୫ ଦେଶରେ କରୋନା ସଂକ୍ରମଣ ବୃଦ୍ଧି । ଭାରତରେ ବାଜିଲା ସତର୍କ ଘଣ୍ଟି । ରାଜ୍ୟମାନଙ୍କ ସହ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀଙ୍କ ବୈଠକ
କନକ ବ୍ୟୁରୋ: କରୋନାକୁ ନେଇ ପୁଣି ସଜାଗ ଭାରତ ସରକାର । ଜାପାନ, ଆମେରିକା, ଚୀନ, ବ୍ରାଜିଲ ଓ କୋରିଆରେ ସଂକ୍ରମଣ ବଢୁଥିବାବେଳେ ଏବେ ଦେଶରେ ଆଲର୍ଟ ଜାରି କରାଯାଇଛି । ବୁଧବାର ସମସ୍ତ ରାଜ୍ୟର ସ୍ୱାସ୍ଥ୍ୟମନ୍ତ୍ରୀମାନଙ୍କ ସହ ବୈଠକ କରିଛନ୍ତି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭ୍ୟ । ବିଭିନ୍ନ ଦେଶରେ ବଢୁଥିବା କରୋନା ସଂକ୍ରମଣ ଉପରେ ବୈଠକରେ ଆଲୋଚନା କରାଯାଇଛି । ବୈଠକ ପରେ ସ୍ୱାସ୍ଥ୍ୟମନ୍ତ୍ରୀ ଟୁଇଟ କରି କହିଛନ୍ତି ଯେ. ଦେଶ ଦୁନିଆରୁ କରୋନା ଶେଷ ହୋଇନି । ତେଣୁ ସଜାଗ ରହିବାକୁ ପଡିବ । ସରକାର ସମସ୍ତ ପ୍ରକାର ପରିସ୍ଥିତିର ମୁକାବିଲା ପାଇଁ ପ୍ରସ୍ତୁତ ଅଛନ୍ତି । ସମସ୍ତ ରାଜ୍ୟର ସ୍ୱାସ୍ଥ୍ୟ ଅଧିକାରୀଙ୍କୁ ସ୍ଥିିତି ଉପରେ ନଜର ରଖିବାକୁ ନିର୍ଦ୍ଦେଶ ଦିଆଯାଇଛି । ସେପଟେ ନୀତି ଆୟୋଗ ସଦସ୍ୟ ଭି,କେ ପଲ ପରାର୍ମଶ ଦେଇ କହିଛନ୍ତି ଯେ ଯେ ଗହଳି ପୂର୍ଣ୍ଣ ସ୍ଥାନରେ ମାସ୍କ ପିନ୍ଧିବା ଉଚିତ । ଯେଉଁମାନେ ବୟସ୍କ ଓ ଏକାଧିକ ରୋଗରେ ଆକ୍ରାନ୍ତ ସେମାନେ ଅଧିକ ସଜାଗ ରହିବା ଜରୁରୀ ।
Kanak News is now on WhatsApp
Join and get latest news updates delivered to you via WhatsApp
ସେ ଏକଥାକୁ ନେଇ ମଧ୍ୟ ଚିନ୍ତା ପ୍ରକାଶ କରିଛନ୍ତି ଯେ ଏବେ ସୁଦ୍ଧା ଦେଶରେ କେବଳ ୨୮ ପ୍ରତିଶତ ଲୋକ ବୁଷ୍ଟର ଡୋଜ ନେଇଛନ୍ତି । ଯଥାଶୀଘ୍ର ବୁଷ୍ଟର ଡୋଜ ସମସ୍ତେ ନେବାକୁ ଅପିଲ କରିଛନ୍ତି । ବୟସ୍କ ବ୍ୟକ୍ତିମାନେ ବିଳମ୍ବ ନକରି ବୁଷ୍ଟର ଡୋଜ ନେବା ଜରୁରୀ ବୋଲି ସେ କହିଛନ୍ତି । ଏଥିସହ ଭିକେ ପଲ କହିଛନ୍ତି ଯେ ଦେଶରେ ଆବଶ୍ୟକ ଅନୁସାରେ କରୋନା ପରୀକ୍ଷା କରାଯାଉଛି । ସ୍ଥିତିକୁ ଦୃଷ୍ଟିରେ ରଖି ପ୍ରତି ସପ୍ତାହରେ କରୋନା ସମୀକ୍ଷା ବୈଠକ କରାଯିବ ।
ଅନ୍ୟପଟେ ମଙ୍ଗଳବାର ଦିନ ନମୁନାକୁ ଜେନମ ସିକ୍ୱେନ୍ସ ପାଇଁ ପଠାଇବାକୁ ସବୁ ରାଜ୍ୟକୁ ନିର୍ଦ୍ଦେଶନାମା ଜାରି କରିଛନ୍ତି କେନ୍ଦ୍ର ସରକାର । ଏହାଦ୍ୱାରା ସମୟ ପୂର୍ବରୁ ନୂଆ ଭାରିଆଣ୍ଟ ସମ୍ପର୍କରେ ଜଣାପଡିବ ବୋଲି କୁହାଯାଇଛି । ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ କେନ୍ଦ୍ର ସ୍ୱାସ୍ଥ୍ୟ ସଚିବ ରାଜେଶ ଭୂଷଣ ଚିଠି ଲେଖିଛନ୍ତି । ସ୍ୱାସ୍ଥ୍ୟମନ୍ତ୍ରୀଙ୍କ ବୈଠକ ଭିତରେ ସେରମ ଇନଷ୍ଟିଚ୍ୟୁଟ ଅଫ ଇଣ୍ଡିଆର ସିଇଓ ଆଦାର ପୁନାୱାଲା ଏକ ଟୁଇଟ କରିଛନ୍ତି । ପୁନାୱାଲା କହିଛନ୍ତି ଯେ ଚୀନର ସ୍ଥିତିକୁ ଦେଖି ଭୟଭୀତ ହେବାର ଆବଶ୍ୟକତା ନାହିଁ । କାରଣ ଦେଶରେ ଶତ ପ୍ରତିଶତ ଟିକାକରଣ ସରିଛି ।
ତେବେ ଏଠି ପ୍ରଶ୍ନ ଉଠୁଛି
• ଭାରତ ସରକାର କରୋନାର ପୂର୍ବ ଭାରିଆଣ୍ଟକୁ ଦେଖି ଟିକା ପ୍ରସ୍ତୁତ କରିଥିଲେ
• ସଫଳତାର ସହ ଶତ ପ୍ରତିଶତ ଟିକାକରଣ ମଧ୍ୟ କରାଯାଇଛି
• ଯଦି କରୋନା ଭାରିଆଣ୍ଟ ନିଜର ମ୍ୟୁଟାଣ୍ଟ ପରିବର୍ତ୍ତନ କରୁଛି ତେବେ କଣ ଏହି ଟିକା କାମ ଦେବ?
• ଯଦି ନୂଆ ଭାଇରସ ଅଧିକ ଘାତକ ହୁଏ ତେବେ ସରକାରଙ୍କ ନିକଟରେ ପର୍ଯ୍ୟାପ୍ତ ସମୟ ଓ ଆବଶ୍ୟକୀୟ ଟିକା ଉପଲବ୍ଧ ରହିବ ନା ନାହିଁ ?
• ଯଦି ଆଗକୁ ସ୍ଥିତି ଅଣଅଣାୟତ୍ତ ହୁଏ ତେବେ ସରକାର ଏହାର ମୁକାବିଲା ପାଇଁ ପ୍ରସ୍ତୁତ କି?