କନକ ବ୍ୟୁରୋ : ବିଜେପୁର ବାଜି ଜିତିବା ପାଇଁ ରାଜ୍ୟର ତିନି ପ୍ରମୁଖ ଦଳର ପ୍ରାର୍ଥୀ ଦେଉଛନ୍ତି ଅଗ୍ନିପରୀକ୍ଷା । ଜୋର ଧରିଛି ପ୍ରଚାର ତାତି । ପ୍ରତ୍ୟେକ ପ୍ରାର୍ଥୀ ନିଜ ପାଇଁ ଭୋଟ ମାଗିବା ସହ ଲୋକଙ୍କ ସେବା କରିବା ପାଇଁ ପ୍ରତିଶୃତି ଦେଉଛନ୍ତି । କିଏ ବିଜେପୁର ପାଇଁ ଉପଯୁକ୍ତ ପ୍ରାର୍ଥୀ ତାହା ଏବେଠୁ କହିବା କଷ୍ଟକର । କିଏ ବିଜେପୁରର ବିକାଶ ପାଇଁ ରାଜଧାନୀରେ ସ୍ୱର ଉତ୍ତୋଳନ କରିବ ତାହାକୁ ନେଇ ମଧ୍ୟ ଦ୍ୱନ୍ଦରେ ଭୋଟର । କିନ୍ତୁ କୌଣସି ପ୍ରାର୍ଥୀଙ୍କୁ ଭୋଟ ଦେବା ପୂର୍ବରୁ ତାଙ୍କ ବିଷୟରେ ସମସ୍ତ ତଥ୍ୟ ଜାଣିବା ପାଇଁ ଭୋଟରଙ୍କ ମନରେ ପ୍ରବଳ ଉକ୍ରଣ୍ଠା ରହିଛି । ତେଣୁ ଭୋଟରଙ୍କୁ ପ୍ରାର୍ଥୀଙ୍କ ବିଷୟରେ କିଛି ତଥ୍ୟ ଦେବା ପାଇଁ କନକ ନ୍ୟୁଜ ଆରମ୍ଭ କରିଛି ପ୍ରୟାସ । ନିର୍ବାଚନୀ ପ୍ରଚାର ଜୋର ଧରିଥିବା ବେଳେ ରାଜ୍ୟର ତିନି ପ୍ରମୁଖ ଦଳର ପ୍ରାର୍ଥୀ କେତେ ପାଠୁଆ ତାହା ସାମ୍ନାକୁ ଆସିଛି । ବିଜେପୁର ଉପନିର୍ବାଚନ ପାଇଁ ପ୍ରାର୍ଥୀ ନିର୍ବାଚନ କମିଶନଙ୍କ ନିକଟରେ ସତ୍ୟପାଠ ଦାଖଲ କରିଥିବା ତଥ୍ୟ ଅନୁଯାୟୀ କେଉଁ ପ୍ରାର୍ଥୀଙ୍କ ଶିକ୍ଷାଗତ ଯୋଗ୍ୟତା କେତେ ତାହା ଜଣାପଡିଛି । ତିନି ପ୍ରମୁଖ ଦଳର ପ୍ରାର୍ଥୀଙ୍କ ଶିକ୍ଷାଗତ ଯୋଗ୍ୟତା ଉପରେ ନଜର ପକାନ୍ତୁ ।
Kanak News is now on WhatsApp
Join and get latest news updates delivered to you via WhatsApp
