ବିଚ୍ଛିନ୍ନାଚଂଳରେ ହେଲାନି ସ୍ୱାଧୀନତା ଦିବସ ପାଳନ ! ମାଓ ଭୟ ଯୋଗୁଁ ମାଲକାନଗିରିର ବିଭିନ୍ନ ସ୍ଥାନରେ ଉଡିପାରିଲାନି ତ୍ରିରଙ୍ଗା
କନକ ବ୍ୟୁରୋ : ସାରା ଦେଶରେ ୭୧ ତମ ସ୍ୱାଧୀନତା ଦିବସ ପାଳନ ହୋଇଥିବା ବେଳେ ମାଲକାନଗିରିର ବିଚ୍ଚିନ୍ନାଂଚଳରେ ଉଡିପାରିନି ତ୍ରିରଙ୍ଗା । ମାଓ ଭୟ ଯୋଗୁ ଅନେକ ସ୍ଥାନରେ ପତାକା ଉତ୍ତୋଳନ ହୋଇପାରିନି । ଚିତ୍ରୋକୋଣ୍ଡା ବ୍ଲକ ଅନ୍ତର୍ଗତ ପାପଲୁର, କୁରମାନୁର ସମେତ ବିଚ୍ଚିନ୍ନାଂଚଳର ଯନ୍ତ୍ରୀ ପଂଚାୟତରେ ସ୍ୱାଧୀନସତା ଦିବସ ପାଳନ ହୋଇନି । ବିଦ୍ୟାଳୟଠୁ ଆରମ୍ଭ ପଂଚାୟତ କାର୍ଯ୍ୟାଳୟ ପର୍ଯ୍ୟନ୍ତ ସବୁଠୁ ଶୁନଶାନ ମାହୋଲ ଦେଖିବାକୁ ମିଳିଥିଲା । ଗତକାଲି ରାତିରେ ମାଓବାଦୀ ମାନେ ପାପଲୁର ଓ କୁରମାନୁର ଅଂଚଳରେ ବୈଠକରେ ପତାକା ଉତ୍ତୋଳନ ନକରିବାକୁ ଧମକ ଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ ରାଜ୍ୟର ଅନ୍ୟ ଜିଲ୍ଲା ମାନଙ୍କରେ ଦେଖିବାକୁ ମିଳିଥିଲା ସ୍ୱାଧୀନତା ଦିବସର ଉତ୍ସବ ।କଟକରେ ୭୧ତମ ସ୍ୱାଧୀନତା ଦିବସ ପାଳନ କରାଯାଇଛି । ବାରବାଟୀ ଷ୍ଟାଡିୟମରେ ମନ୍ତ୍ରୀ ସୂର୍ଯ୍ୟ ନାରାୟଣ ପାତ୍ର ପତାକା ଉତ୍ତୋଳନ କରି ଅଭିଭାଷଣ ରଖିଛନ୍ତି । ରାଜ୍ୟବାସୀଙ୍କୁ ଶୁଭେଚ୍ଛା ଜଣାଇବା ସହ ରାଜ୍ୟ ପ୍ରଗତି ପଥେ ଆଗେଇଥିବା କହିଛନ୍ତି ସୂର୍ଯ ପାତ୍ର । ଏହି ଧାରାକୁ ବଜାୟ ରଖିବା ପାଇଁ ରାଜ୍ୟ ସମର୍ଥନର ଆବଶ୍ୟକତା ରହିଛି । ଗରିବଙ୍କ ପାଇଁ ସରକାର କାମ କରୁଛି, ଆଗକୁ ମଧ୍ୟ କାମ କରିବ ବୋଲି ମନ୍ତ୍ରୀ କହିଛନ୍ତି । ଶିକ୍ଷା, ସ୍ୱାସ୍ଥ ଏବଂ ମହିଳାଙ୍କ ସୁରକ୍ଷା କ୍ଷେତ୍ରରେ ଅନେକ ପ୍ରଶଂସନୀୟ ପଦକ୍ଷେପ ନିଆଯାଇଥିବା କହିଛନ୍ତି ।
