ଯଦି ନିର୍ଦ୍ଧାରିତ ସମୟରେ ପହଂଚି ପାରିଲାନି ଆପଣଙ୍କ ପାର୍ସଲ ତେବେ ସଂସ୍ଥାକୁ ଦେବାକୁ ପଡିବ କ୍ଷତିପୂରଣ; ଜାଣନ୍ତୁ କିଭଳି ଓ କେଉଁଠି କରିବେ ଅଭିଯୋଗ
ଯଦି କୌଣସି କୋରିୟର ସଂସ୍ଥା କିମ୍ବା ଡାକ ବିଭାଗର ଦାୟିତ୍ୱହୀନତା ଯୋଗୁଁ ଆପଣ ପଠାଇଥିବା ପାର୍ସଲ ନିର୍ଧାରିତ ସମୟରେ ପହଂଚି ପାରିଲା ନାହିଁ ତେବେ ଏନେଇ ଉପଭୋକ୍ତାଙ୍କୁ କ୍ଷତିପୂରଣ ଦେବ ସଂସ୍ଥା ତଥା ଡାକ ବିଭାଗ । ଏକଥା ଆମେ କହୁ ନାହୁଁ ବରଂ ନିକଟରେ ଶୁଣାଯାଇଥିବା ଏକ ନିର୍ଦ୍ଦେଶାନାମାରେ ସ୍ପଷ୍ଟ କରାଯାଇଛି । ନିର୍ଧାରିତ ସମୟରେ ଜିନିଷର ଡେଲିଭରୀ ନଦେବା କାରଣରୁ ଉପଭୋକ୍ତା ଫୋରମ ପକ୍ଷରୁ ଭାରତୀୟ ଡାକ ବିଭାଗକୁ ସେବାରେ ଅନିୟମିତତା ନେଇ ଦୋଷୀ କରିଛି ଏବଂ ଉପଭୋକ୍ତାଙ୍କୁ କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରକୃତ ଘଟଣାଟି ଏହା ଥିଲା କି, ଭୋପାଳର ଅବଧିପୁର ଅଂଚଳରେ ରହୁଥିବା ସୁଶାନ୍ତ ରାୟ ନାମକ ଜଣେ ବ୍ୟକ୍ତି ମାଧ୍ୟମିକ ଶିକ୍ଷା ମଣ୍ଡଳ ସ୍ଥିତ ପୋଷ୍ଟ ଅଫିସ ଯାଇ ୧୧ ଫେବ୍ରୃଆରୀ ୨୦୧୪ରେ ନୂଆ ଦିଲ୍ଲୀକୁ ଏକ ପାର୍ସଲ ପଠାଇଥିଲେ । ହେଲେ ପାର୍ସଲ ନିର୍ଧାରିତ ସମୟରେ ସେଠାରେ ପହଂଚିନ ଥିଲା । ଏନେଇ ବ୍ୟକ୍ତି ଜଣକ ମାର୍ଚ୍ଚ ୩ ତାରିଖରେ ମାଧ୍ୟମିକ ଶିକ୍ଷା ମଣ୍ଡଳ ସ୍ଥିତ ପୋଷ୍ଟ ଅଫିସରେ ଯୋଗାଯୋଗ କରିଥିଲେ କିନ୍ତୁ ତାଙ୍କୁ କୌଣସି ସୂଚନା ଦିଆଯାଇନଥିଲା । ଏହାପରେ ସେ ଏସଂପର୍କରେ ପୋଷ୍ଟ ଅଫିସରେ ଅଭିଯୋଗ କରିଥିଲେ । ହେଲେ ବିଭାଗ ତରଫରୁ ବିନା କୌଣସି ତଦନ୍ତ କରି ତାଙ୍କର ଅଭିଯୋଗକୁ ବନ୍ଦ କରିଦେଇଥିଲେ ।
