚଣ୍ଡି, ଯାଜପୁରର ମାଆ ବିରଜା ଏବଂ ଜଗତସିଂହପୁରର ଅଧିଷ୍ଠାତ୍ରୀ ଦେବୀ ମାଆ ଶାରଳାଙ୍କ ପୀଠରେ ମହାଷ୍ଟମୀ ପୂଜା ଅନୁଷ୍ଠିତ ହୋଇଛି । ଷୋଡଶ ଉପଚାରରେ ପୂଜା ଚାଲିଛି । କଟକ ଚଣ୍ଡି ମନ୍ଦିରକୁ ଫୁଲରେ ସୁନ୍ଦର ଭାବେ ସଜା ଯାଇଛି । ନବରାତ୍ର ପୂଜା ସମୟରେ ଚଣ୍ଡିଙ୍କର ଭିନ୍ନଭିନ୍ନ ବେଶ କରାଯାଇଥାଏ । ମହାଷ୍ଟମୀରେ ଚଣ୍ଡିଙ୍କୁ ମହାକାଳୀ ବେଶରେ ଦର୍ଶନ କରିଛନ୍ତି ଶ୍ରଦ୍ଧାଳୁ । ସେହିପରି ସକାଳୁ ସକାଳୁ ବୈତରଣୀ ନଦୀରୁ ଜଳ ଆସିବା ପରେ ମାଆ ବିରଜାଙ୍କ ମହାସ୍ନାନ କରାଯାଇଥିଲା ।
ପରେ ନୀତି ଅନୁସାରେ ପୂଜା ବିଦ୍ଧି କରାଯାଉଛି । ଦେବୀ ଶାରଳାଙ୍କ ପୀଠରେ ମୁଳାଷ୍ଟମୀ ଠାରୁ ଆରମ୍ଭ ହୋଇଥିବା ଶାରଦୀୟ ପାର୍ବଣ ପୂଜା ବିଦ୍ଧିି ସମାପନ ହୋଇଛି । ବିଳମ୍ବିତ ରାତ୍ରିରେ ଶକ୍ତି ପୀଠରେ ସନ୍ଧି ପୂଜା କରାଯାଇଛି । ଶ୍ରଦ୍ଧାଳୁମାନେ ଶାରଳାଙ୍କ ଦର୍ଶନ କରିବା ସହ ଉତ୍ପାଦିତ ନୂତନ ଶସ୍ୟରେ ପ୍ରସ୍ତୁତ ଭୋଗ ମାଆଙ୍କ ପାଖରେ ଲାଗି କରିଛନ୍ତି । ମହାଷ୍ଟମୀରେ ଶକ୍ତି ସ୍ୱରୁପିଣୀଙ୍କ ପାଦ ଦର୍ଶନ କଲେ କୋଟି ଜନ୍ମର ପାପ କ୍ଷୟ ହୁଏ ବୋଲି ବିଶ୍ୱାସ ରହିଛି । ଶକ୍ତି ପୀଠ ମାନଙ୍କରେ ପୂଜାକୁ ଶାନ୍ତି ଶୃଙ୍ଖଳାରେ ଶେଷ କରିବା ପାଇଁ ପ୍ରଶାସନ ପକ୍ଷରୁ ବ୍ୟାପକ ବନ୍ଦୋବସ୍ତ କରାଯାଇଛି ।