ସ୍ୱାଧୀନତାର ୭୦ବର୍ଷ ! ଉନ୍ନତିର ଚେହେରାରେ ଲାଗିଛି ଦୁର୍ନୀତିର ଦାଗ
ପ୍ରାୟ ୨୦୦ବର୍ଷର ଗୋଲାମୀ ପରେ ଅଗଷ୍ଟ ୧୫, ୧୯୪୭ ଦିନ ଉଇଁଥିଲା ସ୍ୱାଧୀନତାର ପ୍ରଥମ ସୂର୍ଯ୍ୟ । ସ୍ୱାଧୀନ ଦେଶରେ ସ୍ୱାଧୀନ ଭାବରେ ପ୍ରଥମ ଥର ନିଶ୍ୱାସ ନେଇଥିଲେ ଦେଶବାସୀ । ତେବେ ସ୍ୱାଧୀନତା ପଛରେ ଅଛି ଅନେକ ଅଜ୍ଞାତ ଲୋକଙ୍କ ଆତ୍ମବଳୀଦାନ । ସ୍ୱାଧୀନ ଭାରତର ପ୍ରଥମ ପ୍ରଧାନମନ୍ତ୍ରୀ ଜବାହରଲାଲ୍ ନେହରୁ ନିଜର ପ୍ରଥମ ସମ୍ବୋଧନରେ ଦେଶବାସୀଙ୍କୁ କହିଥିଲେ, ଆମକୁ ସେ ସମସ୍ତ ବନ୍ଧନକୁ ଭାଙ୍ଗି ଆଗକୁ ଯିବାକୁ ପଡିବ ଯାହା ପାଇଁ ମହାନ ଭାରତ ଗୋଲାମୀର ବେଡିରେ ବନ୍ଧା ପଡିଥିଲା ।
Kanak News is now on WhatsApp
Join and get latest news updates delivered to you via WhatsApp
ତେବେ ୧୯୪୭ ରୁ ୨୦୧୭ ପର୍ଯ୍ୟନ୍ତ ଭାରତୀୟ ଲୋକତନ୍ତ୍ରର ଯାତ୍ରା ଯେଉଁଠି ଦେଶର କ୍ଷମତା ଏବଂ ଶକ୍ତିକୁ ପ୍ରଦର୍ଶନ କରୁଛି ସେଇଛି ଉନ୍ନତିର ଚେହେରାରେ ଦୁର୍ନୀତିର ଏମିତି କିଛି ଦାଗ ଲାଗିଛି ଯାହା ଭାବିବାକୁ ବାଧ୍ୟ କରୁଛି । ଏଥିରେ ଦ୍ୱିମତ ନାହିଁ ଯେ ବିକାଶ ଆଡକୁ ଦେଶ ଦ୍ରୁତଗତିରେ ବଢିଚାଲିଛି । କିନ୍ତୁ ସମୟ ସମୟରେ ଏମିତି କିଛି ମାମଲା ଆସୁଛି ଯେଉଁଥି ପାଇଁ ବିକାଶରେ ଲାଗି ଯାଉଛି ବ୍ରେକ୍ । ଦେଶ ସ୍ୱାଧୀନ ହେବା ପରଠାରୁ ଆଜି ଯାଏଁ ଘୋଟାଲା ଏବଂ ଦୁର୍ନୀତିର ଏକ ଲମ୍ବା ତାଲିକା ସହ ଲମ୍ବା କାହାଣୀ ମଧ୍ୟ ରହିଛି । କିନ୍ତୁ ଆମେ ଦୁର୍ନୀତିର ଏମିତି କିଛି ଦାଗ ବିଷୟରେ କହିବୁ ଯାହା ଭାରତକୁ ଲଜ୍ଜିତ କରିଛି ।
