୫୦ ହଜାରରେ ବିକ୍ରି ହେବ ରଥ ଚକ। ମିଳିଛି ୬୦ରୁ ଅଧିକ ଆବେଦନ, ବିଦେଶରୁ ରହିଛି ଦୁଇ
କନକ ବ୍ୟୁରୋ; ବିକ୍ରି ହେବ ଶ୍ରୀଜିଉଙ୍କ ରଥର ଚକ । ଦୀର୍ଘ ୫ବର୍ଷ ପରେ ପୁଣି ଥରେ ରଥ ଚକ ବିକ୍ରି ପ୍ରକ୍ରିୟା ଆରମ୍ଭ କରିଛି ଶ୍ରୀମନ୍ଦିର ପ୍ରଶାସନ । ରଥର ପ୍ରତ୍ୟେକ ଚକର ଦାମ ୫୦ହଜାର ଟଙ୍କା, ପ୍ରଭା ୨୫ ହଜାର ଟଙ୍କା ଓ ଗୁଜର ଦର ୧୦ ହଜାର ଟଙ୍କା ଧାର୍ଯ୍ୟ କରାଯାଇଛି । ଶ୍ରୀଗୁଣ୍ଡିଚା ମନ୍ଦିରରେ ଖତ ଖାଉଥିବା ମହାପ୍ରଭୁଙ୍କ ତିନି ରଥର ଏକାଧିକ ଚକକୁ ମରାମତି କରାଯାଇ ବିକ୍ରି ପ୍ରକ୍ରିୟା ଆରମ୍ଭ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଶ୍ରୀମନ୍ଦିର ପରିଚାଳନା କମିଟିର ନିଷ୍ପତି ଅନୁସାରେ ହୋଇଥିବା ଏସଓପି ଜରିଆରେ ରଥ ଚକ କେଉଁମାନଙ୍କୁ ଦିଆଯିବ, ତାହାର ଏକ ତାଲିକା ମଧ୍ୟ ଚୟନ କରାଯାଇଛି । ଚଳିତ ଥର ରଥଚକ କିଣିବା ପାଇଁ ୬୦ରୁ ଅଧିକ ଆବେଦନ ଆସିଥିଲା ବେଳେ ବିଦେଶରୁ ଦୁଇଟି ଆବେଦନ ହୋଇଛି । ବିଦେଶରେ ଜଗନ୍ନାଥ ସଂସ୍କୃତି ପ୍ରଚାର ପ୍ରସାର କରୁଥିବା ଦୁଇଟି ଅନୁଷ୍ଠାନ ଆବେଦନ କରିଛନ୍ତି । ଶ୍ରୀମନ୍ଦିର ପ୍ରଶାସନର ଏସଓପି ଅନୁସାରେ ଧାର୍ମିକ ଅନୁଷ୍ଠାନ ସହ ସରକାରୀ କାର୍ଯ୍ୟାଳୟକୁ ରଥ ଚକ ଦାନ ସୂତ୍ରରେ ଦିଆଯାଇଥାଏ । ରଥ ଚକ ଦେବା ପାଇଁ ୪ଟି ବର୍ଗ କରାଯାଇଛି । ଜଗନ୍ନାଥ ସଂସ୍କୃତିର ପ୍ରଚାର ପ୍ରସାର କରୁଥିବା ମନ୍ଦିର, ମଠ, ଧାର୍ମିକ ଅନୁଷ୍ଠାନକୁ ପ୍ରାଥମିକତା ଭିତିରେ ଚକ ଦାନ କରାଯାଇଥାଏ । ଦ୍ୱିତୀୟ ବର୍ଗରେ କେନ୍ଦ୍ର ଓ ରାଜ୍ୟ ସରକାରଙ୍କ ସରକାରୀ କାର୍ଯ୍ୟାଳୟ, ତୃତୀୟ ବର୍ଗରେ କର୍ପୋରେଟର ହାଉସ ଓ ଚତୁର୍ଥ ବର୍ଗରେ ସାଧାରଣ ବ୍ୟକ୍ତି ବିଶେଷଙ୍କୁ ଦିଆଯିବାର ବ୍ୟବସ୍ଥା ରହିଛି ।
ପରିଚାଳନା କମିଟି ପକ୍ଷରୁ ପ୍ରସ୍ତୁତ ତାଲିକା ଅନୁସାରେ ରଥ ଚକ ଅନ୍ୟାନ୍ୟ ଅଂଶ ଦିଆଯାଉଥିବା ସୂଚନା ଦେଇଛନ୍ତି ଶ୍ରୀମନ୍ଦିର ନୀତି ପ୍ରଶାସକ । ତେବେ ରଥ ଚକ ଓ ଏହାର ଅଂଶର ସଂରକ୍ଷଣ ପାଇଁ ନିର୍ଦ୍ଧିଷ୍ଟ ନିୟମାବଳୀ ରହିଛି । କେମିତି ରଥ ଚକକୁ ଧାର୍ମିକ ଭାବନା ସହ ସୁରକ୍ଷିତ ରଖିବେ ସେନେଇ ସ୍ୱତନ୍ତ୍ର ସର୍ତାବଳୀ ରହିଛି । ଦାନରେ ଦିଆଯାଇଥିବା ଚକ ଅବା ଅନ୍ୟ ଅଂଶରେ ଶ୍ରୀମନ୍ଦିର ପ୍ରଶାସନର ନାମ ଓ ଯୋଗାଯୋଗ ପାଇଁ ଫୋନ ନମ୍ବର ସହ ଇମେଲ ଆଇଡି ଉଲ୍ଲେଖ ରହିବ । ଯଦି କେହି ରଥ ଚକକୁ ସଂରକ୍ଷିତ ରଖିବାରେ ଅବେହଳା କରନ୍ତି କିମ୍ବା ଅପମାନିତ କଲା ଭଳି କିଛି କାର୍ଯ୍ୟ କରନ୍ତି, ତେବେ ଉଲ୍ଲେଖ ଥିବା ନମ୍ବରରେ ଯେ କେହି ଅଭିଯୋଗ କରିପାରିବେ । ୨୦୧୭ ମସିହା ପରେ ଶ୍ରୀମନ୍ଦିର ପ୍ରଶାସନ ନିକଟରେ ୧୪୦ଟି ରଥ ଚକ ବିକ୍ରି ନ ହୋଇ ନଷ୍ଟ ହେଉଥିଲା । ଆଉ ଏବେ ରଥ ଚକ ବିକ୍ରି ପ୍ରକ୍ରିୟା ଆରମ୍ଭ ହୋଇଥିବାରୁ ଜଗନ୍ନାଥ ପ୍ରେମୀଙ୍କ ମଧ୍ୟରେ ଖୁସି ଦେଖିବାକୁ ମିଳିଛି ।