କାହିଁକି ହେଲା ହେଲିକପ୍ଟର ଦୁର୍ଘଟଣା? କ’ଣ କହୁଛି ଇରାନ ଗଣମାଧ୍ୟମ?
କନକ ବ୍ୟୁରୋ: ହେଲିକପ୍ଟର ଦୁର୍ଘଟଣାରେ ପ୍ରାଣ ହରାଇଲେ ଇରାନ ରାଷ୍ଟ୍ରପତି ଇବ୍ରାହିମ୍ ରଇସି । ଆଜେରବୈଜାନରୁ ଏକ କାର୍ଯ୍ୟକ୍ରମରେ ଯୋଗଦେଇ ଫେରିବା ସମୟରେ ତାଙ୍କ ହେଲିକପ୍ଟର ଦୁର୍ଘଟଣାର ସମ୍ମୁଖୀନ ହୋଇଥିଲା । ଏଥିରେ ରାଷ୍ଟ୍ରପତି ରଇସିଙ୍କ ସମେତ ଇରାନର ବୈଦେଶିକ ମନ୍ତ୍ରୀ ହୋସେନ୍ ଅମିରାବ୍ଦ୍ଦୁଲାହିଆନ ମଧ୍ୟ ପ୍ରାଣ ହରାଇଛନ୍ତି । ଦିର୍ଘ ଘଂଟାର ସର୍ଚ୍ଚ ଅପରେସନ୍ ପରେ ଦୁର୍ଘଟଣା ସ୍ଥଳରେ ହେଲିକପ୍ଟରର ଭଗ୍ନାବିଶେଷ ମିଳିଛି ।..
Kanak News is now on WhatsApp
Join and get latest news updates delivered to you via WhatsApp
ରବିବାବର, ଇରାନ ସମୟ ଅପରାହ୍ଣ ୩ଟା । ଆଜେରବୈଜାନରେ ଏକ କାର୍ଯ୍ୟକ୍ରମରେ ଯୋଗ ଦେଇ ଫେରୁଥିଲେ ରାଷ୍ଟ୍ରପତି ଇବ୍ରାହିମ୍ ରଇସି । ସାଥିରେ ଥିଲେ ବୈଦେଶିକ ମନ୍ତ୍ରୀ ହୋସେନ୍ ଅମିରାବ୍ଦ୍ଦୁଲାହିଆନ ସୁରକ୍ଷାକର୍ମୀଙ୍କ ସମେତ ଅନ୍ୟ କର୍ମଚାରୀ । ହଠାତ୍ ରାଷ୍ଟ୍ରପତି ରଇସିଙ୍କ ହେଲିକପ୍ଟର ସହ ଯୋଗାଯୋଗ ସମ୍ପୂର୍ଣ୍ଣ ବିଛିନ୍ନ ହୋଇଗଲା । ଏହାପରେ ବାହାରିଲା ସର୍ଚ୍ଚ ଅପରେସନ୍ । ୧୭ ଘଂଟାର ସର୍ଚ୍ଚ ଅପରେସନ୍ ପରେ ସାମ୍ନାକୁ ଆସିଥିଲା ଦୁର୍ଘଟଣାସ୍ଥଳର ଦୃଶ୍ୟ ।
