କନକ ବ୍ୟୁରୋ: ଏମସିଏଲ ରେଳପଥ ଯୋଗୁଁ ଚାଷ ଅନୁପଯୋଗୀ ହୋଇପଡିଛି ଚାଷ ଜମି । କୋଇଲା ଲୋଡିଂ, ଅନଲୋଡିଂ ଯୋଗୁଁ କଳାଗୁଣ୍ଡ ଉଡି ପ୍ରଦୂଷଣମାତ୍ର ବଢିଯିବ । ଫଳରେ ଗାଁରେ ରହିବା କଷ୍ଟକର ହୋଇପଡିବ । ତେଣୁ ରେଳପଥ ନିର୍ମାଣସ୍ଥଳରେ ଧାରଣାରେ ବସିଛନ୍ତି ଅନୁଗୁଳ ଜିଲ୍ଲା ନତଡା ଗ୍ରାମବାସୀ । ବିଭିନ୍ନ ଦାବିକୁ ନେଇ ଧାରଣାରେ ବସିଛନ୍ତି ଶହଶହ ମହିଳା, ବୃଦ୍ଧା ଓ ଛାତ୍ରଛାତ୍ରୀ । ତାଳଚେର ଅଂଚଳରେ ମାଟି ତଳେ କୋଇଲା ସନ୍ଧାନ ପାଇଁ ଜମି ଅଧିଗ୍ରହଣ କରୁଛି ଏମସିଏଲ । ଅନ୍ୟପଟେ ରେଲୱେ ବିଭାଗ ମଧ୍ୟ ଜମି ଅଧିଗ୍ରହଣ କରି ନିର୍ମାଣ କାର୍ଯ୍ୟ ଆରମ୍ଭ କରିଛି ।
Kanak News is now on WhatsApp
Join and get latest news updates delivered to you via WhatsApp
୧୪ଶହ ୨୯ ଏକର ଜମିରୁ ନତଡା ଗାଁରୁ ୧୬୪ ଏକର ଜମି ଏମସିଏଲ ଅଧିଗ୍ରହଣ କରିଥିବା ବେଳେ ରେଳ ବିଭାଗ ୩୬ ଏକର ଜମି ଅଧିଗ୍ରହଣ କରିଛି । ଏମସିଏଲ୍ ଓ ରେଳ ବିଭାଗର କାର୍ଯ୍ୟକ୍ରମ ଭିତରେ ପେଶି ହେଉଛନ୍ତି ଗ୍ରାମବାସୀ । ଚାଷ ଜମି ନଷ୍ଟ ହେଉଛି । କୋଇଲା ଗୁଣ୍ଡରେ ପରିବେଶ ପ୍ରଦ୍ୟୁଷିତ ହେଉଛି । ଫଳରେ ଜୀବନ ଜୀବିକା ପ୍ରଭାବିତ ହେଉଛି । ନତଡା ଗାଁର ସମସ୍ୟା ସମାଧାନ କରିବା ପାଇଁ ବାରମ୍ବାର ଦାବି ହେଉଛି । ଗ୍ରାମବାସୀଙ୍କୁ ବିସ୍ଥାପିତ କରି ଅନ୍ୟତ୍ର ଥଇଥାନ କରାଯାଉ । ଉପଯୁକ୍ତ କ୍ଷତିପୂରଣ ଦିଆଯାଉ ।
ଜମି ଓ ବାସହରାଉଥିବା ପରିବାରର ଜଣଙ୍କୁ ନିଯୁକ୍ତି ଦିଆଯାଉ । ଗ୍ରାମବାସୀ ଏମିତି ଦାବି ନେଇ ଧାରଣାରେ ବସିଥିବା ବେଳେ ଏମସିଏଲ କର୍ତ୍ତୃପକ୍ଷ, ରେଲୱେ କର୍ତ୍ତୃପକ୍ଷ କି ଜିଲ୍ଲା ପ୍ରଶାସନ କୌଣସି ପଦକ୍ଷେପ ନେଉନଥିବା ଅଭିଯୋଗ ହୋଇଛି । ଲୋକେ ଧାରଣାରେ ବସିଥିଲେ ବି କାମ ଜାରିରହିଛି । ଫଳରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି ହୋଇଛି । ସ୍ଥିତି ନିୟନ୍ତ୍ରଣ କରିବା ପାଇଁ ଘଟଣାସ୍ଥଳରେ ପୋଲିସ ଫୋର୍ସ ମୁତୟନ କରାଯାଇଛି ।