କନକ ବ୍ୟୁରୋ: ୟୁଟ୍ୟୁବ ଦେଖାଇଛି ରୋଜଗାରର ରାସ୍ତା । ଥଇଲାଣ୍ଡ ବରକୋଳି ଏବଂ କାଶ୍ମୀର ଆପଲ ବେରି ଚାଷ କରି ସ୍ୱାବଲମ୍ବୀ ହୋଇଛନ୍ତି ଏମସିଏ ଛାତ୍ର । ବାର୍ଷିକ ୫ରୁ ୬ଲକ୍ଷ ଟଙ୍କା ରୋଜଗାର କରି ଅନ୍ୟ ଶିକ୍ଷିତ ଯୁବକଙ୍କ ପାଇଁ ସାଜିଛନ୍ତି ପ୍ରେରଣା । ବାଲେଶ୍ୱର ଜଳେଶ୍ୱର ବ୍ଲକ ହାତୀଗଡର ଏମସିଏ ଛାତ୍ର ଚନ୍ଦନ ଖଟୁଆ ଏମସିଏ ପାଠ ପଢିବା ପରେ ଏକ ଘରୋଇ କମ୍ପାନୀରେ ଚାକିରୀ କରିଥିଲେ । ସେଥିରେ ପରିବାର ପ୍ରତିପୋଷଣ କରିବା କଷ୍ଟକର ହେଉଥିଲା । ତେଣୁ ନିଜସ୍ୱ ଉଦ୍ୟମରେ ଏକ ଏକର ଜମିରେ ୩ଶହ ଥାଇଲାଣ୍ଡ ବରକୋଳି ଓ ୩ଶହ କାଶ୍ମୀର ଆପଲ ବେରି ଗଛ ଲଗାଇଛନ୍ତି । ଗଛ ଲଗାଇବାର ୬ ମାସ ପରେ ଗଛରେ ଫଳ ଧରିବା ଆରମ୍ଭ ହୋଇଛି । ଗୋଟିଏ ଗୋଟିଏ ଗଛରୁ ୨୦ କିଲୋରୁ ଅଧିକ ଫଳ ଫଳିଛି । ଏହି ଚାଷ ପାଇଁ ୨ଲକ୍ଷ ଟଙ୍କା ଖର୍ଚ୍ଚ ହୋଇଥିବା କୁହନ୍ତି ଚନ୍ଦନ ।
Kanak News is now on WhatsApp
Join and get latest news updates delivered to you via WhatsApp
ସେହିପରି ଗଜପତି ଜିଲ୍ଲା ମୋହନା ଅଂଚଳରେ ରହୁଥିବା ତିବତୀୟ ପରିବାର କଲିକତାରୁ ଆପଲ ବେରି ଚାରା ଆଣି ନିଜ ଜମିରେ ରୋପଣ କରିଛନ୍ତି । ପାଖାପାଖି ୧୧ ଶହ ଗଛ ଲଗାଇଥିବା ବେଳେ ଖର୍ଚ୍ଚ ହୋଇଛି ୬ ଲକ୍ଷ ଟଙ୍କା । ଗଛରେ ଫଳ ଆସିଥିବା ବେଳେ ଭଲ ରୋଜଗାରର ଆଶା ରଖିଛନ୍ତି ଏହି ଦମ୍ପତି । ସେହିପରି ମୋହନା ଗୋବିନ୍ଦପୁର ଅଂଚଳର ଆଦିବାସୀ ଯୁବକ ରମେଶ ମଲ୍ଲିକ ପ୍ରାୟ ୪ଏକର ଜମିରେ ୧ ହଜାର ଗଛ ଲଗାଇଛନ୍ତି । ୟୁଟ୍ୟୁବରୁ ଚାଷ ସମ୍ପର୍କରେ ସୂଚନା ପାଇବା ପରେ ଜଣେ ବନ୍ଧୁଙ୍କ ଠାରୁ ପରାମର୍ଶ ନେଇ ଆପଲ ବେରି ଚାଷ କରିଛନ୍ତି ।
ଏକ କେଜି କାଶ୍ମୀର ଆପଲ ବେରି ୬୦ରୁ ୭୦ଟଙ୍କାରେ ବିକ୍ରି ହେଉଥିବା ବେଳେ ବରକୋଳି ୫୦ରୁ ୬୦ ଟଙ୍କାରେ ବିକ୍ରି ହେଉଛି । ବ୍ୟବସାୟୀ ମାନେ ବଜାରରେ ୯୦ରୁ ୧୦୦ ଟଙ୍କା ଦରରେ ବିକ୍ରି କରୁଛନ୍ତି । ଉତ୍ପାଦିତ କୋଳିକୁ ସ୍ଥାନୀୟ ବଜାର ସହ ପଡ଼ୋଶୀ ପଶ୍ଚିମବଙ୍ଗକୁ ମଧ୍ୟ ରପ୍ତାନୀ କରୁଛନ୍ତି ଚନ୍ଦନ ।