ସମ୍ବଲପୁରରେ ମଧ୍ୟ ଜିଲ୍ଲାସ୍ତରୀୟ ସ୍ୱାଧୀନତା ଦିବସ ପାଳନ କରାଯାଇଛି । କଚେରୀ ରୋଡରେ ମନ୍ତ୍ରୀ ପ୍ରଫୁଲ୍ଲ ମଲ୍ଲିକ ପତାକା ଉତ୍ତୋଳନ କରିବା ସହ ସ୍ୱାଧୀନତା ସଂଗ୍ରାମୀଙ୍କୁ ମନେ ପକାଇଛନ୍ତି । ଏହାସହ ଜିଲ୍ଲାସ୍ତରୀୟ ପରେଡ ଅଭିବାଦନ ଗ୍ରହଣ ବେଳେ ରାଜ୍ୟ ସରକାରଙ୍କ ବିଭନ୍ନ ଲୋକାଭିମୁଖୀ ଯୋଜନା ବାବଦରେ ଜନତାକୁ ଅବଗତ କରାଇଛନ୍ତି ।
ପୁରୀ ଶରଧାବାଲିରେ ଜିଲ୍ଲାସ୍ତରୀୟ ସ୍ୱାଧୀନତା ଦିବସ ପାଳନ କରାଯାଇଛି । ମନ୍ତ୍ରୀ ଦାମୋଦର ରାଉତ ଏହି ଅବସରରେ ଯୋଗ ଦେଇ ଅଭିଭାଷଣ ରଖିଛନ୍ତି । କହିଛନ୍ତି, ଭାରତ ବର୍ଷର ସମସ୍ତ ରାଜ୍ୟ ଏକ ହେଲେ ଏକ ସମ୍ପୃଦ୍ଧ ଭାରତ ଗଠନ ସଫଳ ହେବ । ଏଠି ବି ମନ୍ତ୍ରୀ ଦାମୋଦର ରାଉତ କେନ୍ଦ୍ର ସରକାରଙ୍କ ବିରୋଧରେ ବର୍ଷିଛନ୍ତି ।
ନବରଙ୍ଗପୁର ଜିଲ୍ଲା ଷ୍ଟାଡିୟମରେ ମନ୍ତ୍ରୀ ପ୍ରଫୁଲ୍ଲ ସାମଲ ପତାକା ଉତ୍ତୋଳନ କରି ଜିଲ୍ଲାବାସୀଙ୍କ ସ୍ୱାଧୀନତା ଦିବସର ଶୁଭେଚ୍ଛା ଜଣାଇଛନ୍ତି । ମନ୍ତ୍ରୀ ସ୍ୱାଧୀନତା ସଂଗ୍ରାମୀଙ୍କ ମନେ ପକାଇବା ସହ ରାଜ୍ୟ ସରକାରଙ୍କ ଗୁଣଗାନ କରିଛନ୍ତି । କହିଛନ୍ତି ରାଜ୍ୟରେ ଶିକ୍ଷା, ଜଳ ସେଚନ ଓ ମହିଳା ବିକାଶ ପ୍ରତି ସରକାର ସଚେତନ ବୋଲି ପ୍ରଫୁଲ୍ଲ ସାମଲ କହିଛନ୍ତି ।
ବରଗଡରେ ମନ୍ତ୍ରୀ ନୃସିଂହ ସାହୁ ପତାକା ଉତ୍ତୋଳନ କରି ଜିଲ୍ଲାସ୍ତରୀୟ ସ୍ୱାଧୀନତା ଦିବସ ପାଳନ କରିଛନ୍ତି । ଜଜ୍ ହାଇସ୍କୁଲ ପଡିଆରେ ଏହି ଦିବସକୁ ପାଳନ କରାଯାଉଥିବା ବେଳେ ଦେଶ ସ୍ୱାଧୀନତା ପାଇଁ ମହାତ୍ମା ଗାନ୍ଧୀଙ୍କ ଅବଦାନକୁ ମନେ ପକାଇବା ସହ ସହିଦଙ୍କ ପ୍ରତି ଶ୍ରଦ୍ଧାଂଜଳି ଜ୍ଞାପନ କରିଛନ୍ତି । ପଦ୍ମଶୀ ହଳଧର ନାଗଙ୍କୁ ପ୍ରଶଂସା କରିଛନ୍ତି ମନ୍ତ୍ରୀ ନୃସିଂହ ସାହୁ । ସେପଟେ ରାଉରକେଲାରେ ଜିଲ୍ଲାସ୍ତରୀୟ ସ୍ୱାଧୀନତା ଦିବସରେ ଜିଲ୍ଲାପାଳ ବିନତ୍ ଭରଦ୍ୱାଜ ପତାକା ଉତ୍ତୋଳନ କରିଛନ୍ତି ।