ଏହାପରେ ୮ ଏପ୍ରିଲ ୨୦୧୪ରେ ତାଙ୍କର ପାର୍ସଲ ତାଙ୍କୁ ଫେରସ୍ତ ମିଳିଥିଲା । ଯାହାକି ପୂରା ଖାଲି ଥିଲା । ଅର୍ଥାତ୍ ପାର୍ସଲରେ ଥିବା ଜିନିଷଟି ଗାଏବ ହୋଇଯାଇଥିଲା । ଏହାକୁ ଦେଖି ବ୍ୟକ୍ତି ଜଣକ ଉପଭୋକ୍ତା ଫୋରମର ଦ୍ୱାରସ୍ଥ ହୋଇଥିଲେ । ଏହାପରେ ତାଙ୍କୁ ଜିଲ୍ଲା ଫୋରମରେ ଡାକ ବିଭାଗ ବିରୋଧରେ କେସ୍ ଫାଇଲ କରିଥିଲେ ଆଉ ଏଥିରେ ତାଙ୍କୁ ସଫଳ ମିଳିଥିଲା ।ମାମଲା ଉପରେ ଡାକ ବିଭାଗ ରାଜ୍ୟ ଆୟୋଗରେ ଅପିଲ କରିଦେଇଥିଲେ । ରାଜ୍ୟ ଆୟୋଗ ଉଭୟ ପକ୍ଷର କଥା ଶୁଣିଥିଲେ । ଏବଂ ପରେ ଡାକ ବିଭାଗ ତରଫରୁ ଦାଖଲ କରାଯାଇଥିବା ଅପିଲକୁ ଖାରଜ କରିଦେଇଥିଲେ ଆୟୋଗ । ଏଥି ସହିତ ଅଭିଯୋଗକାରୀ ବ୍ୟକ୍ତି ବିଶେଷଙ୍କୁ କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଥିଲେ ।
କୌଣସି ବି ବ୍ୟକ୍ତି କରିପାରିବେ ଅଭିଯୋଗ
ଉତ୍ପାଦ କିମ୍ବା ସେବାରେ କୌଣସି ବି ପ୍ରକାରର ସମସ୍ୟା ଥିଲେ ଉପଭୋକ୍ତା କିମ୍ବା ସେହି ଆଧାରରେ ଅନ୍ୟ କୌଣସି ବ୍ୟକ୍ତି କନଜ୍ୟୁମର ଫୋରମରେ ଅଭିଯୋଗ ଦାଖଲ କରିପାରିବେ । ଇଣ୍ଡିଭିଜୁଆଲ ବ୍ୟତୀତ କୌଣସି ପଂଜିକୃତ ସଂସ୍ଥା ମଧ୍ୟ ନିଜର ଅଭିଯୋଗ କନଜ୍ୟୁମର ଫୋରମରେ କରିପାରିବେ ।
କେଉଁଠି କରିବେ ଅଭିଯୋଗ
ଅଭିଯୋଗ କେଉଁଠି କରିବାକୁ ହେବ , ଏହାର ନିର୍ଧାରଣ କନଜ୍ୟୁମଙ୍କର କ୍ଷତିକୁ ଆଧାର କରି କରାଯିବ । ଯଦି କ୍ଷତି ୨୦ ଲକ୍ଷ ଟଙ୍କାରୁ କମ ହୋଇଥିବ ତେବେ ଜିଲ୍ଲା ଫୋରମରେ ଏହାର ଅଭିଯୋଗ କରିପାରିବେ । ୨୦ ଲକ୍ଷରୁ ଅଧିକ ଏବଂ ୧କୋଟି ଟଙ୍କାରୁ କମ କ୍ଷତି ହୋଇଥିଲେ ରାଜ୍ୟ ଆୟୋଗରେ ଆପଣ ଅଭିଯୋଗ କରିପାରିବେ । ସେହିପରି ଯଦି ୧କୋଟିରୁ ଅଧିକ କ୍ଷତି ହୋଇଥିବ ତେବେ ଏନେଇ ରାଷ୍ଟ୍ରୀୟ ଆୟୋଗରେ ଅଭିଯୋଗ କରିବାକୁ ହେବ । ଏହାବ୍ୟତୀତ ଯଦି ଆପଣଙ୍କ କେସ୍ ନିମ୍ନ ଫୋରମରେ ଖାରଜ କରିଦିଆଯାଏ ତେବେ ଏନେଇ ଆପଣ ଉପର ଫୋରମରେ ଅଭିଯୋଗ କରିପାରିବେ । କନଜ୍ୟୁମର ଉପଭୋକ୍ତା ମାମଲାର ହେଲପଲାଇନ ନମ୍ବର (୧୮୦୦୧୧୪୦୦୦) ଏବଂ ୱେବସାଇଟ୍ (consumerhelpline.gov.in)କୁ ଯାଇ ବି ଅଭିଯୋଗ କରିପାରିବେ ।