କୋଇଲା ଘୋଟାଲା : ଏହି ଘୋଟାଲାରେ କୋଇଲା ଖଣିକୁ ଭୁଲ୍ ଭାବରେ ଆବଂଟନ କରାଯାଇଥିଲା । ବିନା କୌଣସି ନୀତି ନିୟମରେ କୋଇଲା ଖଣିର ନିଲାମୀ କରାଯାଇଥିଲା ଯେଉଁଥିରେ ୧.୮୬ଲକ୍ଷ କୋଟି ଟଙ୍କାର କ୍ଷତି ହୋଇଥିଲା । ମନମୋହନ ସିଂହଙ୍କ ସରକାର ସମୟରେ ଏହି ଘୋଟାଲା ହୋଇଥିଲା ।
୨ ଜି ସ୍ପେକ୍ଟ୍ରମ୍ ଘୋଟାଲା : ଏହି ଘୋଟାଲା ଦେଶର ଅନ୍ୟତମ ବଡ଼ ଘୋଟାଲା ଥିଲା । ଏଥିରେ ୟୁନିଫାଏଡ୍ ଆକସେସ୍ ସର୍ଭିସ୍ ଲାଇସେନ୍ସର ଆବଂଟନ ହୋଇଥିଲା । ଏହି ସ୍କାମରେ ୧.୭୬ଲକ୍ଷ କୋଟି ଟଙ୍କା କ୍ଷତି ହୋଇଥିଲା । ୨ ଜି ଘୋଟାଲା କୋଇଲା ଘୋଟାଲାର ୫ବର୍ଷ ପୂର୍ବରୁ ହୋଇଥିଲା ।
ୱକଫ୍ ବୋର୍ଡ ଘୋଟାଲା : ଏହି ଘୋଟାଲାରେ କର୍ଣ୍ଣାଟକର ୱକଫ୍ ବୋର୍ଡ ଅଧୀନରେ ଥିବା ଜମି ଆବଂଟନରେ ବଡ ଧରଣର ସ୍କାମ୍ ହୋଇଥିଲା । ୱକଫ୍ ବୋର୍ଡ ଏକ ମୁସଲିମ୍ ଚାରିଟେବଲ୍ ଟ୍ରଷ୍ଟ୍ ଯାହା ଗରୀବ ମୁସଲମାନମାନଙ୍କୁ ସାହାଯ୍ୟ କରିଥାଏ । ତେବେ ଏକ ରିପୋର୍ଟରୁ ଜଣାପଡିଥିଲା ଯେ ପ୍ରାୟ ୫୦ପ୍ରତିଶତ ଜମି ଅସାଧୁ ଉପାୟରେ ସରକାରୀ କର୍ମଚାରୀ ହଡପ କରିନେଇଥିଲେ । ଏହି ଘୋଟାଲାରେ ପ୍ରାୟ ୧.୫ ରୁ ୨ ଲକ୍ଷ କୋଟି ପର୍ଯ୍ୟନ୍ତ କ୍ଷତି ହୋଇଥିଲା ।
କମନୱେଲଥ ଗେମ୍ ଘୋଟାଲା : ଭାରତ ଇତିହାସରେ ଏହାକୁ ଏକ ବଡ ଘୋଟାଲା ଭାବେ ହିସାବକୁ ନିଆଯାଏ । କମନୱେଲଥ ଗେମରେ ପ୍ରାୟ ୭୦ହଜାର କୋଟି ଲାଗିବାର ଥିଲା । କିନ୍ତୁ ମାତ୍ର ୫୦ ପ୍ରତିଶତ ହିଁ ଖେଳ ଏବଂ ଖେଳ ସମ୍ବନ୍ଧିତ ଗତିବିଧିରେ ଖର୍ଚ୍ଚ ହୋଇଥିଲା । କହିବାକୁ ଗଲେ ଏହାରି ମାଧ୍ୟମରେ ସିଧାସଳଖ ଲୁଟ୍ ହୋଇଥିଲା । ଯନ୍ତ୍ରାଂଶକୁ ପ୍ରକୃତ ମୂଲ୍ୟ ଠାରୁ ଦୁଇଗୁଣ ଅଧିକ ଦେଇ କିଣାଯାଇଥିଲା । ଆଉ ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି ଯେଉଁମାନେ ପ୍ରକୃତରେ ନଥିଲେ ସେମାନଙ୍କୁ ହିଁ ଏହି ଟଙ୍କା ଦିଆଯାଇଥିଲା ।
