କନକ ବ୍ୟୁରୋ : ଗୋଟିଏ ପଟେ ଶ୍ରୀଲଙ୍କାରେ ତୈଳ ସଂକଟ ଶ୍ରୀଲଙ୍କାବାସୀଙ୍କ ଦୈନଦିନ ଜୀବନକୁ ଭାରିମାତ୍ରାରେ ପ୍ରଭାବିତ କରିଥିବା ବେଳେ ସମାନ ପରିସ୍ଥିତି ଭାରତରେ ଦେଖା ଦେଇଛି । ଏନେଇ ତ୍ରିପୁରା ରାଜ୍ୟ ସରକାର ରାଜ୍ୟର ଗାଡି ଚାଳକଙ୍କ ପାଇଁ ଏକ ବଡ କଟକଣା ଲଗାଇଛନ୍ତି । ନୂଆ ମୁଖ୍ୟମନ୍ତ୍ରୀ ମାଣିକ ସାହାଙ୍କ ନିର୍ଦ୍ଦେଶ ମୁତାବକ ଏବେ ରାଜ୍ୟର ୨ ଚକିଆ ଚାଳକଙ୍କୁ ତେଲ ଟାଙ୍କିରୁ ଦୈନିକ ୨୦୦ ଟଙ୍କାର ପେଟ୍ରୋଲ ଓ କାର ଚାଳକଙ୍କୁ ଦୈନିକ ସର୍ବାଧିକ ୧ ହଜାର ଟଙ୍କାର ପେଟ୍ରୋଲ ମିଳିପାରିବ ।
Kanak News is now on WhatsApp
Join and get latest news updates delivered to you via WhatsApp
ଏହାର କାରଣ ଭାବେ କୁହାଯାଇଛି କି, ଆସାମରେ ସାଂଘାତିକ ବନ୍ୟା ପରିସ୍ଥିତି କାରଣରୁ ତ୍ରିପୁରାକୁ ତୈଳ ଯୋଗାଣ ବାଧାପ୍ରାପ୍ତ ହୋଇଛି । ଆସାମର ସଡକ ଓ ପରିବହନ ଏବେ ବାଧାପ୍ରାପ୍ତ ହୋଇଛି । ଏହାସହ ରେଳ ଧାରଣାରେ ମାଟି ଅତଡା ଖସିପଡିବା ଓ ବର୍ଷାପାଣି ଚାଲୁଥିବାରୁ ଆସାମ ଦେଇ ତ୍ରିପୁରା ଆସୁଥିବା ତୈଳ ଟ୍ୟାଙ୍କରଗୁଡିକ ଅଟକି ରହିଛି । ଆସାମ ବନ୍ୟା ସ୍ଥିତି ସୁଧୁରିବା ସହ ଗମନା ଗମନ ସ୍ୱଭାବିକ ହେବା ପରେ ଏହି କଟକଣା ହଟାଇ ଦିଆଯାଇପାରେ ବୋଲି ଅନୁମାନ କରାଯାଉଛି ।
କହିରଖୁ କି ଦେଶରେ ଏବେ ତୈଳଦର ଆକାଶଛୁଆଁ ହୋଇଛି । ବିଭିନ୍ନ ରାଜ୍ୟରେ ପେଟ୍ରୋଲ ୧୧୩-୧୨୦ ଟଙ୍କା ଲିଟର ପହଂଚିଥିବା ବେଳେ ଡିଜେଲ ବି ୧୦୩-୧୧୦ ପ୍ରତି ଲିଟର ପହଂଚି ସାରିଛି । ଏହାସହ ରୋଷେଇ ଗ୍ୟାସର ଦରବୃଦ୍ଧି ଏବେ ଗୃହିଣୀଙ୍କ ପାଇଁ ଚିନ୍ତାର କାରଣ ପାଲଟିଛି । ଆଜିର ଦରବୃଦ୍ଧି ପରେ ୧୪.୩ ଲିଟର ଇନ୍ଧନ ଗ୍ୟାସ ଟାଙ୍କିର ଦାମ ୧ ହଜାର ଟଙ୍କା ଛୁଇଁଛି । ଏଭଳି ସ୍ଥଳେ ପରିମାଣ ଉପରେ ରୋକ ଲଗାଇ ଲୋକମାନଙ୍କୁ ଅସୁବିଧାରେ ପକାଇଛନ୍ତି ତ୍ରିପୁରା ସରକାର ।