ଯୁବ ଓଡ଼ିଆ ଉଦ୍ୟୋଗୀଙ୍କ ଅନନ୍ୟ ପ୍ରୟାସ : ଖୁବ ଶୀଘ୍ର ଓଡ଼ିଶା ବଜାରକୁ ଆଣିବେ ‘ପାଓ୍ଵାର ବ୍ୟାଙ୍କ’, ଚାର୍ଜ କରିବାକୁ ପଡ଼ିବନି
କନକ ବ୍ୟୁୁରୋ : ବୟସ ମାତ୍ର ୨୫ ବର୍ଷ। ନିଜକୁ ଜଣେ ସଫଳ ଉଦ୍ୟୋଗୀ ଭାବେ ପ୍ରତିଷ୍ଠିତ କରିପାରିଛନ୍ତି ସୁଶାନ୍ତ ପଟ୍ଟନାୟକ । ତାଙ୍କ ଘର ଆଚାର୍ଯ୍ୟ ବିହାରରେ । ‘ଆଇ ଥିଙ୍କ୍’ ନାମକ ସଂସ୍ଥାର ସେ ହେଉଛନ୍ତି ସହ ପ୍ରତିଷ୍ଠାତା । ଏହି ସଂସ୍ଥା ଅଧୀନରେ ଥିବା ଇନ୍ ଥିଙ୍କ୍ ଗ୍ୟାଜେଟ ପ୍ରାଇଭେଟ ଲିମିଟେଡ ଖୁବ ଶୀଘ୍ର ଓଡ଼ିଶା ବଜାରରେ ଏହାର ଦୁଇଟି ଅଭିନବ ଉତ୍ପାଦ ପାଓ୍ଵାର ବ୍ୟାଙ୍କ ଓ ଇନଭର୍ଟର ବଲବ ବିକ୍ରି କରିବାକୁ ପ୍ରସ୍ତୁତ ହେଉଛି । ଉତ୍ତର ପୂର୍ବାଞ୍ଚଳରେ ଥିବା ସାତଟି ରାଜ୍ୟରେ ପାଓ୍ଵାର ବ୍ୟାଙ୍କ ବିକ୍ରି ହେଉଛି। ଶୋଲ୍-କା ନାମକ ଏହି ପାଓ୍ଵାର ବ୍ୟାଙ୍କର ବିଶେଷତ୍ୱ ହେଉଛି ଏହାକୁ ଚାର୍ଜ କରିବାକୁ ପଡ଼ିବନି। ଯେ କୌଣସି ପ୍ରକାର ଆଲୋକରେ ଏହା ଚାର୍ଜ ହୋଇଯିବ।
Kanak News is now on WhatsApp
Join and get latest news updates delivered to you via WhatsApp
ଏଥିରେ ଏକ ଅତ୍ୟାଧୁନିକ ସୋଲାର୍ ପ୍ୟାନେଲ୍ ରହିଛି ଯାହା ଯେକୌଣସି ପ୍ରକାର ଆଲୋକ ଦ୍ୱାରା ଚାର୍ଜ ହୋଇପାରିବ। କଂପାନି ୨୦୦୦ ଏମଏଏଚର ପାଓ୍ଵାର ବ୍ୟାଙ୍କ ଉତ୍ପାଦନ କରୁଛି। ଇନଫୋସିଟିଠାରେ ଥିବା ୟୁନିଟରେ ସେଗୁଡ଼ିକୁ ଉତ୍ପାଦନ କରାଯାଉଛି । ପାଓ୍ଵାର ବ୍ୟାଙ୍କର ଦୁଇଟି ମଡେଲ୍ ରହିଛି । ଗୋଟିଏର ମୂଲ୍ୟ ୩୫୦୦ ଟଙ୍କା ଓ ଅନ୍ୟଟିର ଦର ୭୦୦୦ ଟଙ୍କା ରହିଛି। ସାତ ହଜାର ଟଙ୍କିଆ ପାଓ୍ଵାର ବ୍ୟାଙ୍କରେ ମୋବାଇଲ ସିମ ଓ ଏସଡି କାର୍ଡ ବ୍ୟବହାର କରାଯାଇପାରିବ। ସେହିପରି କଂପାନିର ଅନ୍ୟ ଏକ ଅଭିନବ ଉତ୍ପାଦ ହେଉଛି ଇନଭର୍ଟର ବଲବ। ଜେନ-ଏକ୍ସ ନାମକ ଏହି ବଲବରେ ମାଇକ୍ରୋ ଇନଭର୍ଟର ବ୍ୟବହାର କରାଯାଇଛି। ସାଧାରଣ ଏଲଇଡି ବଲବ ଭଳି ଦେଖାଯାଉଥିବା ଏହି ବଲବଟି ବିଦ୍ୟୁତ କାଟ ସମୟରେ ୪ ଘଣ୍ଟା ପର୍ଯ୍ୟନ୍ତ ଘରକୁ ଆଲୋକିତ କରିପାରିବ। ଏହା ଭିତରେ ଥିବା ବ୍ୟାଟେରି ଅଧ ଘଣ୍ଟାରେ ଚାର୍ଜ ହୋଇଯିବ। ଏହି ବଲବକୁ ଲୋକମାନେ ଟର୍ଚ ଭାବେ ମଧ୍ୟ ବ୍ୟବହାର କରିପାରିବେ ବୋଲି ସୁଶାନ୍ତ କହିଛନ୍ତି। ଏହି ବଲବର ମୂଲ୍ୟ ୨୦୦-୩୦୦ ଟଙ୍କା ଭିତରେ ରହିଛି।
ଆଗାମୀ ଦିନରେ ସୁଶାନ୍ତ ସ୍ମାର୍ଟ ଓ୍ଵାଚ୍ ଆଣିବାକୁ ଯୋଜନା ରଖିଛନ୍ତି। ଏହା ହେଲଥ ବ୍ୟାଣ୍ଡ ଭଳି କାମ କରିବ। ଏହା ମହିଳାମାନଙ୍କୁ ମଧ୍ୟ ସୁରକ୍ଷା ପ୍ରଦାନ କରିବ। ସେଭଳି ବ୍ୟବସ୍ଥା ଏହି ସ୍ମାର୍ଟ ଓ୍ଵାଚରେ ରହିବ। ଏହାର ନାମ ସି-ଓ୍ଵାଚ୍ ରଖାଯାଇଛି। ବର୍ତ୍ତମାନ ଏହାର ପରୀକ୍ଷା ନିରୀକ୍ଷା ଚାଲିଛି । ୟୁନିଟ-୮ ଡିଏଭି ସ୍କୁଲ୍ରୁ ପାଠ ପଢ଼ିଥିବା ସୁଶାନ୍ତ ଆଇସର ଭୋପାଳରେ ବିଏସସି ଓ ଓରିଏଣ୍ଟାଲ ବିଶ୍ୱବିଦ୍ୟାଳୟରେ ବି ଟେକ୍ ପାଠ ପଢ଼ିଛନ୍ତି।