ତେଲଗୀ ଷ୍ଟାମ୍ପ୍ ଘୋଟାଲା : ଉପରୋକ୍ତ ସବୁ ଘୋଟାଲା ଠାରୁ ତେଲଗୀ ଘୋଟାଲା ଥିଲା ପୁରା ଅଲଗା । ଅବଦୁଲ୍ କରୀମ୍ ତେଲଗୀ ନାମକ ଜଣେ ବ୍ୟକ୍ତି ନକଲି ଟିକେଟ୍ ପେପର୍ କରିବାରେ ସିଦ୍ଧହସ୍ତ ଥିଲେ । ତେଲଗୀ ନକଲି ଷ୍ଟାମ୍ପ ପେପରକୁ ବ୍ୟାଙ୍କ ଏବଂ ଅନ୍ୟ କେତେକ ସଂସ୍ଥାକୁ ବିକ୍ରି କରିଥିଲେ । ତେଲଗୀର ନକଲି ଷ୍ଟାମ୍ପ ପେପର୍ ଭାରତର ପ୍ରାୟ ୧୨ଟି ରାଜ୍ୟରେ ପହଂଚିଯାଇଥିଲା । ଆକଳନ ଅନୁଯାୟୀ, ଏହି ନକଲି ଷ୍ଟାମ୍ପ ପେପର୍ ପାଇଁ ଦେଶର ଅର୍ଥବ୍ୟବସ୍ଥାକୁ ପ୍ରାୟ ୨୦ହଜାର କୋଟିର କ୍ଷତି ହୋଇଥିଲା ।
ସତ୍ୟମ୍ ସ୍କାମ୍ : ଭାରତର କର୍ପୋରେଟ୍ ଜଗତର ସବୁଠାରୁ ବଡ଼ ଘୋଟାଲା ଥିଲା ସତ୍ୟମ୍ ସ୍କାମ୍ । ଏଥିରେ ପ୍ରାୟ ୧୪ହଜାର କୋଟି ଟଙ୍କାର କ୍ଷତି ହୋଇଥିଲା । ସତ୍ୟମର ଚେୟାରମ୍ୟାନ୍ ରାମାଲିଙ୍ଗା ରାଜୁ ଏନେଇ ସମସ୍ତଙ୍କୁ ଅନ୍ଧାରରେ ରଖିଥିଲେ । ସତ୍ୟମରେ ନିବେଶ କରିଥିବା ସମସ୍ତ ସେୟାର୍ ହୋଲଡରଙ୍କୁ ଏହି ଘୋଟାଲା ଦୋହଲାଇ ଦେଇଥିଲା । ପରେ ସତ୍ୟମ୍ କମ୍ପାନୀକୁ ଟେକ୍ ମହିନ୍ଦ୍ରା କିଣି ନେଇଥିଲା ।
ବୋଫର୍ସ ତୋପ ଘୋଟାଲା : ୧୯୮୦ ଏବଂ ୯୦ ଦଶକରେ ହୋଇଥିବା ଏହି ଘୋଟାଲା ଦେଶର ଅନ୍ୟତମ ବଡ ଘୋଟାଲା ଥିଲା । ସ୍ୱିଡେନର ବୋଫର୍ସ ଏବି କମ୍ପାନୀ ଭାରତରେ ୧୫୫ ଏମଏମ୍ ତୋପର ବ୍ୟବସାୟ ପାଇଁ ରାଜନେତାମାନଙ୍କୁ ଲାଂଚ ଦେଇଥିଲା । ଏହି ଘୋଟାଲାରେ ଲାଂଚ ହିସାବରେ କମ୍ପାନୀ ୧କୋଟି ୬୦ଲକ୍ଷ ଡଲାର୍ କଂଗ୍ରେସ୍ ନେତା ଏବଂ ରାଜୀବ ଗାନ୍ଧୀଙ୍କୁ ଦେଇଥିବାର ଅଭିଯୋଗ ରହିଛି ।
