ଗୋବିନ୍ଦଙ୍କ ମୃତ୍ୟୁ ପରେ ତେଜିଲା ରାଜନୀତି । ବିଜେପି କହିଲା, ଚାଲିଛି ସାକ୍ଷୀ ସଫା ଅଭିଯାନ
କନକ ବ୍ୟୁରୋ: ଗୋବିନ୍ଦଙ୍କ ଆତ୍ମହତ୍ୟା ପ୍ରସଙ୍ଗରେ ରାଜନୈତିକ ବୟାନବାଜି ବଢ଼ିଚାଲିଛି । ଆତ୍ମହତ୍ୟାକୁ ନେଇ ପ୍ରଶ୍ନ ଉଠାଇଛନ୍ତି ବିରୋଧୀ । କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା କହିଛନ୍ତି ଯେ, ହାଇକୋର୍ଟ ତତ୍ୱାବଧାନରେ ଏସଆଇଟି ତଦନ୍ତ କରାଯାଉ । ଅନ୍ୟପଟେ ବିଜେପି କହିଛି, ଗୋବିନ୍ଦଙ୍କ ମୃତ୍ୟୁ ଆତ୍ମହତ୍ୟା ନୁହେଁ, ବରଂ ଏକ ହତ୍ୟାକାଣ୍ଡ । ଆଉ ଏହାର ଜବାବରେ ବିଜେଡି କହିଛି, ଆଇନ୍ ତା ବାଟରେ ଯାଉଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ଗୋଟିଏ ଘଟଣା, ଆଉ ଗୋଟିଏ ଘଟଣାକୁ କେମିତି ପ୍ରଭାବିତ କରିପାରେ ତାହା ପୁଣି ଥରେ ଦେଖିବାକୁ ମିଳିଛି । ଯେତେବେଳେ ଗୋବିନ୍ଦ ସାହୁଙ୍କ ଆତ୍ମହତ୍ୟା ପରେ ଅର୍ଚ୍ଚନା ନାଗଙ୍କ ସୁରକ୍ଷା ନେଇ ପ୍ରଶ୍ନଚିହ୍ନ ଛିଡ଼ା କରିଛନ୍ତି ବିରୋଧୀ । ଯଦିଓ ଗୋବିନ୍ଦ ସାହୁଙ୍କ ଆତ୍ମହତ୍ୟା ଏବଂ ଅର୍ଚ୍ଚନା ନାଗଙ୍କ ଗିରଫଦାରୀ ଭିତରେ ସିଧାସଳଖ କୌଣସି ସମ୍ପର୍କ ନାହିଁ, ତଥାପି ଉଭୟ ଘଟଣାରେ ବଡ଼ ବଡ଼ ନେତା ଓ ପ୍ରଭାବଶାଳୀ ବ୍ୟକ୍ତିଙ୍କ ସଂପୃକ୍ତ ଥିବା ଅଭିଯୋଗ ରହିଛି । ଯାହାକି ବିରୋଧୀ କଂଗ୍ରେସଙ୍କୁ ପ୍ରଶ୍ନ ଉଠାଇବାରେ ଖୋରାକ୍ ଯୋଗାଇ ଦେଇଛି ।
- ‘ଅର୍ଚ୍ଚନା ନାଗଙ୍କ ପ୍ରତି ରହିଛି ବିପଦ’
- କଂଗ୍ରେସ ନେତାଙ୍କ ସାଂଘାତିକ ଅଭିଯୋଗ
- ‘ଜେଲ ଭିତରେ ସୁରକ୍ଷିତ ନୁହେଁ କଏଦୀ’
କଂଗ୍ରେସର ଏଭଳି ପ୍ରଶ୍ନଠାରୁ ଆଉ ଦୁଇପାଦ ଆଗକୁ ବଢ଼ିଯାଇ ବିଜେପି ଆଣିଛି ସାକ୍ଷୀ ସଫା ଅଭିଯାନ ଅଭିଯୋଗ । ଗୋବିନ୍ଦ ସାହୁଙ୍କ ଆତ୍ମହତ୍ୟା ଘଟଣା ସହ ଧର୍ମେନ୍ଦ୍ର ସାହୁଙ୍କ ଆତ୍ମହତ୍ୟା, ମାହାଙ୍ଗା ମର୍ଡର ମାମଲାରେ ଅଭିଯୁକ୍ତ ପ୍ରଫୁଲ୍ଲ ବିଶ୍ୱାଳଙ୍କ ଦୁର୍ଘଟଣାରେ ମୃତ୍ୟୁ, ଇତିଶ୍ରୀ ମୃତ୍ୟୁ ମାମଲାର ମୁଖ୍ୟ ଆସାମୀ ନେତ୍ରାନନ୍ଦ ଦଣ୍ଡସେନାଙ୍କ ମୃତ୍ୟୁ ଘଟଣାକୁ ଯୋଡ଼ି ଦେଇଛି ବିଜେପି । ଏମିତି କି ସାକ୍ଷୀ ସଫା ଅଭିଯାନ ବିରୋଧରେ ଦଳ ପ୍ରତିବାଦ କରିବ ବୋଲି କହିଛି ବିଜେପି । ଏପଟେ ଉଭୟ ବିଜେଡି ଓ ବିଜେପିକୁ କାଉଣ୍ଟର କରିବାକୁ ଉଦ୍ୟମ କରିଛି ବିଜେଡି ।
ଜେଲ ଭିତରେ ଗୋବନ୍ଦ ସାହୁଙ୍କ ମୃତ୍ୟୁ ପ୍ରସଙ୍ଗକୁ ନେଇ କେବଳ ଯେ, ରାଜନୈତିକ ଦଳଙ୍କ ମନରେ ସନ୍ଦେହ ଆସୁଛି ତାହା ନୁହେଁ । ସମାନ ଢ଼ଙ୍ଗରେ ଆଶଙ୍କା ସୃଷ୍ଟି କରୁଛନ୍ତି, ମମିତା ମେହେର ହତ୍ୟାକାଣ୍ଡରେ ଗିରଫ ହୋଇଥିବା ରାଧେ ଚଣ୍ଡିଙ୍କ ପରିବାର । ରାଧେ ଚଣ୍ଡି, ମମିତା ଘଟଣାରେ ଗୋବିନ୍ଦଙ୍କୁ ସହଯୋଗ କରିଥିଲେ । ତେବେ ରାଧେ ଚଣ୍ଡିଙ୍କ ସ୍ତ୍ରୀ ଏବଂ ବାପା, ମଧ୍ୟ ଜେଲର ସୁରକ୍ଷା ବ୍ୟବସ୍ଥାକୁ ନେଇ ଭୟଭୀତ ଥିବା କହିଛନ୍ତି । ଏସବୁ ଭିତରେ ଦେଖିବାର କଥା ଗୋବିନ୍ଦ ସାହୁଙ୍କ ଆତ୍ମହତ୍ୟା ଘଟଣାକୁ ନେଇ ହେଉଥିବା ବୟାନବାଜୀ ଓ ରାଜନୀତି ଆଗକୁ କେଉଁ ଢ଼ଙ୍ଗରେ ସାମ୍ନାକୁ ଆସୁଛି ।