ବିଧାନସଭାରେ ଚାଲିଛି ଶୀତ ଅଧିବେଶନ, ପଦ୍ମପୁରରେ ପ୍ରଚାର କରୁଛନ୍ତି ମନ୍ତ୍ରୀ: କକ୍ଷତ୍ୟାଗ କଲେ ବିଜେପି ସଦସ୍ୟ
କନକ ବ୍ୟୁରୋ: ଗୋଟିଏ ପଟେ ସମବାୟ ମନ୍ତ୍ରୀଙ୍କ ବଦଳରେ ବିଧାନସଭାରେ ଉତର ରଖୁଛନ୍ତି ପଂଚାୟତରାଜ ମନ୍ତ୍ରୀ ପ୍ରଦୀପ ଅମାତ । ଆଉ ଅନ୍ୟପଟେ ପଦ୍ମପୁର ଉପନିର୍ବାଚନ ପାଇଁ ସେଠାରେ ଦଳୀୟ ପ୍ରାର୍ଥୀଙ୍କ ପାଇଁ ପ୍ରଚାର କରୁଛନ୍ତି ସମବାୟ ମନ୍ତ୍ରୀ ଅତନୁ ସବ୍ୟସାଚୀ ନାୟକ । ଯାହାକୁ ବିରୋଧ କରି ଅସନ୍ତୋଷ ପ୍ରକାଶ କରିବା ସହ ବାଚସ୍ପତିଙ୍କ ପୋଡିୟମ ତଳେ ଧାରଣା ଦେଇଥିଲେ ବିଜେପି ବିଧାୟକ । ହେଲେ, ଧାରଣା ଦେବା ପରେ କିଛି ଫଳ ନମିଳିବାରୁ ଶେଷରେ କକ୍ଷତ୍ୟାଗ କରିଥିଲେ ବିଜେପି ସଦସ୍ୟ ।
Kanak News is now on WhatsApp
Join and get latest news updates delivered to you via WhatsApp
କେବଳ ସମବାୟ ମନ୍ତ୍ରୀ ନୁହଁନ୍ତି, ବିଧାନସଭାର ଶୀତ ଅଧିବେଶନ ଚାଲିଥିଲେ ବି ପଦ୍ମପୁରରେ ଡେରା ପକାଇଛନ୍ତି ରାଜ୍ୟ ସରକାରଙ୍କ ଆହୁରି ଅନେକ ମନ୍ତ୍ରୀ । ଦଳୀୟ ପ୍ରାର୍ଥୀଙ୍କ ପାଇଁ ଶନିବାର ପ୍ରଚାର କରିଛନ୍ତି, କୃଷି ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ, ଗଣଶିକ୍ଷା ମନ୍ତ୍ରୀ ସମୀର ଦାସ, ବୟନଶିଳ୍ପ ମନ୍ତ୍ରୀ ରୀତା ସାହୁ, ଉଚ୍ଚଶିକ୍ଷା ମନ୍ତ୍ରୀ ରୋହିତ ପୂଜାରୀ ଓ ଅର୍ଥ ମନ୍ତ୍ରୀ ନିରଞ୍ଜନ ପୂଜାରୀ । ଯାହାକୁ କଡା ସମାଲୋଚନା କରିଛି ବିଜେପି । ବିଜେପି ବିଧାୟକ ପ୍ରଶ୍ନ କରିଛନ୍ତି, ରାଜ୍ୟ ସରକାରଙ୍କ ପାଇଁ ବିଧାନସଭା ବଡ ନା ପଦ୍ମପୁର ଉପନିର୍ବାଚନ ବଡ ।
ବିଜେପିର ଅଭିଯୋଗ ପରେ ଜବାବ ରଖିଛି ବିଜେଡି । ମନ୍ତ୍ରୀ ପ୍ରଦୀପ ଅମାତ କହିଛନ୍ତି, ଏହା ଏକ ସାମୁହିକ ଦାୟିତ୍ୱ । ଯଦି ମନ୍ତ୍ରୀ ଅନୁପସ୍ଥିତ ରହିବେ ସେ ଅନ୍ୟମନ୍ତ୍ରୀଙ୍କୁ ପ୍ରସ୍ତାବ ଦେବେ । ସେହି ପ୍ରସ୍ତାବକୁ ବାଚସ୍ପତି ସମ୍ମତି ଦେଲେ ସେ ଉତ୍ତର ରଖିପାରିବେ । ଏମିତି କି ବିଧାୟକଙ୍କ ପ୍ରଶ୍ନ ଆଉ ଜଣେ ମଧ୍ୟ ପଚାରି ପାରିବେ । .. ଅନ୍ୟପଟେ ବିଜେପି ବିଧାୟକମାନେ ଆଲୋଚନାରେ ଭାଗ ନନେବାକୁ ନେଇ ସମାଲୋଚନା କରିଛି କଂଗ୍ରେସ ।
ଦୁଇ ଦିନ ହୋହଲା ପରେ ତୃତୀୟ ଦିନରେ ସ୍ୱାଭାବିକ ଭାବେ ଚାଲିଥିଲା ବିଧାନସଭା । ପ୍ରଶ୍ନକାଳ ପରେ ଚାଷୀ ପ୍ରସଙ୍ଗରେ କଂଗ୍ରେସ ଆଣିଥିବା ମୁଲତବୀ ପ୍ରସ୍ତାବ ଉପରେ ଆଲୋଚନା ହୋଇଥିଲା । ହେଲେ, ଆଲୋଚନାରେ ବିଭାଗୀୟ ମନ୍ତ୍ରୀଙ୍କ ବଦଳରେ ଉତର ରଖିଥିଲେ ପଂଚାୟତରାଜ ମନ୍ତ୍ରୀ । ଦୁଇ ଦିନ ତଳେ ଅର୍ଥମନ୍ତ୍ରୀଙ୍କ ବଦଳରେ ଅତିରିକ୍ତ ବଜେଟ ଉପସ୍ଥାପନ କରିଥିଲେ ପଂଚାୟତରାଜ ମନ୍ତ୍ରୀ । ଯାହାକୁ ନେଇ ରାଜନୈତିକ ବୟାନବାଜି ହୋଇଥିଲା ।