ସତ୍ୟପାଠରେ ପ୍ରାର୍ଥୀମାନେ ଦାଖଲ କରିଥିବା ତଥ୍ୟ ଅନୁଯାୟୀ କଂଗ୍ରେସ ପ୍ରାର୍ଥୀ ପ୍ରଣୟ ସାହୁଙ୍କ ଶିକ୍ଷାଗତ ଯୋଗ୍ୟତା ହେଉଛି ମାଟ୍ରିକ ପାସ । ୬୨ ବର୍ଷିୟ ପ୍ରଣୟ ୧୯୭୩ ମସିହାରେ ଗାଈସିଲଟର ସରକାରୀ ହାଇସ୍କୁଲରୁ ମାଟ୍ରିକ ପରୀକ୍ଷାରେ ଉତ୍ତୀର୍ଣ୍ଣ ହୋଇଛନ୍ତି । ପରେ ଚାଷକୁ ପେଶା ଭାବରେ ଗ୍ରହଣ କରିଥିଲେ । ଠିକ୍ ସେହିଭଳି ଯଦି ବିଜେଡି ପ୍ରାର୍ଥୀ ରୀତା ସାହୁଙ୍କ ଶିକ୍ଷାଗତ ଯୋଗ୍ୟତା ଉପରେ ନଜର ପକାଇବା ତେବେ ସେ ମଧ୍ୟ ଦଶମ ଶ୍ରେଣୀ ପର୍ଯ୍ୟନ୍ତ ପାଠ ପଢିଛନ୍ତି । ୧୯୮୬ ମସିହାରେ ରୀତା ଝାରସୁଗୁଡାର ପୁରୁଣାବସ୍ତି ଏମପିଏଲ ହାଇସ୍କୁଲରେ ପାଠ ପଢିବା ସହ ବୋର୍ଡ ପରୀକ୍ଷାରେ ସଫଳତାର ସହ କୃତକାର୍ଯ୍ୟ ହୋଇଛନ୍ତି । ଏହାବାଦ ତାଙ୍କ ପାଖରେ ଅନ୍ୟ କୌଣସି ଡିଗ୍ରୀ ନାହିଁ ।
ଶିକ୍ଷାଗତ ଯୋଗ୍ୟତା ମାମଲାରେ ବିଜେଡି ଓ କଂଗ୍ରେସର ପ୍ରାର୍ଥୀଙ୍କ ଠାରୁ ଢେର ଆଗରେ ରହିଛନ୍ତି ବିଜେପି ପ୍ରାର୍ଥୀ ଅଶୋକ ପାଣିଗ୍ରାହୀ । ତିନି ପ୍ରମୁଖ ପ୍ରାର୍ଥୀଙ୍କ ମଧ୍ୟରେ ସବୁଠୁ ଅଧିକ ପାଠ ପଢିଛନ୍ତି ଅଶୋକ । ସେ ଏଲଏଲବି ଡିଗ୍ରୀ ହାସଲ କରିଛନ୍ତି । ୧୯୭୬ ମସିହାରେ ଉଚ୍ଚ ମାଧ୍ୟମିକ ଶିକ୍ଷା (ବୈଷୟିକ) ଶେଷ କରିଥିବା ଅଶୋକ ସମ୍ବଲପୁର ବିଶ୍ୱବିଦ୍ୟାଳୟରୁ ୧୯୮୧ ମସିହାରେ କଳା ବିଷୟରେ ଗ୍ରାଜୁଏସନ ପାଠ ପଢା ଶେଷ କରିଥିଲେ । ଏହାପରେ ପୁର୍ନବାର ୧୯୮୩ ମସିହାରେ ସମ୍ବଲପୁର ବିଶ୍ୱବିଦ୍ୟାଳୟରୁ ଏମ.ଏ ଡିଗ୍ରୀ ହାସଲ କରିଥିଲେ । ପରେ ୧୯୮୬ ମସିହାରେ ସମ୍ବଲପୁର ବିଶ୍ୱବିଦ୍ୟାଳୟରୁ ଏଲଏଲବି ପାଠପଢା ଶେଷ କରିବା ସହ ଆଡଭୋକେଟ ଭାବେ କ୍ୟାରିୟର ଆରମ୍ଭ କରିଥିଲେ । ପରେ ୨୦୦୦ରୁ ୨୦୦୪ ପର୍ଯ୍ୟନ୍ତ ବିଜେପୁର ଆସନରୁ ବିଧାୟକ ଭାବେ ନିର୍ବାଚିତ ହୋଇଥିଲେ ।