ହେଲିକପ୍ଟର ଯେଉଁଥିରେ ରାଷ୍ଟ୍ରପତି ରଇସି, ବୈଦେଶିକ ମନ୍ତ୍ରୀଙ୍କ ସମେତ ୯ଜଣ ବ୍ୟକ୍ତି ଯାତ୍ରା କରୁଥିଲେ । ହେଲିକପ୍ଟରର ଭଗ୍ନାବିଶେଷ ଦେଖି ଅନୁମାନ କରାଯାଇ ପାରିବ ଯେ, ଏହି ଦୁର୍ଘଟଣାରୁ କେହି ବି ବର୍ତି ଥିବେ । ଅନ୍ତର୍ଜାତୀୟ ଖବର ସରବାରହ ସଂସ୍ଥା ରଏଟର୍ସର ସୂଚନା ଅନୁସାରେ ଇରାନ ବରିଷ୍ଠ ଅଧିକାରୀଙ୍କ ପକ୍ଷରୁ ସୂଚନା ମିଳିଛି ଯେ, ରାଷ୍ଟ୍ରପତି ଇବ୍ରାହିମ୍ ରଇସି ଓ ବୈଦେଶିକ ମନ୍ତ୍ରୀ ହୋସେନ୍ ଅମିରାବଦ୍ଦୁଲାହିଆନ ହେଲିକପ୍ଟର ଦୁର୍ଘଟଣାରେ ମୃତ୍ୟୁ ବରଣ କରିଛନ୍ତି । ସେମାନଙ୍କ ମୃତଦେହ ଉଦ୍ଧାର କରିବାର ଦୃଶ୍ୟ ମଧ୍ୟ ସାମ୍ନାକୁ ଆସିଛି । ଏହି ସବୁ ଫଟୋରୁ ସ୍ପଷ୍ଟ ଜଣା ପଡୁଛି ଯେ, ଘନ ବାଦଲ ଏବଂ ଥଣ୍ଡା ପାଗ ଭିତରେ ଉଦ୍ଧାର କାର୍ଯ୍ୟ କରାଯାଇଛି ।
ପ୍ରେସିଡେଂଟ୍ ବିଫୋର କ୍ରାସ୍.. ଏ ଦୃଶ୍ୟ ହେଉଛି ରାଷ୍ଟ୍ରପତି ରଇସିଙ୍କ ଶେଷ ଫଟୋଗ୍ରାଫ । ରବିବାର ଅଜୈରବେଜାନର ଖୋଦାଫରିନ୍ ବନ୍ଧର ଉଦ୍ଘାଟନ କାର୍ଯ୍ୟକ୍ରମରେ ଯୋଗ ଦେବାକୁ ଯାଇଥିଲେ । ଏ ହେଉଛି, ସେହି ସମୟର ଦୃଶ୍ୟ । ଏହି କାର୍ଯ୍ୟକ୍ରମ ସାରି ହେଲିକପ୍ଟରରେ ପୂର୍ବ ଅଜୈରବେଜାନ ରାଜଧାନୀ ତବରୈଜ୍ ଯାଉଥିଲେ ରଇସି । ହେଲେ ବାଟରେ ହିଁ ତାଙ୍କ ହେଲିକପ୍ଟର ଦୁର୍ଘଟଣାର ଶିକାର ହୋଇଥିଲା । ଇରାନ ମିଡିଆ ରିପୋର୍ଟ୍ ଦୁର୍ଘଟଣାର ପ୍ରାରମ୍ଭିକ କାରଣ ଖରାପ ପାଣିପାଗକୁ ଦର୍ଶାଇଛି । ତେହେରାନ୍ ଟାଇମ୍ସର ରିପୋର୍ଟ ଅନୁସାରେ –
– ଖରାପ ପାଣିପାଗ ପାଇଁ ହେଲିକପ୍ଟରଟି ଦୁର୍ଘଟଣାଗ୍ରସ୍ତ ହୋଇଥାଇପାରେ
– ଘନ କୁହୁଡ଼ି ପାଇଁ ହେଲିକପ୍ଟର ‘ହାର୍ଡ ଲ୍ୟାଣ୍ଡିଂ’ କରିଥାଇପାରେ
– ଦୁର୍ଘଟଣା ରାଜଧାନୀ ତେହରାନ ଠାରୁ ୬୦୦ କିଲୋମିଟର ଦୂରରେ ଘଟିଛି
– ଉତ୍ତର-ପଶ୍ଚିମ ଅଜୈରବେଜାନର ଜୋଲ୍ଫା ନିକଟରେ ଦୁର୍ଘଟଣା
