ଛାତ୍ରଙ୍କୁ ଅପହରଣ କରିନେଲେ ମାଓବାଦୀ । ନିଶାନାରେ ଥିଲା ରାସନ ବୋଝେଇ ଟ୍ରକ, କବଳରେ ପଡ଼ିଗଲେ ୧୨ ବର୍ଷୀୟ ଛାତ୍ର ।
କନକ ବ୍ୟୁରୋ: ପୁଣି ମାଓବାଦୀଙ୍କ ଅଭାବନୀୟ କାଣ୍ଡ । ଛତିଶଗଡ଼ ସୀମା ସୁକୁମା ଜିଲ୍ଲା ଅନ୍ତର୍ଗତ କୋତାଚେରୁ ଠାରୁ ୧୨ ବର୍ଷୀୟ ଛାତ୍ରଙ୍କୁ ମାଓବାଦୀ ଅପହରଣ କରିନେଇଥିବା ଜଣାପଡ଼ିଛି । ସୁକୁମା ଏସପି ଅଭିଷେକ ମୀନାଙ୍କ କହିବା ମୁତାବକ ଛାତ୍ର ଜଣକ କୋଣ୍ଟାରୁ ଭେଜ୍ଜି ଫେରୁଥିବା ସମୟରେ ମାଓବାଦୀମାନେ ତାଙ୍କୁ ଅପହରଣ କରିନେଇଛନ୍ତି । କାରଣ କୋଣ୍ଟାରୁ ଆସୁଥିବା ଏକ ପିଡିଏସ ରାସନ ବୋଝେଇ ଟ୍ରକକୁ ନକ୍ସଲମାନେ ନିଆଁ ଲଗାଇବା ପାଇଁ ଯୋଜନା କରିଥିଲେ । କିନ୍ତୁ ଟ୍ରକ ଡ୍ରାଇଭରର ଉପସ୍ଥିତି ବୁଦ୍ଧି ଯୋଗୁଁ ତାହା ସମ୍ଭବ ହୋଇ ପାରିନଥିଲା ।
Kanak News is now on WhatsApp
Join and get latest news updates delivered to you via WhatsApp
ସେହି ସମୟରେ କୋଣ୍ଟାର ଏକ ଶିକ୍ଷାନୁଷ୍ଠାନରେ ଅଧ୍ୟୟନରତ କରୁଥିବା ୧୨ ବର୍ଷୀୟ ଛାତ୍ର ପୋଡ଼ିୟମ ମୁକେଶ ଘରକୁ ଫେରୁଥିବା ସମୟରେ ନକ୍ସଲଙ୍କ କବଳରେ ପଡ଼ିଯାଇଥିଲା ବୋଲି ଏସପି କହିଛନ୍ତି । ତେବେ ସୂଚନା ମିଳିବା ପରେ ସୁରକ୍ଷା କର୍ମୀମାନେ ମାନେ ସର୍ଚ୍ଚ ଅପରେସନରେ ଯାଇଥିବା ଜଣାପଡିଛି ।
ମାଓବାଦୀଙ୍କ ନିଶାନାରେ ଥିଲା ପିଡ଼ିଏସ ରାସନ ବୋଝେଇ ଟ୍ରକ । ଏବଂ ଟ୍ରକ ଉପରକୁ ଗୁଳିବର୍ଷା ମଧ୍ୟ କରିଥିଲେ ମାଓବାଦୀ । ସେହି ବାଟ ଦେଇ ନିଜ ବାଇକରେ ମୁକେଶ ଘରକୁ ଫେରୁଥିବା ବେଳେ ହଠାତ୍ ନକ୍ସଲଙ୍କ ସମ୍ମୁଖରେ ପଡ଼ିଯାଇଥିଲା । ବାଇକ୍ ଛାଡ଼ି ଦୌଡ଼ି ପଳାଇବାକୁ ଚେଷ୍ଟା କରିଥିଲେ ମଧ୍ୟ ମାଓବାଦୀଙ୍କ କବଳରୁ ବର୍ତ୍ତି ପାରିନଥିଲା ମୁକେଶ । ଏବେ ମୁକେଶଙ୍କ ଅପହରଣ ପରେ ତାଙ୍କ ପରିବାରରେ ଭୟର ବାତାବରଣ ଖେଳିଯାଇଛି । ଯେଉଁଥି ପାଇଁ ପୁଅକୁ ଫେରାଇ ଆଣିବା ପାଇଁ ପୋଲିସ ପାଖରେ ଗୁହାରି କରୁଛନ୍ତି ମୁକେଶର ପରିବାର ବର୍ଗ ।