କୋରାପୁଟରୁ ବ୍ୟବସାୟୀଙ୍କୁ ଉଠାଇନେଲା ଏନ୍ଆଇଏ ! ଆତଙ୍କବାଦୀ ଲିଙ୍କ୍ ନେଇ ଚର୍ଚ୍ଚା
କନକ ବ୍ୟୁରୋ: ଆତଙ୍କବାଦୀ ଲିଙ୍କରେ କୋରାପୁଟର ଜଣେ ବ୍ୟବସାୟୀଙ୍କୁ ଏନଆଇଏ ଉଠାଇନେଇଥିବା ଚର୍ଚ୍ଚା ହେଉଛି । ଗତକାଲି ରାତିରେ ଜାତୀୟ ତଦନ୍ତକାରୀ ସଂସ୍ଥା ଚଢ଼ଉ କରି ତାଙ୍କୁ ନେଇଥିବା କୁହାଯାଇଛି । ବ୍ୟବସାୟୀ ଜଣଙ୍କ ବେଆଇନ ସିମି ଆତଙ୍କବାଦୀ ସହ ସଂପୃକ୍ତ ଥିବା ସନ୍ଦେହ କରାଯାଉଛି । ତେବେ ଏ ନେଇ କୌଣସି ସ୍ପଷ୍ଟ ସୂଚନା ମିଳିନାହିଁ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ବ୍ୟବସାୟୀଙ୍କ ବ୍ୟାଙ୍କ ଆକାଉଂଟକୁ ବାହାରୁ କୋଟି କୋଟି ଟଙ୍କା ଆସୁଥିବା ଖବର ଏନଆଇଏ ପାଖରେ ପହଂଚିଥିଲା । ଏହା ପରେ ବ୍ୟବସାୟୀଙ୍କ ଘରେ ଚଢ଼ଉ କରି ତାଙ୍କୁ ଉଠାଇ ନେଇଥିବା ସୂଚନା ରହିଛି । ଚଢ଼ଉ ସମୟରେ ବହୁ ଟଙ୍କା ଏବଂ କିଛି ଆପତିଜନକ କାଗଜ ପତ୍ର ମଧ୍ୟ ଏନଆଇଏ ହାତରେ ଲାଗିଥିବା ଚର୍ଚ୍ଚା ହେଉଛି । ଆତଙ୍କବାଦୀ ସହ ଜଡ଼ିତ ରହି ତାଙ୍କ ଠାରୁ ଟଙ୍କା ଆଣି ଅପରାଧୀକ କାର୍ଯ୍ୟରେ ବିନିଯୋଗ କରୁଥିବା ଅଭିଯୋଗରେ ତାଙ୍କୁ ଜାତୀୟ ତଦନ୍ତକାରୀ ସଂସ୍ଥା ଉଠାଇ ନେଇଥିବା ଚର୍ଚ୍ଚା ହେଉଛି । ତେବେ ଏ ବାବଦରେ କୌଣସି ସ୍ପଷ୍ଟ ସୂଚନା ମିଳିପାରିନାହିଁ ।
ତେବେ ଏନ୍ଆଇଏ ଯାହାଙ୍କୁ ଉଠାଇ ନେଇଥିବା କଥା କୁହାଯାଉଛି, ସେହି ବ୍ୟବସାୟୀ ଜଣଙ୍କ ଏବେ ସହରରେ ନ ଥିବାରୁ ଏହି ସନ୍ଦେହ ଅଧିକ ଦୃଢ଼ୀଭୂତ ହୋଇଛି। ଏକ ନିର୍ଭରଯୋଗ୍ୟ ସୁତ୍ରରୁ ମିଳିଥିବା ଖବର ଅନୁସାରେ, ଏହି ବ୍ୟବସାୟୀ ଜଣଙ୍କ ଦୀର୍ଘ ଦିନ ହେଲା ପୁଲିସର ସନ୍ଦେହୀ ନଜରରେ ରହିଥିଲେ । ତାଙ୍କ ବିରୋଧରେ ଗୁଇନ୍ଦା ରିପୋର୍ଟ ମଧ୍ୟ ଦେଇଥିଲା । ବ୍ୟବସାୟୀଙ୍କ ଘରେ ରାଜ୍ୟ ଓ ରାଜ୍ୟ ବାହାରର ଲୋକମାନେ ମେଳି ବାନ୍ଧୁଥିବା ମଧ୍ୟ ଖବର ରହିଛି । ଏଥିପାଇଁ ଗୁଇନ୍ଦା ବିଭାଗ ତାଙ୍କ ଉପରେ କଡା ନଜର ରଖିଥିଲା। ଏଭଳି ସ୍ଥିତିରେ ଆଜି ତାଙ୍କୁ ଉଠାଇ ନେଇଥିବା ଚର୍ଚ୍ଚା ପଛରେ ସତ୍ୟତା ଥିବା ଅନୁମାନ କରୁଛନ୍ତି ବୁଦ୍ଧିଜୀବୀ ।
ଅପରପକ୍ଷରେ ଗିରଫ ନେଇ କୋରାପୁଟ ପୁଲିସ ପକ୍ଷରୁ କୌଣସି ସ୍ପଷ୍ଟ ସୂଚନା ନାହିଁ । ଗିରଫ ଖବରକୁ ସେମାନେ ଅସ୍ୱୀକାର କରି ନ ଥିଲେ ମଧ୍ୟ ତାଙ୍କ ପାଖରେ କୌଣସି ସୂଚନା ନ ଥିବା କହିଛନ୍ତି । କୋରାପୁଟ ଏସପି ଡଃ କନଓ୍ଵର ବିଶାଳ ସିଂହ କହିଛନ୍ତି ଯେ, ଆତଙ୍କବାଦୀ ଲିଙ୍କରେ ଜଣଙ୍କୁ ଉଠାଇ ନେବା ଖବର ଆମେ ଶୁଣୁ ଛୁ। କିନ୍ତୁ ଚଢଉ ନେଇ ଆମକୁ କେହି ଯୋଗାଯୋଗ କରି ନାହାନ୍ତି କିମ୍ବା ପରେ ଜଣାଇ ନାହାନ୍ତି । ତେଣୁ ଆମ ପାଖରେ ଗିରଫ ନେଇ କୌଣସି ସୂଚନା ନାହିଁ ବୋଲି ଏସପି କହିଛନ୍ତି ।