ଚୀନର ଆଉ ଏକ ଚାଲ୍ ! ଚାପରେ ମାଳଦୀପ ଭାରତକୁ କହିଲା, ହଟାଅ ସେନା ଓ ହେଲିକପ୍ଟର
କନକ ବ୍ୟୁରୋ : ଦୀର୍ଘ ବର୍ଷ ଧରି ମାଳଦୀପରେ ରହିିଥିବା ଭାରତୀୟ ସେନା ଓ ହେଲିକପଟରକୁ ତୁରନ୍ତ ହଟିବା ଲାଗି ସେଠାର ସରକାର ପରାମର୍ଶ ଦେଇଛନ୍ତି । ଦୁଇ ଦେଶ ମଧ୍ୟରେ ସ୍ୱାକ୍ଷରିତ ଚୁକ୍ତି ଅନୁଯାୟୀ ଭାରତୀୟ ସେନା ସେଠାରେ ମୁତୟନ ଥିଲେ । ଚୁକ୍ତି ମିଆଦ ଗତ ଜୁନ ମାସରେ ସମାପ୍ତ ହୋଇଯାଇଥିବାରୁ ଭାରତୀୟ ସେନା ତୁରନ୍ତ ହଟିଯାନ୍ତୁ ବୋଲି ମାଳଦୀପ ସରକାର କହିଛନ୍ତି । ତେବେ ଚୀନ ଚାପରେ ମାଳଦୀପ ଏଭଳି ଆଭିମୁଖ୍ୟ ଗ୍ରହଣ କରିଥିବା ଜଣାପଡ଼ିଛି । କାରଣ ଭାରତୀୟ ମହାସାଗରରେ ଭାରତର ପ୍ରଭାବକୁ କ୍ଷୁଣ୍ଣ କରିବା ଲାଗି ଚୀନ ଚଳାଇଥିବା ଷଡ଼ଯନ୍ତ୍ରର ଏହା ଏକ ଅଂଶବିଶେଷ ବୋଲି କୁହାଯାଉଛି । ମାଳଦୀପରେ ମାନବିକ ଓ ଅନ୍ୟାନ୍ୟ ସହାୟତା ପାଇଁ ଭାରତ ଦୁଇଟି ହେଲିକପଟର ଏବଂ ୫୦ ଯବାନଙ୍କୁ ମୁତୟନ କରିଥିଲା ।
Kanak News is now on WhatsApp
Join and get latest news updates delivered to you via WhatsApp
କିନ୍ତୁ ସେଠାରେ ବିଭିନ୍ନ ପ୍ରକଳ୍ପ କାମ ଚଳାଇଥିବା ଚୀନ ଏହାକୁ ସହଜରେ ଗ୍ରହଣ କରିପାରୁ ନାହିଁ । ଏହି ଅଞ୍ଚଳରେ ଭାରତର ଉପସ୍ଥିତିକୁ ବିରୋଧ କରି ମାଳଦୀପ ସରକାର ଉପରେ ଚାପ ପକାଉଛି । ବିଭିନ୍ନ ପ୍ରସଙ୍ଗରେ ଭାରତ ଉପରେ ଅସନ୍ତୁଷ୍ଟ ଥିବା ମାଳଦୀପ ରାଷ୍ଟ୍ରପତି ଅବଦୁଲ୍ଲା ୟମିନ୍ ଚୀନ କଥାରେ ପଡ଼ି ଏଭଳି ପରାମର୍ଶ ଦେଇଥିବା କୁହାଯାଉଛି । ଭାରତରେ ମାଳଦୀପର ରାଷ୍ଟ୍ରଦୂତ ଅହମଦ ମହମ୍ମଦ କହିଛନ୍ତି ଯେ ଡାକ୍ତରୀ ସହାୟତା ଲାଗି ଭାରତ ଏହି ଦୁଇଟି ହେଲିକପଟର ଏବଂ ସାମରିକ କର୍ମଚାରୀ ମୁତୟନ କରିଥିଲା । କିନ୍ତୁ ଇତିମଧ୍ୟରେ ମାଳଦୀପ ସରକାର ଏକ୍ଷେତ୍ରରେ ଆତ୍ମନିର୍ଭରଶୀଳ । ତେଣୁ ଭାରତୀୟ ହେଲିକପଟର ଓ ସେନାର ସହାୟତା ଆଉ ଦରକାର ନାହିଁ । ତେବେ ମାଳଦୀପର ଏଭଳି ଆଚରଣ ନେଇ ଭାରତର ପ୍ରତିକ୍ରିୟା ଜଣାପଡ଼ି ନାହିଁ ।
ସୂଚନାଯୋଗ୍ୟ ଯେ ମାଳଦୀପରେ ୟମିନ ସରକାର ଯେଉଁ ରାଜନୈତିକ ବିରୋଧୀଙ୍କୁ ଦମନ କରିବା ଲାଗି ଅଭିଯାନ ଚଳାଇଛନ୍ତି ତାହାକୁ ଭାରତ ବିରୋଧ କରୁଛି । ଜେଲରେ ଥିବା ପୂର୍ବତନ ରାଷ୍ଟ୍ରପତି ଗୟୁମ ଏବଂ ସୁପ୍ରିମ କୋର୍ଟ ବିଚାରପତିମାନଙ୍କୁ ମୁକ୍ତ କରିବା ଲାଗି ଭାରତ ଚାପ ପକାଉଛି । ଏହାକୁ ନେଇ ୟମିନ ସରକାର ଅସନ୍ତୁଷ୍ଟ ଅଛନ୍ତି । ଏଭଳି ପରିସ୍ଥିତିରୁ ଫାଇଦା ଉଠାଇବାକୁ ଯାଇ ଚୀନ ଏହି ଅଞ୍ଚଳରେ ଭାରତର ପ୍ରଭାବକୁ ହ୍ରାସ କରିବାକୁ ଷଡ଼ଯନ୍ତ୍ର ଚଳାଇଛି । ୨୦୧୧ରେ ମାଳଦୀପରେ ଦୂତାବାସ ଖୋଲିବା ପରେ ଚୀନ ସେଠାରେ ଅନେକ ବଡ଼ ବଡ଼ ପ୍ରକଳ୍ପ ହାତକୁ ନେଇଛି । କେବଳ ଏତିକି ନୁହେଁ ଚୀନ ଚାପରେ ଅନେକ ପ୍ରକଳ୍ପରୁ ଭାରତୀୟ ସଂସ୍ଥାକୁ ବିଦା କରି ଚୀନକୁ ଦିଆଯାଉଛି । ଭାରତୀୟ ମହାସାଗରେ ଏହାର ପ୍ରଭାବକୁ ବଜାୟ ରଖିବା ଲାଗି ଭାରତ ମାଳଦୀପ, ମରିସସ୍ ଏବଂ ସିସେଲ୍ସକୁ ଭାରତ ହେଲିକ୍ଟର, ପାଟ୍ରୋଲ ବୋଟ୍ ଏବଂ ଉପଗ୍ରହ ସେବା ଯୋଗାଇ ଆସୁଛି ।