ଦୁଃଖ ଦେଇଗଲା ୩୬ ଘଣ୍ଟାର ନିଆଁ । ପୁରୀ ସମ୍ରାଟ୍ ମାର୍କେଟ କମ୍ପ୍ଲେକ୍ସ ନିଆଁ ଉଜାଡ଼ି ଦେଲା ରୋଜଗାର । ବ୍ୟବସାୟୀଙ୍କ ଆଖିରେ ଲୁହ
କନକ ବ୍ୟୁରୋ: ଅଘଟଣର ଅଗ୍ନିକାଣ୍ଡ ସିନା ଟଳି ଯାଇଛି, କିନ୍ତୁ ସାଥିରେ ନେଇ ଆସିଥିବା ସଙ୍କଟ ଏବେ ବି ଜଳଜଳ ହୋଇ ଦେଖାଯାଉଛି । ଯାହା କିଛି ଥିଲା, ଜଳିପୋଡ଼ି ଛାରଖାର୍ ହୋଇଯାଇଛି । ଜୀବିକା ଦେଉଥିବା ଦୋକାନ ଏବଂ ବଞ୍ଚିବାର ସୁଯୋଗ ଆଣିଥିବା ବ୍ୟବସାୟ, ଯେତେବେଳେ ଆଖି ଆଗରେ ଉଜୁଡ଼ି ଯାଇଛି, ଏହାକୁ ଦେଖି ଅଚାନକ୍ ଅଚେତ୍ ହୋଇପଡ଼ିଛନ୍ତି ପୂର୍ଣ୍ଣିମା ମହାନ୍ତି । ପୂର୍ଣ୍ଣିମା, ସମ୍ରାଟ୍ ମାର୍କେଟରେ ପାର୍ଲରଟିଏ କରିଥିଲେ । ୧୦ ଲକ୍ଷ ଟଙ୍କାର ନିବେଶ କରି, ୪ ଜଣଙ୍କୁ ନିଯୁକ୍ତ ବି ଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
କେବଳ ପୂର୍ଣ୍ଣିମା କାହିଁକି, ଏହି ମାର୍କେଟ୍ କମ୍ପ୍ଲେକ୍ସରେ ଦୋକାନ କରିଥିବା ୪୩ ଜଣ ବ୍ୟବସାୟୀଙ୍କ ମୁଣ୍ଡ ଉପରେ ପଡ଼ିଛି ଅଗ୍ନିକାଣ୍ଡର ଚଡ଼କ । କିଏ ଲକ୍ଷ ଲକ୍ଷ ଟଙ୍କାର ଲୋନ୍ କରି ଦୋକାନ କରିଥିଲେ ତ’ ଆଉ କିଏ ଟଙ୍କା ଯୋଗାଡ଼ କରି ଜୁଏଲାରୀ ଦୋକାନ କରିଥିଲେ । ହେଲେ ଅଗ୍ନିକାଣ୍ଡ ଯୋଗୁଁ ସବୁ କିଛି ପୋଡ଼ି ପାଉଁଶ ହୋଇଯାଇଛି ।
ଦୀର୍ଘ ୩୭ ଘଣ୍ଟାର ଅକ୍ଳାନ୍ତ ପରିଶ୍ରମ ପରେ ଲକ୍ଷ୍ମୀବଜାରରେ ଥିବା କମ୍ପ୍ଲେକ୍ସର ନିଆଁକୁ ଆୟତ୍ତ କରାଯାଇଛି । ଓଡ଼ିଶା ଇତିହାସରେ ସବୁଠାରୁ ଲମ୍ବା ସମୟ ଧରି ଚାଲିଥିବା ନିଆଁ ଲିଭା ଅପରେସନରେ ସାମିଲ୍ ହୋଇଥିଲେ- ୧୨ଟି ଦମକଳ ଗାଡ଼ି, ୨ଟି ଓଡ୍ରାଫ୍ ଟିମ୍, ୧୬୦ ଜଣ ଅଗ୍ନିଶମ କର୍ମଚାରୀ, ଗୋଟିଏ ଷ୍ଟ୍ରାଇକର ଟିମ୍ ଏବଂ ସୁରକ୍ଷା ପାଇଁ ନିୟୋଜିତ ହୋଇଥିଲେ ୨ ପ୍ଲାଟୁନ ଫୋର୍ସ ।
ତେବେ ନିଆଁ ଲଭାଇବା ସବୁଠାରୁ ବଡ଼ ଚ୍ୟାଲେଞ୍ଜ ଥିଲା । କାରଣ, ମାର୍କେଟ୍ କମ୍ପ୍ଲେକ୍ସର ତିନି ପଟରେ ପାଚେରୀ ରହିଛି । ସାମ୍ନାରେ ଥିବା ଦୋକାନ ଗୁଡିକର ସଟର ପଡ଼ିଥିଲା । ଦୋକାନ ମାଲିକ ଦୋକାନରେ ତାଲା ପକାଇଦେଇଥିଲେ । ଦୋକାନ ସଟର ଖୋଲିବା କଷ୍ଟକର ଥିଲା । ଦୋକାନୀ ସଟର ଖୋଲିବା ପାଇଁ ଆସିନଥିଲେ । ଦୋକାନରେ ଥିବା ସାମଗ୍ରୀ ଜଳିବାରେ ଲାଗିଥିଲା । ପ୍ଲାଷ୍ଟିକ୍, ଜୋତା ଓ କପଡା ସାମଗ୍ରୀ ଥିବାରୁ ଅଧିକ ଜଳିଥିଲା । ଅଣଓସାରିଆ ପ୍ରବେଶ ପଥ ବାଧକ ହୋଇଥିଲା । ଏଭଳି ସ୍ଥିତିରେ ନିଆଁକୁ ଆୟତ୍ତ କରିବା ବଡ଼ ଚ୍ୟାଲେଞ୍ଜ ଥିଲା ।
ଅନ୍ୟପଟେ ପୁରୀ ସହରର ଅଗ୍ନି ନିରାପତ୍ତା ବ୍ୟବସ୍ଥା ନେଇ ମାନବାଧିକାର କମିଶନ ନିକଟରେ ଫେରାଦ୍ ହୋଇଛି, ପୁରୀ ନାଗରିକ ମଞ୍ଚ । ଯେଉଁଥିରେ ଦର୍ଶାଯାଇଛି, ପୁରୀ ସହରର ୫ଶହ ହୋଟେଲ, ୧୬ଟି ମାର୍କେଟ୍ କମ୍ପ୍ଲେକ୍ସ , ୪ଟି ଧର୍ମଶାଳା ଏବଂ ଅନେକ ଲଜରେ ଅଗ୍ନି ନିରାପତ୍ତା ବ୍ୟବସ୍ଥା ନଥିବା ଅଭିଯୋଗ ହୋଇଛି । ତେବେ ସମ୍ରାଟ ମାର୍କେଟ୍ କମ୍ପ୍ଲେକ୍ସ ଘଟଣା ମନକୁ ଯାଇନଥିବା ବେଳେ ପୁରୀ ବଡ଼ଦାଣ୍ଡରେ ଆଉ ଏକ ଅଗ୍ନିକାଣ୍ଡର ଖବର ଆସି ପହଞ୍ଚିଛି । ଯାହା ପୁରୀର ସ୍ଥାନୀୟ ବାସିନ୍ଦା ଏବଂ ପର୍ଯ୍ୟଟକଙ୍କ ଚିନ୍ତା ବଢ଼ାଇଦେଇଛି ।