ବଡ଼ଚଣାରେ ବିଜେଡିର ବଡ଼ ସରପ୍ରାଇଜ୍: କଟିଲା ହେଭିୱେଟ୍ ଅମର ଶତପଥୀଙ୍କ ଟିକେଟ୍, ବର୍ଷାଙ୍କୁ ପ୍ରାର୍ଥୀ କଲା ବିଜେଡି
କନକ ବ୍ୟୁରୋ: ବିଜେଡିର ଅଘୋଷିତ ପ୍ରାର୍ଥୀ ତାଲିକାକୁ ଅପେକ୍ଷା ଥିଲା । ଆଉ ଷଷ୍ଠ ପ୍ରାର୍ଥୀ ତାଲିକା ଘୋଷଣା କରି, ସାରା ରାଜ୍ୟକୁ ଚମକାଇ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ବଡଚଣାରେ ଦେଇଛନ୍ତି ବଡ ସରପ୍ରାଇଜ୍ । ଦଳରେ ଯୋଗଦେବାର ଦିନକ ପରେ, ବର୍ଷା ପ୍ରିୟଦର୍ଶିନୀଙ୍କୁ ଏଠାରେ ପ୍ରାର୍ଥୀ କରାଯାଇଛି । ସେହିପରି କେନ୍ଦୁଝର ଓ କେନ୍ଦ୍ରାପଡାରେ ମାଷ୍ଟର ଷ୍ଟ୍ରୋକ୍ ମାରିଛନ୍ତି ମୁଖ୍ୟମନ୍ତ୍ରୀ । ଚମ୍ପୁଆରେ ସନାତନ ମହାକୁଡଙ୍କୁ ପ୍ରାର୍ଥୀ କରି କେନ୍ଦୁଝରରେ ବଡ ରାଜନୈତିକ ଗୋଟି ଚାଳନା କରିଛନ୍ତି । କଂଗ୍ରେସ ଛାଡି ବିଜେଡିରେ ଯୋଗ ଦେଇଥିବା ଗଣେଶ୍ୱର ବେହେରାଙ୍କୁ କେନ୍ଦ୍ରାପଡା ମଇଦାନକୁ ଓହ୍ଲାଇ ବିରୋଧୀ ଶିବିରରେ ହଟଚମଟ ସୃଷ୍ଟି କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବଡ଼ଚଣାରେ ବରିଷ୍ଠ ନେତା ଅମର ଶତପଥୀଙ୍କ ଟିକେଟ୍ କାଟି ବର୍ଷାଙ୍କୁ ପ୍ରର୍ଥୀ କରି ସମସ୍ତଙ୍କୁ ଚକିତ କରିଦେଇଛନ୍ତି ବିଜେଡି ସୁପ୍ରିମୋ । ବିଧିବଦ୍ଧ ଭାବେ ଦଳରେ ଯୋଗଦାନର ମାତ୍ର ଦିନକ ପରେ ଓଲିଉଡ୍ ଅଭିନେତ୍ରୀ ବର୍ଷା ପ୍ରିୟଦର୍ଶିନୀଙ୍କୁ ଟିକେଟ୍ ଦେଇଛି ବିଜେଡି । ପ୍ରାର୍ଥୀ ଘୋଷଣା ପରେ କଟକ ଚଣ୍ଡୀମନ୍ଦିରରେ ପୂଜାର୍ଚ୍ଚନା କରିଛନ୍ତି ବର୍ଷା । ତାଙ୍କ ଉପରେ ଭରସା ରଖିଥିବାରୁ ମୁଖ୍ୟମନ୍ତ୍ରୀଙ୍କ ନିକଟରେ ସେ କୃତଜ୍ଞତା ଜଣାଇଛନ୍ତି । କହିଛନ୍ତି, ରାଜ୍ୟ ସରକାର ମହିଳାଙ୍କୁ କେତେ ଗୁରୁତ୍ୱ ଦେଉଛନ୍ତି ମିସନ ଶକ୍ତି ତାହାର ଉଦାହରଣ ।
୨୦୨୪ ବଡ଼ଚଣା ଲଢ଼େଇ
ବର୍ଷା ପ୍ରିୟଦର୍ଶିନୀ, ବିଜେଡି – ଅମର ନାୟକ, ବିଜେପି – ?, କଂଗ୍ରେସ
