ବୋରୱେଲ ଭିତରେ ପଡି ଅଢେଇ ବର୍ଷର ଝିଅ ସୃଷ୍ଟି କୁଶୱାର ମୃତ୍ୟୁ, ବିହାରରେ ପୋଲ ପିଲର ଭିତରେ ଫସିଥିବା ୧୨ ବର୍ଷର ବାଳକର ମୃତଦେହ ଉଦ୍ଧାର
କନକ ବ୍ୟୁରୋ : ବଞ୍ଚିପାରିଲେନି ସୃଷ୍ଟି । ବୋରୱେଲରେ ଦୀର୍ଘ ଘଂଟା ଫସି ରହିବା ପରେ ଆଜି ଉଦ୍ଧାର ହୋଇଥିଲେ କିନ୍ତୁ ଅଢ଼େଇବର୍ଷର ଶିଶୁକନ୍ୟାଟିର ମୃତ୍ୟୁ ଘଟିଛି । ମଧ୍ୟପ୍ରଦେଶ ବୋରୱେଲରେ ଫସିରହିଥିଲା ଏହି ଅଢ଼େଇବର୍ଷର ଶିଶୁ କନ୍ୟା । ତିନିଶହ ଫୁଟର ବୋରୱେଲରେ ଫସିଥିବା ସୃଷ୍ଟିକୁ ଦୀର୍ଘ ୫୫ ଘଂଟା ପରେ ରୋବୋଟିକ ଟିମ ସହାୟତାରେ ଉଦ୍ଧାର କରାଯାଇଥିଲା । ଉଦ୍ଧାର ପରେ ସିହୋର ଜିଲ୍ଲା ହସ୍ପିଟାଲକୁ ସ୍ଥାନାନ୍ତର ହେବାବେଳେ ଶିଶୁ କନ୍ୟାର ମୃତ୍ୟୁ ଘଟିଛି । ଘଟଣାସ୍ଥଳରେ ଏନଡ଼ିଆରଏଫ, ଏସଡ଼ିଆରଏଫ ଓ ସେନା ନିୟୋଜିତ ହୋଇଥିବାବେଳେ ଗୁରୁବାର ରୋବୋଟିକ ଏକ୍ସପର୍ଟ ଟିମ୍ ପହଁଥିଲେ । ମଙ୍ଗଳବାର ଅପରାହ୍ନ ସମୟରେ ମଧ୍ୟପ୍ରଦେଶ ସିହୋର ଜିଲ୍ଲା ମୁଗାବଲି ଗାଁରେ ପାଖ କ୍ଷେତରେ ଝିଅଟି ଖେଳୁଥିବାବେଳେ ବୋରୱେଲରେ ଖସିପଡ଼ିଥିଲା ।
Kanak News is now on WhatsApp
Join and get latest news updates delivered to you via WhatsApp
ସେପଟେ ବହୁ ସମୟ ଧରି ପୋଲର ଦୁଇ ପିଲର୍ ମଝିରେ ଫସିରହିଥିବା ବାଳକ ରଂଜନ କୁମାର ଉଦ୍ଧାର ହେଲା । କିନ୍ତୁ ବାଳକଟିକୁ ସ୍ଥାନୀୟ ଶାଶାରାମ ହସ୍ପିଟାଲକୁ ସ୍ଥାନାନ୍ତର ବେଳେ ମୃତ୍ୟୁ ଘଟିଛି । ଉଦ୍ଧାର ବେଳେ ଏହି ୧୨ ବର୍ଷ ବାଳକଟିର ଅବସ୍ଥା ଭଲ ନଥିଲା । ବିହାରର ରୋହତାସ ଜିଲ୍ଲାରେ ଏକ ପୋଲର ଦୁଇ ପିଲାର ମଝିରେ ଫସିଥିଲା ରଂଜନ । ଉଦ୍ଧାର କରିବା ପାଇଁ ଗତ ୨୦ ଘଂଟାରୁ ଉଦ୍ଧ୍ୱର୍ ସମୟ ଲାଗିଥିଲା । ଏନଡିଆରଏଫ୍ ଓ ସ୍ଥାନୀୟ ପ୍ରଶାସନର ମିଳିତ ସହଯୋଗରେ ଉଦ୍ଧାର କାର୍ଯ୍ୟ ହୋଇଥିଲା । ଯେଉଁଠି ୧୨ ବର୍ଷୀୟ ନାବାଳକ ବୁଧବାର ସକାଳୁ ନିଖୋଜ ହୋଇଥିଲା । ଏହି ପିଲା ମାନସିକ ଅନଗ୍ରସର ହୋଇଥିବାବେଳେ ହଠାତ୍ ଘରଲୋକଙ୍କ ନଜରରୁ ଗାଏବ ହୋଇଯାଇଥିଲା । ଘର ଲୋକ ଖୋଜାଖୋଜି କରିବାବେଳେ ଜାଣିବାକୁ ପାଇଲେ ବାଳକଟି ପୋଲର ପିଲର ମଝିରେ ଫସିଯାଇଛି । ଜଣେ ମହିଳା ପୋଲ ପାଖରେ ରଂଜନର କାନ୍ଦ ଶବ୍ଦ ଶୁଣିବାକୁ ପାଇଥିଲେ । ଏହାପରେ ପିଲାଟି ପୋଲ ମଝିରେ ଫସିଥିବା କଥା ସେମାନଙ୍କ ଘର ଲୋକଙ୍କୁ ଜଣାଇଥିଲେ ।