ଆରମ୍ଭ ହେଲା ବିଜେଡିର ‘ଆମ ସହର ଆମ ଉନ୍ନତି’ ଅଭିଯାନ
କନକ ବ୍ୟୁରୋ : ଆସନ୍ତା ବର୍ଷ ପୌର ନିର୍ବାଚନ । ଏଥି ପାଇଁ ବିଜେଡି ପକ୍ଷରୁ ପ୍ରସ୍ତୁତି ଆରମ୍ଭ ହୋଇଯାଇଛି । ଗ୍ରାମାଞ୍ଚଳରେ ‘ଆମ ଗାଁ ଆମ ବିକାଶ’ ଅଭିଯାନ ପରେ ସହର ମୁହାଁ ହୋଇଛି ବିଜେଡି । ଦଳ ପକ୍ଷରୁ ଆରମ୍ଭ କରାଯାଇଛି ନୂଆ ଅଭିଯାନ ‘ଆମ ସହର ଆମ ଉନ୍ନତି’ । ଏ ନେଇ ଦଳର ସଭାପତି ନବୀନ ପଟ୍ଟନାୟକ ସୂଚନା ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
‘ଆମ ଗାଁ ଆମ ବିକାଶ’ ଅଭିଯାନର ସମୀକ୍ଷା ପାଇଁ ବିଜେଡି ରାଜ୍ୟ କାର୍ୟ୍ୟାଳୟରେ ଆଜି ବିଧାୟକମାନଙ୍କର ଏକ ବୈଠକ ଡକାଯାଇଥିଲା । ଏଥିରେ ଶ୍ରୀ ପଟ୍ଟନାୟକ କହିଲେ, ସରକାର ଗ୍ରାମାଞ୍ଚଳର ଭିତ୍ତିଭୂମି, ଲୋକଙ୍କ ଜୀବନ ଧାରଣ ମାନ ଓ ସାମାଜିକ କ୍ଷେତ୍ର ପାଇଁ ବହୁ କାର୍ଯ୍ୟ କରୁଛନ୍ତି । କିନ୍ତୁ ଭୁଲ୍ ତଥ୍ୟ ଦେଇ ବିରୋଧୀ ଦଳଗୁଡ଼ିକ ଲୋକଙ୍କ ମନରେ ଭ୍ରମ ସୃଷ୍ଟି କରୁଛନ୍ତି । ‘ଆମ ଗାଁ ଆମ ବିକାଶ’ ଅଭିଯାନ ମାଧ୍ୟମରେ ଲୋକଙ୍କ ମଧ୍ୟରେ ଏ ନେଇ ସଚେତନତା ସୃଷ୍ଟି କରାଯାଇପାରିଛି ।
ଶ୍ରୀ ପଟ୍ଟନାୟକ କହିଥିଲେ, ସମାନ ଲକ୍ଷ୍ୟ ନେଇ ‘ଆମ ସହର ଆମ ଉନ୍ନତି’ ଅଭିଯାନ ଆରମ୍ଭ କରାଯାଉଛି। ପ୍ରତି ଏନଏସି ଓ ପୌରପାଳିକାରେ ଓ୍ଵାର୍ଡ କମିଟି ଗଠନ କରାଯିବ । ଏନଏସି ଓ୍ଵାର୍ଡ କମିଟିରେ ୫୦ ଓ ପୌରପାଳିକା ଓ୍ଵାର୍ଡ କମିଟିରେ ୧୦୦ ସଦସ୍ୟ ରହିବେ । ସରକାରଙ୍କ ସମସ୍ତ ବିକାଶମୂଳକ କାର୍ଯ୍ୟ ସମ୍ପର୍କରେ ଓ୍ଵାର୍ଡ କମିଟି ପାଖରେ ତଥ୍ୟ ରହିବା ଆବଶ୍ୟକ । ଓ୍ଵାର୍ଡ କମିଟିର ସଦସ୍ୟମାନେ ହିଁ ଦଳର ପ୍ରକୃତ ସୈନ୍ୟ ହେବେ ।
ଜିଲ୍ଲା ପର୍ଯ୍ୟବେକ୍ଷକମାନେ ଓ୍ଵାର୍ଡ କମିଟି ଗଠନର ରିପୋର୍ଟ ନିୟମିତ ରାଜ୍ୟ କମିଟିକୁ ପଠାଇବେ । ଯେ କୌଣସି ସମୟରେ ସେ ନିଜେ ଓ୍ଵାର୍ଡ କମିଟି ସହ ସିଧାସଳଖ କଥା ହେବେ ବୋଲି ଶ୍ରୀ ପଟ୍ଟନାୟକ କହିଥିଲେ । ବିଜେଡି ଉପସଭାପତି ଦେବୀ ପ୍ରସାଦ ମିଶ୍ର ସ୍ୱାଗତ ଭାଷଣ ଦେଇଥିଲେ । ‘ଆମ ଗାଁ ଆମ ବିକାଶ’ ଅଭିଯାନର ସଂଯୋଜକ ଭୂପିନ୍ଦର ସିଂହ ଓ ଦେବାଶିଷ ସାମନ୍ତରାୟ କାର୍ଯ୍ୟକ୍ରମ ସମ୍ପର୍କରେ ସୂଚନା ଦେଇଥିଲେ।