ସବୁଠାରୁ ବଡ କଥା ହେଉଛି ରାଷ୍ଟ୍ରପତି ରଇସିଙ୍କ ହେଲିକପ୍ଟର ସହ ଅନ୍ୟ ଦୁଇଟି ହେଲିକପ୍ଟର ସୁରକ୍ଷା ପାଇଁ ନିୟୋଜିତ ଥିଲେ । ସେହି ଦୁଇ ହେଲିକପ୍ଟର ସୁରକ୍ଷିତ ଭାବେ ଗନ୍ତବ୍ୟ ସ୍ଥଳରେ ପହଁଚି ସାରିଥିବାବେଳେ, ରଇସିଙ୍କ ହେଲିକପ୍ଟର ହିଁ ଦୁର୍ଘଟଣାଗ୍ରସ୍ତ ହୋଇଛି । ଯାହା ମନରେ ସନ୍ଦେହ ସୃଷ୍ଟି କରୁଛି ।
ଯେଉଁ ସମୟରେ ଇରାନ୍ ରାଷ୍ଟ୍ରପତିଙ୍କ ହେଲିକପ୍ଟର ଦୁର୍ଘଟଣା ହୋଇଛି, ତାହା ଅନେକ ଗୁଡିଏ ସନ୍ଦେହ ସୃଷ୍ଟି କରୁଛି । ଇସ୍ରାଏଲ ଓ ହମାସ ଯୁଦ୍ଧ ଭିତରେ ଇସ୍ରାଏଲକୁ ବିରୋଧ କରି ଆସୁଥିବା ଇରାନ ରାଷ୍ଟ୍ରପତିଙ୍କୁ ହତ୍ୟା କରିବା ପାଇଁ ଏହା ଏକ ଭୟଙ୍କର ଷଡଯନ୍ତ୍ର ହୋଇଥାଇପାରେ ବୋଲି ମଧ୍ୟ ପ୍ରଶ୍ନ ଉଠୁଛି । ଇରାନ ହମାସକୁ ସମର୍ଥନ କରୁଥିବାବେଳେ କ୍ରମାଗତ ଭାବେ ଇସ୍ରାଏଲ ଓ ଆମେରିକାକୁ ବିରୋଧ କରି ଆସୁଛନ୍ତି । ତେଣୁ ହେଲିକପ୍ଟର ଦୁର୍ଘଟଣା ଏକ ଯୋଜନାବଦ୍ଧ ହତ୍ୟାକାଣ୍ଡ ହୋଇଥାଇପାରେ ବୋଲି ସନ୍ଦେହ କରାଯାଉଛି ।
ଇବ୍ରାହିମ୍ ରଇସିଙ୍କ ମୃତ୍ୟୁକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦୁଃଖ ପ୍ରକାଶ କରିଛନ୍ତି । ସେ କହିଛନ୍ତି, ଭାରତ – ଇରାନ ଦ୍ୱିପାକ୍ଷିକ ସମ୍ପର୍କକୁ ମଜବୁତ କରିବାରେ ରାଷ୍ଟ୍ରପତି ରଇସିଙ୍କ ବିଶେଷ ଅବଦାନ ରହିଛି । ତାଙ୍କ ଅକାଳ ବିୟୋଗରେ ରଇସିଙ୍କ ପରିବାର ଓ ଇରାନବାସୀଙ୍କୁ ସମବେଦନା ଜଣାଇଛନ୍ତି ପ୍ରଧାନମନ୍ତ୍ରୀ ମୋଦୀ । କେବଳ ସେତିକି ନୁହେଁ ଏ ଦୁଃଖ ସମୟରେ ଭାରତ, ଇରାନ ସହ ଛିଡା ହୋଇଥିବା କହିଛନ୍ତି ନରେନ୍ଦ୍ର ମୋଦୀ ।