ମୋଷ୍ଟ ୱାଣ୍ଟେଡ଼୍ ତାଲିକାରେ ରାମ୍ ରହିମଙ୍କ ପାଳିତା କନ୍ୟା ହନିପ୍ରୀତ୍ ! ଛାନଭିନ୍ ଜାରି ରଖିଛି ହରିୟାଣା ପୋଲିସ୍
କନକ ବ୍ୟୁରୋ : ଯୌନ ଶୋଷଣ ମାମଲାରେ ଦୋଷୀ ସାବ୍ୟସ୍ତ ହେବା ପରେ ଫିଟିବାରେ ଲାଗିଛି ବାବା ରାମରହିମଙ୍କ ଗୁମର । ବାବାଙ୍କ ଅନେକ କଳା କାରନାମା ପଛରେ ତଥାକଥିତ ପାଳିତା ଝିଅ ହନିପ୍ରୀତଙ୍କ ହାତ ଥିବା ସ୍ପଷ୍ଟ ହୋଇଛି । ବାବାଙ୍କୁ ଫେରାର କରିବାକୁ ହିଂସାକାଣ୍ଡ ଘଟାଇଥିବା ବ୍ୟକ୍ତିଙ୍କ ତାଲିକାର ଶୀର୍ଷରେ ବି ରହିଛି ହନିପ୍ରୀତଙ୍କ ନାଁ ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ଲୁକ୍ ଆଉଟ୍ ନୋଟିସ୍ ଜାରି କରିଥିବା ହରିଆଣା ପୁଲିସ୍ ଜାରି କରିଛି ୪୩ ଜଣ ଷଢ଼ଯନ୍ତ୍ରକାରୀଙ୍କ ତାଲିକା । ଏହି ତାଲିକାର ସବୁଠୁ ଉପରେ ଅଛନ୍ତି ବଳାକ୍ରାରୀ ବାବାଙ୍କ ତଥାକଥିତ ପାଳିତା ଝିଅ ହନିପ୍ରୀତ ଇନସାନ୍ । ତା ପଛକୁ ଅଛନ୍ତି ବାବାଙ୍କ ଘନିଷ୍ଠ ସହଯୋଗୀ ତଥା ଡେରା ପ୍ରବକ୍ତା ଆଦିତ୍ୟ ଇନସାନ୍ । ହନିପ୍ରୀତଙ୍କ ବିରୁଦ୍ଧରେ ବାବାଙ୍କୁ ଫେରାର କରିବାକୁ ଚକ୍ରାନ୍ତର ଅଭିଯୋଗ ଥିବା ବେଳେ ଆଦିତ୍ୟଙ୍କ ବିରୁଦ୍ଧରେ ହିଂସାକାଣ୍ଡ ପାଇଁ ଅନୁଗାମୀଙ୍କୁ ପ୍ରବର୍ତାଇବାର ଆରୋପ ରହିଛି । ଉତର ପ୍ରଦେଶ ରାସ୍ତା ଦେଇ ହନିପ୍ରୀତ ନେପାଳ ଚାଲିଯାଇଥିବା ହରିଆଣା ପୁଲିସ ସନ୍ଦେହ କରି ହାଇ ଆଲର୍ଟ ଜାରି କରିଛି । ୨୩ ଦିନ ପରେ ମଧ୍ୟ ହନିପ୍ରୀତଙ୍କ କୌଣସି ଖବର ମିଳି ପାରିନାହିଁ ।
ରାମରହିମଙ୍କ ଲାଡଲିର ଲମ୍ବା କାହାଣୀ , ପ୍ରତିଟି ପୃଷ୍ଠାରେ ବାବା ବଳାତ୍କାରୀ :
