ବ୍ରହ୍ମପୁର ଗେଟାସାହି ବସ୍ତିରେ ଅଗ୍ନିକାଣ୍ଡର ୩ ଦିନ ପରର ଘଟଣା : ଶୀତୁଆ ରାତିରେ ପଲିଥିନ୍ ତଳେ କଟୁଛି ବସ୍ତିବାସିନ୍ଦାଙ୍କ ଦିନ
କନକ ବ୍ୟୁରୋ : ବିପଦ ସିନା ଟଳିଗଲା, ହେଲେ ଛାଡ଼ି ଦେଇଗଲା ଯନ୍ତ୍ରଣା । ଜଳି ପୋଡ଼ି ପାଉଁଶ ହୋଇଗଲା, ମୁଣ୍ଡ ଗୁଂଜିବାକୁ ଥିବା ଏକମାତ୍ର ଭରସା । ଆଉ ଏବେ ଆଶ୍ରା କହିଲେ, କେଇ ଖଣ୍ଡ ପଲିଥିନ୍ । ଯେଉଁଠି ହାଡ଼ ଭଙ୍ଗା ଶୀତରେ ଅତି ଦୟନୀୟ ଭାବରେ କଟୁଛି ଦିନ । ଆଖି ଆଗରେ ଚାହୁଁଚାହୁଁ ଜଳିଗଲା ଦୀର୍ଘ ୨୫ ବର୍ଷ ପୁରୁଣା ବସ୍ତି । ତାସହ ଛାରଖାର ହୋଇଗଲା ଅନେକ ସ୍ୱପ୍ନ । ବ୍ରହ୍ମପୁର ଗେଟାସାହି ବସ୍ତିରେ ଅଗ୍ନିକାଣ୍ଡ ପରେ ଇଏ ହେଉଛି ବସ୍ତିବାସିନ୍ଦାଙ୍କ ସ୍ଥିତି ।ଅଗ୍ନିକାଣ୍ଡ ପରେ ଧାଇଁ ଆସିଲେ ସରକାରୀ ବାବୁମାନେ, ଆଉ କେଇଖଣ୍ଡ ପଲିଥିନ୍ ଦେଇ ସତେ ଯେମିତି ଏମାନଙ୍କୁ ଭୁଲି ଯାଇଛି ପ୍ରଶାସନ ।
Kanak News is now on WhatsApp
Join and get latest news updates delivered to you via WhatsApp
ପିଲା, ଛୁଆ, ବୁଢ଼ା ସମସ୍ତଙ୍କୁ ନେଇ ଧରି ଏହି ଅସହ୍ୟ ଶୀତିରେ ବହୁ କଷ୍ଟରେ ବିତୁଛି ଏମାନଙ୍କ ସମୟ । ଆଉ ଏଭଳି ସ୍ଥିତିରେ କିଛି ଯୁବ ସଂଗଠନ, ବିପଦ ବେଳାର ବନ୍ଧୁ ସାଜି ଆଗେଇ ଆସିଛନ୍ତି । ବସ୍ତିବାସିନ୍ଦାଙ୍କୁ ଘର ଯୋଗାଇ ଦେବା ପାଇଁ ୪ ବର୍ଷ ତଳେ ନିଷ୍ପତ୍ତି ହୋଇଥିଲା । ହେଲେ ଏଯାଏଁ ଏମାନଙ୍କ ପାଇଁ ଘର ନିର୍ମାଣ ହୋଇପାରିଲା ନା ଘର ମିଳିଲା । ଆଉ ଠିକ୍ ଏମିତି ବେଳେ ଦାଉ ସାଧିଲା ବିପର୍ଯ୍ୟୟ ।