ଅଡୁଆରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ, ସରକାରୀ ବଙ୍ଗଳା ମରାମତି ମାମଲାରେ ଯାଂଚ କରିବ ସିଏଜି
କନକ ବ୍ୟୁରୋ : ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସରକାରୀ ବାସଭବନ ମରାମତି ମାମଲାରେ ଏବେ ସିଏଜି ଯାଂଚ କରିବ । କଥିତ ଅନିୟମିତତା ଓ ନିୟମର ଉଲଙ୍ଘନ ଉପରେ ବିଶେଷ ଯାଂଚ ହେବ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ଦିଲ୍ଲୀ ଉପ ରାଜ୍ୟପାଳ ବି.କେ ସକସେନାଙ୍କ କାର୍ଯ୍ୟାଳୟ ତରଫରୁ ମେ ୨୪ ତାରିଖରେ କେନ୍ଦ୍ର ଗୃହମନ୍ତ୍ରଣାଳୟକୁ ଏକ ଚିଠି ଲେଖାଯାଇଥିଲା । ଏଥିରେ ସିଏଜି ଦ୍ୱାରା ବିଶେଷ ଯାଂଚ କରିବାକୁ ସୁପାରିଶ କରାଯାଇଥିଲା । ଚିଠିରେ ଅଭିଯୋଗ ରହିଥିଲା କି ପ୍ରାଥମିକ ସ୍ତରରେ ମୁଖ୍ୟମନ୍ତ୍ରୀ ଆବାସ ପୁନଃନିର୍ମାଣ ଓ ମରାମତି ନାମରେ ଆଇନର ଉଲଙ୍ଘନ କରାଯାଇଛି । ଏହାସହ ଆର୍ଥିକ ଅନିୟମିତତା ହୋଇଥିବା କଥା ମଧ୍ୟ ଚିଠିରେ ଉଲ୍ଲେଖ ରହିଥିଲା ।
ଏହି ସୁପାରିଶ ପରେ କେନ୍ଦ୍ର ଗୃହମନ୍ତ୍ରଣାଳୟ ଏହି ମାମଲାର ଯାଂଚ ପାଇଁ ସିଏଜିଙ୍କ ନିକଟକୁ ପଠାଇ ଦେଇଥିଲେ । ଏବେ ଦିଲ୍ଲୀ ସ୍ଥିତ ସିଭିଲ ଲାଇନ୍ସ-୬ ଫ୍ଲାଗ ଷ୍ଟକ ରୋଡ ସ୍ଥିତ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ସରକାରୀ ବାସଭବନ ସହିତ ଜଡିତ ମାମଲାରେ ସିଏଜି ବିଶେଷ ଯାଂଚ କରିବ ।
ସୂଚନା ଥାଉକି ମୁଖ୍ୟମନ୍ତ୍ରୀ ଆବାସ ପୁନଃନିର୍ମାଣ ମାମଲାରେ ବିଜେପି ଅନେକ ଅଭିଯୋଗ ଆଣିଥିଲା । ବିଜେପି ତରଫରୁ ଅଭିଯୋଗ କରାଯାଇଥିଲା କି ପିଡବ୍ଲ୍ୟୁର ବିନା ଅନୁମତିରେ ୭.୬୨ କୋଟି ଟଙ୍କା ବଜେଟକୁ ୩୩.୨୦ କୋଟି ଟଙ୍କାକୁ ବୃଦ୍ଧି କରି ଏହି ଆବାସର ପୁନଃନିର୍ମାଣ କରାଯାଇଛି । ଏହାସହ ଏହି ବଙ୍ଗଳା ପାଇଁ କିଣାଯାଇଥିବା ପ୍ରତିଟି କାର୍ପେଟର ଦାମ ୭.୯୪ ଲକ୍ଷ ଟଙ୍କା ।
ବିଜେପିର ଏଭଳି ଅଭିଯୋଗ ଉପରେ ଜବାବ ରଖିଥିଲା ଆପ୍ । ଆପ୍ ର ରାଜ୍ୟସଭା ସାଂସଦ ସଂଜୟ ସିଂ କହିଥିଲେ କି ଲୋକଙ୍କ ଧ୍ୟାନ ମୁ୍ଖ୍ୟ ପ୍ରସଙ୍ଗରୁ ହଟାଇବାକୁ ଏଭଳି ବିବାଦ ତିଆରି କରାଯାଇଛି । ସେପଟେ ପୂରା ମାମଲାରେ ଦିଲ୍ଲୀ ଉପ ରାଜ୍ୟପାଳ ଦିଲ୍ଲୀ ମୁଖ୍ୟ ସଚିବଙ୍କୁ ରିପୋର୍ଟ ମାଗିଥିଲେ । ଏହି କ୍ରମରେ ମୁଖ୍ୟ ସଚିବ ରିପୋର୍ଟର ପ୍ରଥମଭାଗ ଏପ୍ରିଲ ୨୭ ତାରିଖ ଓ ଦ୍ୱିତୀୟ ଭାଗ ମେ’୧୨ ତାରିଖରେ ଉପରାଜ୍ୟପାଳଙ୍କ ସଚିବାଳୟକୁ ପଠାଇଥିଲେ ।