ମୁମ୍ବାଇରେ ଗୋଟିଏ ଦିନରେ ୮ ହଜାର ସଂକ୍ରମିତ ଚିହ୍ନଟ ତ ଦିଲ୍ଲୀରେ ୩ ହଜାର ପାର, ହରିଆଣାରେ ଶିକ୍ଷାନୁଷ୍ଠାନ ବନ୍ଦ କଲେ ସରକାର
କନକ ବ୍ୟୁରୋ : କରୋନା ଭୁତାଣୁର ତୃତୀୟ ଲହର ସହ ଓମିକ୍ରନ ଭାରିଆଣ୍ଟ ଆଜିକା ଦିନରେ ଚିନ୍ତାର ବିଷୟ ପାଲଟିଛି । ଏନେଇ ଦେଶରେ ସରକାର ସତର୍କ ହେବା ସହ ଅନେକ ପ୍ରତିବନ୍ଧକ ଲଗାଇଛନ୍ତି । ଏହି କ୍ରମରେ ହରିଆଣା ସରକାର ବଢୁଥିବା କରୋନା ସଂକ୍ରମଣକୁ ଦୃଷ୍ଟିରେ ରଖି ଜାନୁଆରୀ ୩ ତାରିଖରୁ ୧୨ ତାରିଖ ପର୍ଯ୍ୟନ୍ତ ରାଜ୍ୟର ସମସ୍ତ ଶିକ୍ଷାନୁଷ୍ଠାନ ବନ୍ଦ ରଖିବାକୁ ନିର୍ଦ୍ଦେଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ମହାରାଷ୍ଟ୍ର ସରକାରଙ୍କ କୋଭିଡ ଟାକ୍ସଫୋର୍ସ ସଦସ୍ୟ ଶଶାଂଙ୍କ ଜୋଶୀ କହିଛନ୍ତି କି ମୁମ୍ବାଇରେ କରୋନା ସଂକ୍ରମଣ ବିସ୍ଫୋଟକ ରୂପ ନେଇଛି । ଏଠାରେ ଗତ ୨୪ ଘଂଟା ମଧ୍ୟରେ ୮ ହଜାର ସଂକ୍ରମିତ ଚିହ୍ନଟ ହୋଇଥିବା ବେଳେ ଆଜି ଏହି ସଂଖ୍ୟା ୧୦ ହଜାର ପାର କରିପାରେ ବୋଲି ଅନୁମାନ କରାଯାଉଛି ।
ଅନ୍ୟପଟେ ଯଦି ଦିଲ୍ଲୀ କଥା କହିବା ତେବେ ଦିଲ୍ଲୀରେ ଏବେ କରୋନା ସଂକ୍ରମିତ ଆକ୍ଟିଭ ମାମଲା ୬୩୬୦ ରେ ପହଂଚିଛି । ୩ ଦିନ ପୂର୍ବରୁ ଏହି ସଂଖ୍ୟା ୨୨୯୧ ଥିଲା । ତିନିଦିନରେ ୩ ଗୁଣା ଆକ୍ଟିଭ ମାମଲା ବଢିବା ପରେ ଏହାକୁ ନେଇ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଚିନ୍ତା ପ୍ରକଟ କରିଛନ୍ତି ।
ବଢୁଥିବା ସଂକ୍ରମଣକୁ ଦୃଷ୍ଟିରେ ରଖି ଭାରତରେ ତୃତୀୟ ଲହର ଆସିଯାଇଥିବା କଥା ଅନୁମାନ କରିଛନ୍ତି ବିଶେଷଜ୍ଞମାନେ । ଏନେଇ ଲୋକମାନଙ୍କ କୋଭିଡ କଟକଣା ମାନିବାକୁ ବିଶେଷଜ୍ଞମାନେ ପରାମର୍ଶ ଦେଇଛନ୍ତି । କହିରଖୁ କି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ଦେଇଥିବା ପରିସଂଖ୍ୟାନ ମୁତାବକ ଏବେ ୨୩ ରାଜ୍ୟରୁ ଓମିକ୍ରନ ସଂକ୍ରମିତ ଚିହ୍ନଟ ହୋଇଛନ୍ତି । ଦେଶରେ ମୋଟ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ୧୫୨୫ କୁ ବୃଦ୍ଧି ପାଇଛି । ସେମାନଙ୍କ ମଧ୍ୟରୁ ୫୬୦ ଜଣ ସୁସ୍ଥ ହୋଇଥିବା କଥା କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ସୂଚନା ଦେଇଛନ୍ତି । ଏହି କ୍ରମରେ ସବୁଠୁ ଅଧିକ ୪୬୦ ଜଣ ଓମିକ୍ରନ ଆକ୍ରାନ୍ତ ମହାରାଷ୍ଟ୍ରରୁ ଚିହ୍ନଟ ହୋଇଛନ୍ତି ।