ଥମିବାର ନାଁ ନେଉନି ନାଗରିକତା ନିଆଁ: ସାରା ଦେଶରେ ଅସନ୍ତୋଷ, ଦିଲ୍ଲୀରେ ତୀବ୍ର ଆନ୍ଦୋଳନ । ଜୀବନଯାତ୍ରା ଠପ୍ ସହ ଗାଡି ଚଳାଚଳ ପ୍ରଭାବିତ
କନକ ବ୍ୟୁରୋ: ୨୦୧୪ରୁ ୨୦୧୯, ନରେନ୍ଦ୍ର ମୋଦି ପ୍ରଧାନମନ୍ତ୍ରୀ ହେବା ପରଠୁ ହୁଏତ ସବୁଠାରୁ ବଡ଼ ଚ୍ୟାଲେଂଜ ଭାବେ ଉଭା ହୋଇଛି ଦେଶବ୍ୟାପୀ ଜଳୁଥିବା ଏହି ନାଗରିକତା ନିଆଁ । ପ୍ରତିବାଦ ଏବଂ ଆନ୍ଦୋଳନ ଆଉ କେବଳ ଛାତ୍ରଛାତ୍ରୀଙ୍କ ଭିତରେ ସୀମିତ ନାହିଁ । ବରଂ ଏଥିରେ ସାମିଲ ହୋଇଛନ୍ତି ସମାଜସେବୀ, ବୁଦ୍ଧିଜୀବୀ, ରାଜନେତା ଏବଂ ବିଭିନ୍ନ ବର୍ଗର ଲୋକ । ଦିଲ୍ଲୀରେ ସାମାଜିକ କର୍ମୀ ଯୋଗେନ୍ଦ୍ର ଯାଦବଙ୍କୁ ପୁଲିସ୍ ହେପାଜତକୁ ନିଆଯାଇଥିବା ବେଳେ ବେଙ୍ଗାଳୁରୁରେ ବିଶିଷ୍ଟ ଐତିହାସିକ ରାମଚନ୍ଦ୍ର ଗୁହାକୁ ପୁଲିସ୍ ବଳପୂର୍ବକ ଉଠାଇ ନେଇଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରତିବାଦକାରୀ ରାସ୍ତାକୁ ଓହ୍ଲାଇ ଆସିବା ଫଳରେ ଜାମ ହୋଇଯାଇଛି ଦିଲ୍ଲୀରୁ ଗୁରୁଗ୍ରାମକୁ ସଂଯୋଗ କରୁଥିବା ୪୮ ନମ୍ବର ଜାତୀୟ ରାଜପଥ । ସୁରକ୍ଷା ଦୃଷ୍ଟିରୁ ଦିଲ୍ଲୀ-ଗୁରୁଗ୍ରାମ ସୀମାକୁ ମଧ୍ୟ ସିଲ କରିଦିଆଯାଇଛି । ସେହିପରି ଏନଏଚ-୮ରେ ଅଚଳ ହୋଇଯାଇଛି ଟ୍ରାଫିକ୍ ବ୍ୟବସ୍ଥା । ଦିଲ୍ଲୀରେ ପ୍ରତିବାଦ ଏତେ ତୀବ୍ର ହୋଇଛି ଯେ, ୧୯ଟି ମେଟ୍ରେ ଷ୍ଟେସନକୁ ବନ୍ଦ ରଖିବାକୁ ପଡ଼ିଛି । ଇଣ୍ଡିଗୋର ୨୦ଟି ବିମାନକୁ ରଦ୍ଦ କରାଯାଇଛି । ୧୬ଟି ବିମାନ ଉଡ଼ାଣରେ ବିଳମ୍ବ ହୋଇଛି । ଏୟାର ଇଣ୍ଡିଆର ୮ଟି ବିମାନ ଦେଢ଼ ଘଂଟାରୁ ଅଧିକ ସମୟ ଯାଏଁ ବିଳମ୍ବ ହୋଇଛି ଏବଂ ମୋବାଇଲ ସେବା, ଇଂଟରନେଟ୍ ଓ ଏସଏମଏସ ଉପରେ କଟକଣା ଲାଗିଛି ।
