ବଡ଼ଚଣା ପାଇଁ ବ୍ଲୁ ପ୍ରିଣ୍ଟ: ଶଙ୍ଖ ଭବନରେ ଆଶାୟୀଙ୍କ ମାନଭଞ୍ଜନ, ବର୍ଷାଙ୍କ ବିଜୟ ପାଇଁ ସଂକଳ୍ପ
କନକ ବ୍ୟୁରୋ: ବଡଚଣାରେ ବର୍ଷା ପ୍ରିୟଦର୍ଶିନୀଙ୍କୁ କେମିତି ଜିତାଇବ ବିଜେଡି, ସେଥିପାଇଁ ପ୍ରସ୍ତୁତ କରିଛି ସ୍ୱତନ୍ତ୍ର ରଣନୀତି । ବର୍ଷାଙ୍କୁ ପ୍୍ରାର୍ଥୀ କରିବା ପରେ ଦଳର ପ୍ରାଥମିକତା ହେଉଛି, ସମ୍ଭାବ୍ୟ ବିଦ୍ରୋହକୁ ଏଡାଇବା । ଏହି କ୍ରମରେ ବଡଚଣା ପାଇଁ ପ୍ରବଳ ଦାବିଦାର ଥିବା ଅମର ଶତପଥୀଙ୍କୁ ମନାଇବାକୁ ଉଦ୍ୟମ ହୋଇଛି । ଆଶା କରାଯାଉଛି, ଦଳ ଅନେକାଂଶରେ ସଫଳ ହୋଇଛି । କାରଣ ଆଉ ନିର୍ବାଚନ ଲଢିବେ ନାହିଁ ବୋଲି ଅମର କହିଛନ୍ତି । ସେପଟେ ଅନ୍ୟତମ ଦାବିଦାର ରାଜା ନାରାୟଣ ମହାପାତ୍ର, ବର୍ଷାଙ୍କୁ ସହଯୋଗ କରିବାକୁ ପ୍ରତିଶ୍ରୁତି ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୋମବାର ବିଧାୟକ ତଥା ଟିକେଟ ଆଶାୟୀ ଅମର ଶତପଥୀଙ୍କୁ ବର୍ଷା ଭେଟିବା ପରେ ଶଂଖ ଭବନରେ ବଡଚଣା ଦଖଲ ପାଇଁ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିଛି ଦଳ । ଟିକେଟକୁ ନେଇ ଆଶାୟୀ ଓ ସେମାନଙ୍କ ସମର୍ଥକଙ୍କ ଭିତରେ ଥିବା ମନୋମାଳିନ୍ୟକୁ ପଛରେ ପକାଇ ବର୍ଷାଙ୍କୁ କେମିତି ବିପୁଳ ଭୋଟରେ ବିଜୟୀ କରାଯିବ ସେଥିପାଇଁ ଆଲୋଚନା ହୋଇଛି । ଅମର ଶତପଥୀଙ୍କ ସମର୍ଥକ ଓ ସହଯୋଗୀଙ୍କୁ ଡାକି ଶଂଖ ଭବନରେ ଦଳ ବୁଝା ଯାଇଛି । ଆଉ ବର୍ଷାଙ୍କୁ ସହଯୋଗ କରିବା ପାଇଁ କୁହାଯାଇଛି । ଟିକେଟ ଆଶାୟୀ ଥିବା ରାଜନାରାୟଣ ମହାପାତ୍ର ମଧ୍ୟ ଏହି ବୈଠକରେ ସାମିଲ ହୋଇଥିଲେ । କିନ୍ତୁ ଅମର ଶତପଥୀ ବୈଠକକୁ ଆସିନଥିଲେ । ତେବେ ବୈଠକରେ ଯୋଗ ଦେଇଥିବା ନେତା ବର୍ଷାଙ୍କୁ ସହଯୋଗ କରିବାକୁ ପ୍ରତିଶ୍ରୁତି ଦେଇଛନ୍ତି ।
ସମସ୍ତଙ୍କୁ ସରପ୍ରାଇଜ୍ ଦେଇ ବର୍ଷାଙ୍କୁ ବଡଚଣାରୁ ବିଜେଡି ପ୍ରାର୍ଥୀ କରିବା ପରେ ଅମର ଶତପଥୀଙ୍କ ଆଭିମୁଖ୍ୟ ଉପରେ ସମସ୍ତଙ୍କ ନଜର ରହିଛି । ବର୍ଷାଙ୍କ ସାଥୀରେ ରହିବେ ନା ବିଦ୍ରୋହୀ ବନିବେ? ଅମରଙ୍କ ନିର୍ଦ୍ଦେଶକୁ ତାଙ୍କ ସମର୍ଥକମାନେ ଅପେକ୍ଷା କରିଛନ୍ତି । ଏସବୁ ଭିତରେ ଅମର ଶତପଥୀ ପ୍ରତିକ୍ରିୟା ରଖି କହିଛନ୍ତି, ସେ ଅନ୍ୟ ଦଳକୁ ଯିବାର ନାହିଁ କି ନିର୍ବାଚନ ଲଢ଼ିନେ ନାହିଁ ।
୨୦୧୯ରେ ହାରୁ ହାରୁ ଜିତିଥିଲେ ଅମର ଶତପଥୀ । ଆଉ ଅମରଙ୍କୁ ଟକ୍କର ଦେଇଥିବା ବିଜେପିର ଅମର ନାୟକ ଏବେ ମଇଦାନରେ । ତାଙ୍କୁ ପୁଣି ଥରେ ବଡଚଣାରୁ ବିଜେପି ବିଧାନସଭା ପ୍ରାର୍ଥୀ କରିଛି । ଏହି ଆସନକୁ ଦଖଲ କରିବା ପାଇଁ ବିଜେପି ଜୋରଦାର ଲଢ଼େଇ କରିବ । ତେଣୁ ବିଜେଡି ଅମର ଶତପଥୀଙ୍କ ସ୍ଥାନରେ ବର୍ଷାଙ୍କୁ ଟିକେଟ ଦେଇ ଯେଉଁ ଏକ୍ସପେରିମେଂଟ କରିଛି ତାହା କେତେ ସଫଳ ହେଉଛି, ତା ଉପରେ ସାରା ଓଡିଶାର ନଜର ରହିଛି ।