ଋଷର ୪ ସୈନିକଙ୍କୁ ବନ୍ଧକ ରଖିଲା ୟୁକ୍ରେନ୍! କହିଲା ନିଜର ପୁଅକୁ ଆସି ୟୁକ୍ରେନରୁ ନେଇଯାଅ ।
କନକ ବ୍ୟୁରୋ : ଋଷ-ୟୁକ୍ରେନ୍ ଯୁଦ୍ଧ ଚାଲିଥିବା ବେଳେ ଗୋଟିଏ ପରେ ଗୋଟିଏ ହୃଦୟ ବିଦାରକ ଦୃଶ୍ୟ ଏବେ ସାମ୍ନାକୁ ଆସୁଛି । ଋଷର ଆକ୍ରମଣରେ ୟୁକ୍ରେନର ଅନେକ ସହରରେ ହାହାକାର ପଡିଛି । ଆଉ ଏସବୁ ଭିତରେ ୟୁକ୍ରେନ୍ ସେନା ୪ ଜଣ ଋଷ ସୈନିକଙ୍କୁ ନିଜ କବଜାକୁ ନେଇଛି । ୟୁକ୍ରେନର ବୈଦଶିକ ମନ୍ତ୍ରାଳୟ ଏହାର ଚିତ୍ର ଜାରି କରି ଋଷକୁ କଡା ସନ୍ଦେଶ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ୟୁକ୍ରେନର ବିଦେଶ ମନ୍ତ୍ରାଳୟ କହିଛି ଯେ, ଧରାପଡିଥିବା ଋଷ ସୈନିକଙ୍କ ମା’,ପତ୍ନୀ, ସନ୍ତାନ ନିଜର ପୁଅକୁ ଆସି ୟୁକ୍ରେନରୁ ନେଇଯାଅ । ଏମାନେ ସମସ୍ତେ ନିରୀହ ୟୁକ୍ରେନବାସୀଙ୍କୁ ମାରି ରକ୍ତର ହୋଲି ଖେଳିବାକୁ ଚାହିଁଥିଲେ । ଲୋକଙ୍କର ଘରକୁ ଧ୍ୱଂସ କରିବାକୁ ଆସିଥିଲେ । କିନ୍ତୁ ୟୁକ୍ରେନର ଲୋକ ଏମାନଙ୍କୁ ଫୁଲରେ ନୁହେଁ ବରଂ ବନ୍ଧୁକ ସହ ସ୍ୱାଗତ କରିଥିଲେ । ଋଷ ସରକାର ଏହି ଯୁଦ୍ଧକୁ ଶେଷ କରନ୍ତୁ ଏବଂ ନିଜର ଲୋକଙ୍କୁ ଏଠାରୁ ନିଅନ୍ତୁ ।
ଗୋଟିଏ ପଟେ ଋଷ ଆକ୍ରମଣ ଜାରି ରଖିଥିବା ବେଳେ ଏହାର ମୁହଁତୋଡ ଜବାବ ଦେଉଛି ୟୁକ୍ରେନ୍ । ରାଷ୍ଟ୍ରପତି ଜେଲେନସ୍କିଙ୍କ ଆହ୍ୱାନ କ୍ରମେ ଋଷର ସାଂସଦ ମଧ୍ୟ ଏବେ ବନ୍ଧୁକ ଉଠାଇଲେଣି । ଏଭଳି ସ୍ଥିତିରେ ଋଷ ସେନା ଏବେ ୟୁକ୍ରେନର ରାଜଧାନୀ ମୁହାଁ ହୋଇଛନ୍ତି । ଖୁବଶୀଘ୍ର ୟୁକ୍ରେନର ରାଜଧାନୀକୁ କବଜା କରିପାରେ ଋଷ । ଆଉ ଏହାପୂର୍ବରୁ ମିସାଇଲ ମାଡ କରି ବିସ୍ଫୋରଣ କରୁଛି ଋଷ ।
ଏସବୁକୁ ଦୃଷ୍ଟିରେ ରଖି ୟୁକ୍ରେନର ରାଜଧାନୀ କିବରେ କର୍ଫ୍ୟୁ ଘୋଷଣା କରାଯାଇଛି । ସନ୍ଧ୍ୟା ୫ଟାରୁ ସକାଳ ୮ଟା ପର୍ଯ୍ୟନ୍ତ ଏହି କର୍ଫ୍ୟୁ ଜାରି କରାଯାଇଛି । ଏପରିକି କିବର ମେୟର କହିଛନ୍ତି ଯିଏ ଏହି କର୍ଫ୍ୟୁ ନିୟମ ପାଳନ ନ କରିବ ତାଙ୍କୁ ଶତ୍ରୁ ଭାବେ ବିବେଚନା କରାଯିବ ।