ଆଇନ ଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ଦିଲ୍ଲୀ ପୁଲିସ୍ କୌଣସି ରାଲିକୁ ଅନୁମତି ଦେଇନଥିଲା । ଆଉ ପ୍ରସ୍ତାବିତ ପ୍ରତିବାଦ ସ୍ଥଳରେ ଆଗୁଆ ୧୪୪ ଧାରା ଜାରି କରାଯାଇଥିଲା ଅର୍ଥାତ ୪ରୁ ଅଧିକ ବ୍ୟକ୍ତି ଏକାଠି ହେବା ଉପରେ ଲଗାଯାଇଥିଲା କଟକଣା । ଆଇଟିଓ ମେଟ୍ରୋ ଷ୍ଟେସନ ନିକଟରେ ଥିବା ସହିଦ ପାର୍କରେ ଦୁଇଟି ଗୋଷ୍ଠୀ ଏକାଠି ହୋଇ ପ୍ରତିବାଦକୁ ଜୋରଦାର କରିବା ପାଇଁ ଯୋଜନା କରିଥିବାବେଳେ ଭଣ୍ଡୁର କରିଦେଇଛି ପୁଲିସ ।
ଉତ୍ତର ପ୍ରଦେଶର ରାଜଧାନୀ ଲକ୍ଷନୌରେ ନାଗରିକତା ଆଇନ୍ ଓ ଏନଆରସିକୁ ବିରୋଧ କରି ବ୍ୟାପକ ଭଙ୍ଗାରୁଜା ଓ ପୋଡ଼ାଜଳା କରିଛନ୍ତି ଆନ୍ଦୋଳନକାରୀ । ପୁଲିସ୍ ଗାଡ଼ି ଉପରେ ଆନ୍ଦୋଳନକାରୀ ପଥର ମାଡ଼ କରିଥିବା ବେଳେ କିଛି ସ୍ଥାନରେ ନିଆଁ ଲଗାଇ ଦେଇଛନ୍ତି । ବିଶେଷ କରି ଲକ୍ଷନୌର ପୁରୁଣା ସହର ଅଂଚଳରେ ପୁଲିସ୍ ଓ ଆନ୍ଦୋଳନକାରୀ ମୁହାଁମୁହିଁ ହୋଇଛନ୍ତି । ସ୍ଥିତି ଅଣାୟତ୍ତ ହେବାରୁ ପୁଲିସ୍ ଲୁହବୁହା ଗ୍ୟାସ୍ ମାଡ଼ କରିବା ସହ ଲାଠିଚାର୍ଚ୍ଚ ମଧ୍ୟ କରିଛି ।
ତେବେ ଏସବୁ ଭିତରେ ଲୋକଙ୍କ ଭିତରେ ବିଶ୍ୱାସ ସୃଷ୍ଟି କରିବାକୁ କେନ୍ଦ୍ର ସରକାର ଏକ ନୂଆ ପ୍ରୟାସ କରିଛନ୍ତି । ନାଗରିକତା ସଂଶୋଧନ ଆଇନ ସଂପର୍କରେ ଲୋକଙ୍କ ଭିତରେ ଥିବା ଭୟ ଓ ବିଭ୍ରାନ୍ତିକୁ ଦୂର କରିବା ପାଇଁ ବିଜ୍ଞାପନ ପ୍ରକାଶ କରାଯାଇଛି । ନାଗରିକତା ଆଇନ୍ ପ୍ରସଙ୍ଗରେ ଗୁଜବକୁ ବିଶ୍ୱାସ ନକରିବାକୁ ସରକାର ବିଜ୍ଞାପନ ଜରିଆରେ ଅନୁରୋଧ କରିଛନ୍ତି । ତେବେ କେବେ ଥମିବ ଏ ଜଳୁଥିବା ନିଆଁ ଆଉ କେବେ ଫେରିବ ଶାନ୍ତି ।