ହନିପ୍ରୀତଙ୍କ ମୂଳ ନାଁ ହେଉଛି ପ୍ରିୟଙ୍କା ତନେଜା । ହରିୟାଣାର ହିସାର ନିବାସୀ ପ୍ରିୟଙ୍କା ବାବାଙ୍କ ପାଖକୁ ଆସନ୍ତି ଶ୍ୱଶୂର ଘର ଯୌତୁକ ନିର୍ଯାତନାର ଅଭିଯୋଗ ସହ । ୨୦୦୯ ମସିହା । ବାବା ପାଳିତା ଝିଅ ହିସାବରେ ଗ୍ରହଣ କରିବା ସହ ତାଙ୍କୁ ନୂଆ ନାଁ ଦିଅନ୍ତି ହନିପ୍ରୀତ ଇନସାନ୍ । ୨୦୧୨ ମସିହା । ବାବା ହନିପ୍ରୀତଙ୍କୁ ଯୌନଶୋଷଣ କରୁଥିବା ଅଭିଯୋଗ ସହ କୋର୍ଟରେ ମାମଲା ଦାୟର କରନ୍ତି ତାଙ୍କ ସ୍ୱାମୀ । ପରେ ରାମରହିମଙ୍କ ଚାପ ଯୋଗୁ ସେ ମାମଲା ପ୍ରତ୍ୟାହାର କରିବା ମଧ୍ୟ ଆସେ ସାମ୍ନାକୁ । ତେବେ ମାମଲାର ସମାଧାନ ପରେ ଆଉ ଘରକୁ ଫେରନ୍ତି ନାହିଁ ବାବାଙ୍କ ଲାଡଲି ।
ବାବାଙ୍କ ବିଳାସର ମାଷ୍ଟର ମାଇଣ୍ଡ ହନିପ୍ରୀତ, ରଂଗିଲା ରାମରହିମଙ୍କ ପାଇଁ କରୁଥିଲେ ଝିଅ ଯୋଗାଡ୍
ଅଡ଼ିଓ ରିଲିଜ୍ ପାର୍ଟି ହେଉ କିମ୍ବା ଫିଲ୍ମ ପ୍ରିମିୟର୍ ବାବା ରାମରହିମଙ୍କ ଛାଇ ପରି ରହୁଥିଲେ ହନିପ୍ରୀତ । ଫିଲ୍ମ ନିର୍ମାଣର ସବୁକିଛି ଥିଲା ତାଙ୍କ ନିୟନ୍ତ୍ରଣରେ । ବାବାଙ୍କ ପାଇଁ ନିଜ ପରିବାର ସଦସ୍ୟଠାରୁ ମଧ୍ୟ ଅଧିକ ଗୁରୁତ୍ୱପୂର୍ଣ୍ଣ ଥିଲେ ବାବାଙ୍କ ଏହି ପାଳିତା ଝିଅ । ଯେଉଁ କାରଣରୁ ରାମରହିମ ଦୋଷୀ ସାବ୍ୟସ୍ତ ହେବା ପୂର୍ବରୁ ତାଙ୍କୁ ଫେରାର୍ କରିବାକୁ ଚକ୍ରାନ୍ତ କରିଥିଲେ ହନିପ୍ରୀତ । ବାବାଙ୍କୁ ଫେରାର କରିବା ପାଇଁ ଏକ ନାଲି ବ୍ୟାଗ ବ୍ୟବହାର କରାଯାଇ ଥିଲା ଯାହା ରହିଥିଲା ହନିପ୍ରୀତଙ୍କ ହାତରେ । ରେଡ୍ ବ୍ୟାଗକୁ ସଙ୍କେତ ହିସାବରେ ବ୍ୟବହାର କରାଯାଇ ବାବାଙ୍କୁ କୋର୍ଟରୁ ଗାୟବ କରିବାକୁ ରଚିଥିଲେ ବ୍ଲୁ ପ୍ରିଂଟ୍ । ତେବେ ସଫଳ ହୋଇନଥିଲା ହନିପ୍ରୀତଙ୍କ ଉଦ୍ଦେଶ୍ୟ । ଏବେ ଫେରାର୍ ହନିପ୍ରୀତଙ୍କୁ ଗିରଫ ପାଇଁ ପୁଲିସ ଜୋରଦାର କରିଛି ତଦନ୍ତକୁ ।