କନକ ବ୍ୟୁରୋ: ପଦ୍ମପୁର ନିର୍ବାଚନମଣ୍ଡଳିର ୬୦ ପ୍ରତିଶତ ଚାଷୀ ପରିବାର ଥିବା ବେଳେ ୨୦ ପ୍ରତିଶତ ଅଛନ୍ତି ବୁଣାକାର ପରିବାର । ଆଉ ବୁଣାକାରଙ୍କ ଏହି ଭୋଟ ବ୍ୟାଙ୍କକୁ ନିଜ ସପକ୍ଷକୁ ନେବା ପାଇଁ ପ୍ରଚାରରେ ଆସି ନେତା ନାନା ପ୍ରତିଶ୍ରୁତି ଦେଉଛନ୍ତି । ଗ୍ରାଉଣ୍ଡ ଜିରୋକୁ ଯାଇ ବୁଣାକାରଙ୍କ ସମସ୍ୟା ଓ ସ୍ଥିତି ପରଖିଛି କନକ ନ୍ୟୁଜ ଟିମ୍ । ସମୟ ଗଡୁୁଛି, ଜନ ପ୍ରତିନିଧି ବଦଳୁଛନ୍ତି । ହେଲେ ପଦ୍ମପୁର ଅଞ୍ଚଳର ବୁଣାକାରଙ୍କ ଦୁଃଖ ସରୁନାହିଁ । ଖଇରପାଲି ଗାଁରେ ପ୍ରାୟ ୩ ହଜାର ବୁଣାକାର ପରିବାର ଅଛନ୍ତି । ପ୍ରତିଦିନ ୨୫ଶହରୁ ୩ ହଜାର ଶାଢୀ ବୁଣା ହେଉଛି । ୮ଶହରୁ ଆରମ୍ଭ କରି ୪୦ ହଜାର ଟଙ୍କାର ଶାଢୀ ଖଇରିପାଲିର କାରିଗର ତିଆରି କରୁଛନ୍ତି । ଏଠାରୁ ଶାଢୀ ଦେଶ ବିଦେଶକୁ ମଧ୍ୟ ଯାଉଛି । ହେଲେ ପାଖରେ ବଜାର ସୁବିଧା ନଥିବାରୁ ଭଲ ବିକ୍ର ହେଉନାହିଁ ବୋଲି ବୁଣାକାର କହିଛନ୍ତିା
Kanak News is now on WhatsApp
Join and get latest news updates delivered to you via WhatsApp
ବଜାରରେ ସମ୍ବଲପୁରୀ ଶାଢିର ଚାହିଦା ରହିଛି, କିନ୍ତୁ ଶାଢୀ ବୁଣି ପରିବାର ଚଳା଼ଇବା କଷ୍ଟକର ହୋଇପଡିଛି । କରୋନା ବିପର୍ଯ୍ୟୟ ପରେ ଜିଏସଟି ମାଡ ବୁଣାକାର ପରିବାରଙ୍କ ଦୁଃଖ ବଢାଇଦେଇଛି । ଜିଏସଟି ବୃଦ୍ଧି ଯୋଗୁଁ ବୁଣାକାର ତାଙ୍କ ଆୟର ସିଂହଭାଗ ଟିକସ ବାବଦରେ ପୈଠ କରୁଛନ୍ତି । ପୂର୍ବରୁ ୫% ଜିଏସଟି ଦେଉଥିଲେ । ଏବେ ୧୮% ଜିଏସଟି ଗଣୁଛନ୍ତି । ପୂର୍ବରୁ ୧ ବେଲ ସୁତାକୁ ୩୮ହଜାର ଟଙ୍କା ଦେଇ କିଣୁଥିଲେ । ଏବେ ଜିଏସଟି ଯୋଗୁଁ ୧ ବେଲ ସୁତାକୁ ୫୮ହଜାର ଟଙ୍କା ଦେଇ କିଣିବାକୁ ପଡୁଛି ।
ଖଇରିପାଲିର ଶାଢୀ ମେସିନ କାରଖାନାରେ ଦୈନିକ ମହିଳା ଓ ପୁରୁଷକୁ ମିଶାଇ ୧୫ ଜଣ କାରିଗର କାମ କରୁଛନ୍ତି । ସେମାନଙ୍କ ଦୈନିକ ମଜୁରୀ, ସୁତାର ଦାମ, ଶାଢି ତିଆରି ପାଇଁ ପରିଶ୍ରମକୁ ହିସାବ କଲେ ଶାଢି ବିକ୍ରିରୁ ମିଳୁଥିବା ଟଙ୍କା ସେମାନଙ୍କୁ ଲାଭ ଦେଉ ନାହିଁ ବୋଲି କହିଛନ୍ତି କାରିଗର । ନିର୍ବାଚନ ଆସେ ଓ ଯାଏ । ହେଲେ ବୁଣାକାରଙ୍କ ପାଇଁ କୌଣସି ସୁବିଧା ହୁଏ ନାହିଁ । ନେତା, ମନ୍ତ୍ରୀ କେହି ବୁଣାକାରଙ୍କ କଥା ବୁଝନ୍ତି ନାହିଁ ବୋଲି କ୍ଷୋଭର ସହ ବୁଣାକାର କନକ ନ୍ୟୁଜ କ୍ୟାମେରାରେ କହିଛନ୍ତି ।