ଚାରା ଘୋଟାଲା : ୧୯୯୬ରେ ହୋଇଥିବା ଏହି ଚାରା ଘୋଟାଲାରେ ୯୦୦କୋଟିର କ୍ଷତି ହୋଇଥିଲା ଯାହା ସେ ସମୟରେ ସବୁଠାରୁ ବଡ ପରିମାଣ ଥିଲା । ଏହି ଘୋଟାଲାରେ ମୁଖ୍ୟ ଅଭିଯୁକ୍ତ ଥିଲେ ବିହାରର ତତ୍କାଳୀନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବ । ଉପଯୁକ୍ତ ପ୍ରମାଣ ମିଳିବା ପରେ ଲାଲୁଙ୍କୁ ଜେଲ୍ ପଠାଇଦିଆଯାଇଥିଲା କିନ୍ତୁ ପରେ ସେ ଜାମିନରେ ମୁକୁଳିଥିଲେ । ଏବେ ବି ଏହି ମାମଲା ରାଂଚି ଅଦାଲତରେ ବିଚାରାଧୀନ ଅଛି ।
ହୱାଲା ସ୍କାଣ୍ଡଲ୍ : ନବେ ଦଶକର ଏହି ବଡ ସ୍କାମ ପୁରା ଦେଶବାସୀଙ୍କୁ ଆଚମ୍ବିତ କରିଥିଲା । କାରଣ ଯେଉଁମାନେ ସରକାର ଚଳାଉଥିଲେ ସେହିମାନେ ହିଁ ସିଧାସଳଖ ସଂପୃକ୍ତ ଥିଲେ ଏହି ସ୍କାଣ୍ଡାଲରେ । ଏହି ଘୋଟାଲା ୧୯୯୬ରେ ସାମ୍ନାକୁ ଆସିଥିଲା । ଅନେକ ନେତାଙ୍କ ବିରୋଧରେ ହୱାଲାର ଦଲାଲଙ୍କଠାରୁ ଲାଂଚ ନେଇଥିବାର ଅଭିଯୋଗ ଆସିଥିଲା । ଏପରିକି ଏଥି ସ୍କାମରେ ବିଜେପିର ବରିଷ୍ଠ ନେତା ଲାଲ୍ କୃଷ୍ଣ ଆଡଭାଣୀଙ୍କ ନାଁ ବି ସାମିଲ୍ ଥିଲା । ଅବଶ୍ୟ ଆଡଭାଣୀ ସାଂସଦ ପଦରୁ ଇସ୍ତଫା ଦେବା ସହ ଏହି ସ୍କାମରେ ନିର୍ଦ୍ଦୋଶ ସାବ୍ୟସ୍ତ ନହେବା ଯାଏ ନିର୍ବାଚନ ଲଢିବେନି ବୋଲି କହିଥିଲେ ।
ଷ୍ଟକ୍ ମାର୍କେଟ୍ : ୪୦୦୦ କୋଟିର ଷ୍ଟକ୍ ମାର୍କେଟ୍ ଘୋଟାଲା ପୁରା ଦେଶକୁ ଦୋହଲାଇ ଦେଇଥିଲା । ଯାହାକୁ ଭୁଲିବା କୌଣସି ବି ନିବେଶକଙ୍କ ପାଇଁ ଏକ ପ୍ରକାର ଅସମ୍ଭବ । ସେୟାର୍ ଦୁନିଆର ଦଲାଲ୍ ହର୍ଷଦ ମେହେତା ନିବେଶକଙ୍କ ସମସ୍ତ ଟଙ୍କାକୁ ବୁଡାଇଦେଇଥିଲା । ପୁଣି ଆଉ ଜଣେ ସେୟାର୍ ଦଲାଲ୍ ୧୨୦୦ କୋଟି ଏଫଡି ଏବଂ ମ୍ୟୁଚୁଆଲ୍ ଫଣ୍ଡ୍ ଟଙ୍କା ହଜମ କରିଦେଇଥିଲା । ସେହିପରି ଆଉ ଜଣେ ଦଲାଲ୍ କେତନ୍ ପାରେଖ୍ ପାଇଁ ସର୍କୁଲାର୍ ଟ୍ରେଡିଙ୍ଗର ୯୦୦ କୋଟି କ୍ଷତି ହୋଇଥିଲା ।