କନକ ବ୍ୟୁରୋ: ରାଜ୍ୟ ବିକାଶରେ ବ୍ୟାଙ୍କଗୁଡିକର ଭୂମିକା ଗୁରୁତ୍ୱପୂର୍ଣ୍ଣ ହୋଇଥାଏ । କିନ୍ତୁ ଏ କ୍ଷେତ୍ରରେ ଘରୋଇ ବ୍ୟାଙ୍କଗୁଡିକର ଭୂମିକା ନଗଣ୍ୟ । ଏହା ବିଭିନ୍ନ ସମୀକ୍ଷା ବୈଠକରେ ପ୍ରତିଫଳିତ ହୋଇଛି । ତାସତ୍ତ୍ୱେ ସରକାରୀ ଅଧିକାରୀମାନଙ୍କ ଘରୋଇ ବ୍ୟାଙ୍କ ପ୍ରୀତି ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଏହାକୁ ନେଇ କ୍ଷୋଭ ପ୍ରକାଶ କରିଛନ୍ତି ମୁଖ୍ୟ ସଚିବ ସୁରେଶ ମହାପାତ୍ର । ଘରୋଇ ବ୍ୟାଙ୍କ ପରିବର୍ତ୍ତେ ରାଷ୍ଟାୟତ୍ତ ବ୍ୟାଙ୍କରେ ସରକାରୀ ଅର୍ଥ ଜମା ରଖିବାକୁ ସେ ବିଭିନ୍ନ ବିଭାଗକୁ ପରାମର୍ଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଚାଷୀଙ୍କୁ ହେଉ କିମ୍ବା ବିଭିନ୍ନ ଏସଏଚଜି ମହିଳା ଗ୍ରୁପକୁ ଋଣପ୍ରଦାନ, ସବୁଥିରେ ଘରୋଇ ବ୍ୟାଙ୍କଗୁଡିକର ପ୍ରଦର୍ଶନ ନିରୁତ୍ସାହଜନକ ରହିଛି । ଯୁବକଙ୍କୁ ଆତ୍ମନିର୍ଭରଶୀଳ କରିବା କ୍ଷେତ୍ରରେ ବି ଏମାନେ ବିଫଳ ହୋଇଛନ୍ତି । ଏଭଳି ସ୍ଥଳେ ମୁଖ୍ୟ ସଚିବଙ୍କ ପରାମର୍ଶକୁ ଗୁରୁତ୍ୱପୂର୍ଣ୍ଣ ମନେ କରାଯାଉଛି । ରାଜ୍ୟରେ ଚାଷୀମାନଙ୍କୁ ଯେତିକି ଋଣ ପ୍ରଦାନ କରାଯାଉଛି, ତାର ସିଂହଭାଗ ସମବାୟ ବ୍ୟାଙ୍କ ପ୍ରଦାନ କରୁଛି ।
– ରାଷ୍ଟ୍ରାୟତ ବ୍ୟାଙ୍କଗୁଡିକର ପ୍ରଦର୍ଶନ ୫୫.୮୮% ପ୍ରତିଶତ ରହିଛି
-ଘରୋଇ ବ୍ୟାଙ୍କଗୁଡିକର ପ୍ରଦର୍ଶନ ରହିଛି ୧୫.୫୪%
-ମୋଟ ୧୧୦ ସିଙ୍ଗଲ ନୋଡାଲ ଆକାଂଉଟ ମଧ୍ୟରୁ ୮ ରାଷ୍ଟ୍ରାୟତ ବ୍ୟାଙ୍କରେ ଅଛି ୫୭ ଆକାଉଂଟ
– ୩ ଘରୋଇ ବ୍ୟାଙ୍କରେ ବାକି ୫୩ ଆକାଂଉଟ
– କିଛି ବିଭାଗ ଆଇସିଆଇସିଆଇ, ଏଚଡିଏଫସି ଓ ଆକ୍ସିସ୍ ବ୍ୟାଙ୍କରେ ଖୋଲିଛନ୍ତି ସମସ୍ତ ଆକାଉଂଟ
ମୁଖ୍ୟ ସଚିବ ଏହାକୁ ନେଇ ଅସନ୍ତୋଷ କରିବା ସହ କିଛି ନିର୍ଦ୍ଦିଷ୍ଟ ପରାମର୍ଶ ଦେଇଛନ୍ତି । ରାଷ୍ଟାୟତ ବ୍ୟାଙ୍କଗୁଡିକରେ ସରକାରୀ କାର୍ଯ୍ୟକ୍ରମ ବାବଦ ଅର୍ଥ ଓ କେନ୍ଦ୍ରୀୟ ଅନୁଦାନ ରାଶି ଜମା ରଖିବାକୁ ପରାମର୍ଶ ଦେଇଛନ୍ତି । ପୂର୍ବରୁ ଘରୋଇ ବ୍ୟାଙ୍କରେ ସରକାରୀ ଅର୍ଥ ଜମାକୁ ନେଇ ବିବାଦ ସୃଷ୍ଟି ହୋଇଛି । ଘରୋଇ ବ୍ୟାଙ୍କଗୁଡିକ ସରକାରୀ ଅଧିକାରୀଙ୍କୁ ବିଭିନ୍ନ ଭାବରେ ପ୍ରଭାବିତ କରି ସରକାରୀ ଅର୍ଥ ସେମାନଙ୍କ ବ୍ୟାଙ୍କରେ ରଖିବାକୁ ସକ୍ଷମ ହେଉଛନ୍ତି । ମୁଖ୍ୟ ସଚିବଙ୍କ ଅସନ୍ତୋଷ ପରେ ଆଶା କରାଯାଉଛି, ଅଧିକାରୀଙ୍କ ଘରୋଇ ବ୍ୟାଙ୍କ ପ୍ରୀତି କମିବ ।