ବଡ଼ଚଣାରେ ବିଜେଡି ବର୍ଷା ପ୍ରିୟଦର୍ଶିନୀଙ୍କୁ ପ୍ରାର୍ଥୀ କରିଥିବା ବେଳେ ଅମର ନାୟକଙ୍କୁ ରିପିଟ୍ କରିଛି ବିଜେପି । କଂଗ୍ରେସ ଏପର୍ଯ୍ୟନ୍ତ ପ୍ରାର୍ଥୀ ଘୋଷଣା କରିନାହିଁ ।
୨୦୧୯ ବଡ଼ଚଣା ଲଢ଼େଇ
ଅମର ଶତପଥୀ, ବିଜେଡି – ୬୪,୦୮୪
ଅମର ନାୟକ, ବିଜେପି – ୬୨,୫୯୯
ଅଜୟ ସାମଲ, କଂଗ୍ରେସ – ୯,୩୨୨
୨୦୧୯ ନିର୍ବାଚନ ବିଜେଡି ପ୍ରାର୍ଥୀ ଅମର ଶତପଥୀଙ୍କୁ କଡ଼ା ଟକ୍କର ଦେଇଥିଲେ ବିଜେପିର ଅମର ନାୟକ । କମ୍ ଭୋଟ ବ୍ୟବଧାନରେ ବିଜୟୀ ହୋଇ ବଡ଼ଚଣାର ବିଧାୟକ ହୋଇଥିଲେ ଅମର ଶତପଥୀ । ୨୦୦୪ ନିର୍ବାଚନକୁ ଛାଡ଼ିଦେଲେ ୧୯୯୦ ମସିହାରୁ ଏହି ଆସନରେ କ୍ରମାଗତ ସେ ୬ଥର ବିଧାୟକ ହୋଇଛନ୍ତି । ଏଥର ମଧ୍ୟ ଲଢ଼ିବାକୁ ଚାହୁଁଥିଲେ ଅମର ଶତପଥୀ । ନହେଲେ ତାଙ୍କ ପୁଅକୁ ଟିକେଟ ଦେବା ପାଇଁ ବିଜେଡି ପାୱାର କରିଡରରେ ଲବି କରିଥିଲେ । ହେଲେ ତାଙ୍କ ଉପରେ ଭରସା ନକରି ବର୍ଷାଙ୍କୁ ଟିକେଟ ଦେଇଛି ଦଳ । ଏବେ ଅମର ଶତପଥୀଙ୍କ ଆଭିମୁଖ୍ୟ କ’ଣ ହେବ ତା ଉପରେ ରହିଛି ସମସ୍ତଙ୍କ ନଜର । ଟିକେଟ କଟିବା ପରେ ଅମର ଶତପଥୀଙ୍କ ଭୁବନେଶ୍ୱର ବାସଭବନରେ ତାଙ୍କ ସମର୍ଥକମାନେ ଏକାଠି ହୋଇଛନ୍ତି ।
ବଡ଼ଚଣା ପାଇଁ ଅନ୍ୟତମ ଆଶାୟୀ ଥିଲେ ରାଜ ନାରାୟଣ ମହାପାତ୍ର । ପୂର୍ବତନ ମନ୍ତ୍ରୀ ସୀତାକାନ୍ତ ମହାପାତ୍ରଙ୍କ ପୁଅ ରାଜ ନାରାୟଣ ନିକଟରେ ବିଜେଡିରେ ମିଶିଥିଲେ । ଟିକେଟ ଦାବିଦାର ଥିଲେ ବି ତାଙ୍କ ଉପରେ ଭରସା ଦେଖାଇନି ବିଜେଡି ।
ଗୋଟିଏ ପଟେ ବର୍ଷାଙ୍କୁ ବିଜେଡି ଟିକେଟ୍ ଦେଇଛି । ଅନ୍ୟପଟେ ବିଜେଡି ଛାଡ଼ି ଏପ୍ରିଲ ୧ ତାରିଖରେ ବିଜେପିରେ ଯୋଗ ଦେଇଥିଲେ ଅଭିନେତା ଅନୁଭବ ମହାନ୍ତି । ହେଲେ ଅନୁଭବଙ୍କୁ କେଉଁଠି ପ୍ରାର୍ଥୀ କରିବ, ଏଯାଏଁ ନିଷ୍ପତି ନେଇନାହିଁ ବିଜେପି ।