ଅଖିଳେଶଙ୍କ ବୟାନକୁ ନେଇ ଏବେ ଉତ୍ତର ପ୍ରଦେଶ ରାଜନୀତି ସରଗରମ, “କେଶବ ମୌର୍ଯ୍ୟଙ୍କୁ ମୁଁ ମୁଖ୍ୟମନ୍ତ୍ରୀ କରିଦେବି”
କନକ ବ୍ୟୁରୋ : ମହାରାଷ୍ଟ୍ର, ବିହାର ପରେ ଏବେ ଉତ୍ତର ପ୍ରଦେଶରେ ଭାଙ୍ଗିବ କି ଯୋଗୀଙ୍କ ସରକାର । ଏନେଇ ଅଖିଳେଶ ଯାଦବ ସଂକେତ ଦେବା ପରେ ଏବେ ୟୁପି ରାଜନୀତି ସରଗରମ ହେବାରେ ଲାଗିଛି ।
Kanak News is now on WhatsApp
Join and get latest news updates delivered to you via WhatsApp
ଏକ ଗଣମାଧ୍ୟମକୁ ସାକ୍ଷାତକାର ଦେବା ଅବସରରେ ଅଖିଳେଶ ଯାଦବ କହିଛନ୍ତି କି, ଯୋଗୀଙ୍କ ସରକାରରେ ଉପ ମୁଖ୍ୟମନ୍ତ୍ରୀ ଥିବା କେଶବ ପ୍ରସାଦ ମୌର୍ଯ୍ୟ ଜଣେ ଦୁର୍ବଳ ମାନସିକତାର ନେତା । ସେ ୨୦୧୭ ମସିହାରୁ ମୁଖ୍ୟମନ୍ତ୍ରୀ ହେବାର ସ୍ୱପ୍ନ ଦେଖୁଛନ୍ତି । ହେଲେ ସେ ଯଦି ବିଜେପିର ୧୦୦ ବିଧାୟକଙ୍କୁ ଆଣିପାରିବେ ତେବେ ସମାଜବାଦୀ ପାର୍ଟି ସମର୍ଥରେ ତାଙ୍କୁ ମୁଖ୍ୟମନ୍ତ୍ରୀ ଆସନ ମିଳିଯିବ । ସେ ବିହାର ଓ ମହାରାଷ୍ଟ୍ରର ଉଦାହରଣ ମଧ୍ୟ ଦେଇଛନ୍ତି । ସେ କହିଛନ୍ତି କି ମହାରାଷ୍ଟ୍ର ଓ ବିହାରରେ ଯଦି ସମ୍ଭବ ତେବେ ଉତ୍ତର ପ୍ରଦେଶରେ କାହିଁକି ନୁହେଁ । ସେ କେଶବଙ୍କ ଆହ୍ୱାନ ଦେଇ କହିଛନ୍ତି କି ଯଦି କେଶବଙ୍କ ପାଖରେ ୧୦୦ ବିଧାୟକ ଅଛନ୍ତି ତେବେ ସେ ସେମାନଙ୍କର ସମର୍ଥନ ଧରି ଆସନ୍ତୁ ଓ ରାଜ୍ୟର ମୁଖ୍ୟମନ୍ତ୍ରୀ ହୁଅନ୍ତୁ ।
ଅଖିଳେଶଙ୍କ ଏଭଳି ବୟାନ ପରେ ନିଜେ ପ୍ରତିକ୍ରିୟା ରଖିଛନ୍ତି କେଶବ ମୌର୍ଯ୍ୟ । ସେ କହିଛନ୍ତି କି, ଅଖିଳେଶ ଯାଦବ ନିଜେ ମୋତେ ଘୃଣା କରନ୍ତି । ଅଖିଳେଶ ମୋତେ କେତେ ଭଲ ପାଆନ୍ତି ତାହା ବିଧାନସଭା ଭିତରେ ସମସ୍ତେ ଦେଖିଛନ୍ତି । ଅଖିଳେଶ ଯାଦବ ନିଜେ ତ ବୁଡି ଯାଇଛନ୍ତି ସେ କଣ ମୋତେ ମୁଖ୍ୟମନ୍ତ୍ରୀ କରିବେ ବୋଲି କେଶବ ପ୍ରଶ୍ନ ପଚାରିଛନ୍ତି ।
ସେପଟେ ଯଦି ବିଧାନସଭା ଆସନ କଥା ଚିନ୍ତା କରାଯିବ ତେବେ ଯୋଗୀ ସରକାରଙ୍କ ପାଖରେ ୨୭୨ ବିଧାୟକଙ୍କ ସମର୍ଥନ ରହିଛି । ଯାହାକି ବହୁମତ ଠାରୁ ବହୁ ଅଧିକ । ଅନ୍ୟପଟେ ସମାଜବାଦୀ ପାର୍ଟି ମେଣ୍ଟ ପାଖରେ ରହିଛି ୧୧୯ ବିଧାୟକଙ୍କ ସମର୍ଥନ । ବିଜେପିର ନିଜ ବିଧାୟକଙ୍କ ସଂଖ୍ୟା ୨୫୪ ଓ ସମାଜବାଦୀ ପାର୍ଟିର ନିଜ ବିଧାୟକଙ୍କ ସଂଖ୍ୟା ୧୧୧ । ଏସବୁ ଭିତରେ ଯଦି ବି ୧୦୦ ଜଣ ବିଧାୟକ ଦଳ ଛାଡନ୍ତି ତେବେ ତାଙ୍କ ଉପରେ ଦଳ ପରିବର୍ତ୍ତନ କରିବା ଆଇନ ଲାଗୁହେବ ଓ ସେମାନଙ୍କ ବିଧାୟକ ପଦ ରଦ୍ଦ ହେବ । ହେଲେ କେଶବ ମୌର୍ଯ୍ୟ ଯଦି ୧୭୦ ଜଣ ବିଧାୟକଙ୍କ ସମର୍ଥନ ନେଇ ସମାଜବାଦୀ ପାର୍ଟି ସହିତ ମେଣ୍ଟ କରିବେ ତେବେ ଯୋଗୀ ସରକାର ଭାଙ୍ଗିବା ସହଜ ହେବ ।