କନକ ବ୍ୟୁରୋ : ଚତିଶଗଡର ଜାଞ୍ଜଗୀର-ଚମ୍ପା ଜିଲ୍ଲାରେ ଏକ ଦୁଖଦ ଘଟଣା ଦେଖିବାକୁ ମିଳିଛି । ପିହାରିଦ ଗାଁରେ ଖୁଲାପଡିଥିବା ଏକ ନଳକୂପ ଗାତ ଭିତରେ ଜଣେ ୧୦ ବର୍ଷର ନାବାଳକ ଖସିପଡିଛି । ଏହି ଘଟଣାର ସୂଚନା ପାଇବା ପରେ ଜିଲ୍ଲା ପ୍ରଶାସନ ଓ ଉଦ୍ଧାରକାରୀ ଦଳ ଗତ ୧୫ ଘଂଟା ଧରି ପିଲାଟିକୁ ଗାତ ଭିତରୁ ଉଦ୍ଧାର କରିବାକୁ ଚେଷ୍ଟା ଚଳାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ ଗାତ ଗଳିପଡିଥିବା ନାବାଳକ ରାହୁଲ ସାହୁ ନିଜ ବାରିପଟେ ଖେଳୁଥିବା ବେଳେ ଏହି ଖୁଲାପଡିଥିବା ନଳକୂପ ଗାତ ଭିତରକୁ ଖସିପଡିଥିଲା । ଏନେଇ ଜଣାପଡିବା ପରେ ପରିବାର ଲୋକେ ଜିଲ୍ଲା ପ୍ରଶାସନକୁ ସୂଚନା ଦେଇଥିଲେ । ସୂଚନା ପାଇ ଜିଲ୍ଲା ପ୍ରଶାସନ ଏନଡିଆରଏଫ ଟିମକୁ ସାଥିରେ ଧରି ସେଠାରେ ପହଂଚିଥିଲା । ଏହାପରେ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲେ ବି ଏପର୍ଯ୍ୟନ୍ତ ନଳକୂପ ଗାତରୁ ରାହୁଲକୁ ଉଦ୍ଧାର କରିବାକୁ ସକ୍ଷମ ହୋଇନାହିଁ ଉଦ୍ଧାରକାରୀ ଦଳ ।
ସେପଟେ ଘଟଣା ବାବଦରେ ସୂଚନା ପାଇବା ପରେ ମୁଖ୍ୟମନ୍ତ୍ରୀ ଭୂପେଶ ବଘଲେବି ଘଟଣା ଉପରେ ନଜର ରଖିଛନ୍ତି । ସେପଟେ ଉଦ୍ଧାରକାରୀ ଦଳ ପାଇପ ମାଧ୍ୟମରେ ରାହୁଲଙ୍କୁ ଲଗାତର ଅକ୍ସିଜେନ ଯୋଗାଉଛନ୍ତି । ଏହାସହ ଗାତ ଭିତରକୁ କ୍ୟାମେରା ପଠାଇ ରାହୁଲଙ୍କ ଗତିବିଧି ଉପରେ ଉଦ୍ଧାରକାରୀ ଦଳ ନଜର ରଖିଥିବା କୁହାଯାଉଛି । କେବଳ ସେତିକି ନୁହେଁ ଦଉଡି ସହାୟତାରେ ରାହୁଲ ପାଖକୁ ଖାଦ୍ୟ ଓ ପାଣି ପଠାଯାଉଛି ଓ ସେ ତାହାକୁ ଖାଉଛି ବୋଲି କୁହାଯାଉଛି ।
ମୁଖ୍ୟମନ୍ତ୍ରୀ ବଘଲେ ଏହି ଘଟଣାକୁ ନେଇ ଟ୍ୱିଟ କରିଛନ୍ତି । ରାହୁଲକୁ ନଳକୂପ ଗାତ ଭିତରୁ ସୁରକ୍ଷିତ ଭାବେ ଉଦ୍ଧାର କରିବାକୁ ସେ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି । ସେପଟେ ଜିଲ୍ଲାପାଳ ଓ ଏସପି ଘଟଣା ସ୍ଥଳରେ ଉପସ୍ଥିତ ରହି ଉଦ୍ଧାର କାର୍ଯ୍ୟକୁ ତ୍ୱରାନ୍ୱିତ କରୁଛନ୍ତି ।