ଇଂରାଜୀ ବିଷୟ ଭାରି କଷ୍ଟ! ଚଳିତ ବର୍ଷ ମାଟ୍ରିକରେ ଇଂରାଜୀରେ ଫେଲ୍ ହୋଇଛନ୍ତି ୬୦ ହଜାର ଛାତ୍ରଛାତ୍ରୀ, ରିପୋର୍ଟ ମାଗିଲା ଗଣଶିକ୍ଷା ବିଭାଗ
କନକ ବ୍ୟୁରୋ : ଇଂରାଜୀ ପାରୁନାହାନ୍ତି ଓଡିଆ ପିଲା । ଚଳିତ ବର୍ଷ ମାଟ୍ରିକ ପରୀକ୍ଷାରେ ଇଂରାଜୀରେ ଫେଲହାର ବଢିଛି । ୧ଲକ୍ଷ ୬୩ ହଜାର ୯୫୪ ଜଣ ଫେଲ୍ ହୋଇଥିବା ବେଳେ ସେଥିମଧ୍ୟରୁ ୬୦ ହଜାର ଛାତ୍ରଛାତ୍ରୀ କେବଳ ଇଂରାଜୀରେ ଫେଲ୍ ହୋଇଛନ୍ତି । ସେହିପରି ଇ-ଗ୍ରେଡରେ ପାସ୍ କରିଥିବା ୭୩ ପ୍ରତିଶତ ଛାତ୍ରଛାତ୍ରୀ ଇଂରାଜୀରେ ଅଳ୍ପକେ ପାସ୍ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଚଳିତ ବର୍ଷ ମାଟ୍ରିକ ପରୀକ୍ଷାରେ ୫ଲକ୍ଷ ୬୨ହଜାର ୨୧୩ଜଣ ଛାତ୍ରଛାତ୍ରୀ ପରୀକ୍ଷା ଦେଇଥିଲେ ଏବଂ ପାସହାର ରହିଥିଲା ୭୦.୭୮ ପ୍ରତିଶତ । ସେଥିମଧ୍ୟରୁ ୧ଲକ୍ଷ ୬୩ହଜାର ୯୫୪ ଜଣ ଛାତ୍ରଛାତ୍ରୀ ଫେଲ ହୋଇଛନ୍ତି । ତେବେ ଗୁରୁତ୍ୱପୂର୍ଣ୍ଣ କଥା ହେଉଛି ୬୦ହଜାର ଛାତ୍ରଛାତ୍ରୀ କେବଳ ଇଂରାଜୀରେ ଫେଲ ହୋଇଛନ୍ତି । ସେହିପରି ‘ଇ’ ଗ୍ରେଡ୍ ରଖି ପାସ କରିଥିବା ଛାତ୍ରଛାତ୍ରୀ ହେଉଛନ୍ତି ୧ଲକ୍ଷ ୨୨ହଜାର ୬୨ଜଣ । ସେଥିମଧ୍ୟରୁ ୭୩ ପ୍ରତିଶତ ଛାତ୍ରଛାତ୍ରୀ ଇଂରାଜୀରେ ଜଷ୍ଟ ପାସ କରିଛନ୍ତିା
ବର୍ଷ ବର୍ଷ ଧରି ଇଂରାଜୀରେ ପାସ୍ ହାର କମିଚାଲିଥିବା ବେଳେ ଗଣଶିକ୍ଷା ବିଭାଗର ଚିନ୍ତା ବଢିଯାଇଛି । ଚଳିତ ବର୍ଷ ଇଂରାଜୀରେ ଖରାପ କରିଥିବା ସ୍କୁଲଗୁଡିକୁ ରିପୋର୍ଟ ମାଗିଛି ଗଣଶିକ୍ଷା ବିଭାଗ । ମନ୍ତ୍ରୀ କହିଛନ୍ତି, ଶୂନ ଫଳ କରିଥିବା ୮୨ଟି ସ୍କୁଲ ବିରୋଧରେ କାର୍ଯାନୁଷ୍ଠାନ ନିଆଯିବ । ଏଥିସହ ଛାତ୍ରଛାତ୍ରୀଙ୍କୁ ସ୍କୁଲସ୍ତରରେ ସ୍ପୋକନ ଇଂଲିସ କ୍ଲାସ ଯୋଗାଇ ଦିଆଯିବ ।
ଚଳିତବର୍ଷ ମାଟ୍ରିକ ରେଜଲ୍ଟର ପାସହାର ଯେତିକି ଚିନ୍ତାଜନକ ତାଠାରୁ ଅଧିକ ଚିନ୍ତାଜନକ ହୋଇଛି ଇଂରାଜୀରେ ଫେଲ୍ ସଂଖ୍ୟା ବୃଦ୍ଧି । ବିଷୟ ଭିତିକ ଶିକ୍ଷକଙ୍କ ଅଭାବ, ୪୦ ହଜାର ଶିକ୍ଷକ ପଦବୀ ଖାଲି ଓ ତୃଣମୂଳ ସ୍ତରରେ ଇଂରାଜୀ ପଢାଇବାରେ ବିଫଳତା, ମୁଖ୍ୟକାରଣ ବୋଲି କହୁଛନ୍ତି ଶିକ୍ଷାବିତ ।