ଗାଡି ଚାଳକଙ୍କ ପାଇଁ ଖୁସିଖବର ! ଏଣିକି ଆପଣଙ୍କର ଏହି ବଡ ଭୁଲ୍ ପାଇଁ ବି ଚାଲାଣ କାଟିବ ନାହିଁ ଟ୍ରାଫିକ୍ ପୁଲିସ
ଏଣିକି ଜନଗହଳୀପୂର୍ଣ୍ଣ ସ୍ଥାନରେ ଦ୍ରୁତ ବେଗରେ ଡ୍ରାଇଭିଂ କରିବା ଉପରେ ପୁଲିସ ଆପଣଙ୍କଠାରୁ କୌଣସି ଚାଲାଣ କାଟିବ ନାହିଁ । ସହରାଂଚଳରେ ଆପଣ ୭୦ କିଲୋମିଟର ପ୍ରତି ଘଂଟାର ବେଗରେ ଗାଡି ଚଲାଇ ପାରିବେ । ତେବେ ଏକଥା ଆମେ କହୁନାହିଁ ବରଂ ଏନେଇ କେନ୍ଦ୍ର ସରକାରଙ୍କ ତରଫରୁ ଅନୁମତି ମିଳିଛି । କେନ୍ଦ୍ର ସରକାର ସହରାଂଚଳମାନଙ୍କରେ ଗାଡି ଚଲାଇବା ଗତିର ସୀମାକୁ ସର୍ବାଧିକ ୭୦ କିଲୋମିଟର ପ୍ରତି ଘଂଟା ପର୍ଯ୍ୟନ୍ତ ବୃଦ୍ଧି କରିଦେଇଛନ୍ତି । ପୂର୍ବରୁ ଏହା ୬୦ କିଲୋମିଟର ପ୍ରତି ଘଂଟା ରହିଥିଲା ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ, ପ୍ରଥମ ଥର ପାଇଁ କେନ୍ଦ୍ର ସରକାର ସହରାଞ୍ଚଳ ରାସ୍ତାରେ ଘଣ୍ଟା ପ୍ରତି ୭୦ କିଲୋମିଟର ବେଗରେ କାର, ୬୦ କିଲୋମିଟର ବେଗରେ ମାଲବାହୀ ଗାଡ଼ି ଏବଂ ୫୦ କିଲୋମିଟର ବେଗରେ ଦୁଇ ଚକିଆ ଯାନ ଚଳାଇବାକୁ ଅନୁମତି ଦେଇଛନ୍ତି । କିନ୍ତୁ, ରାସ୍ତାରେ ଯାତାୟାତ କରୁଥିବା ଅନ୍ୟମାନଙ୍କର ନିରାପତ୍ତା ଦୃଷ୍ଟିରୁ ରାଜ୍ୟ ସରକାର କିମ୍ବା ସ୍ଥାନୀୟ କର୍ତ୍ତୃପକ୍ଷ ଏହି ଅନୁମୋଦିତ ବେଗ ସୀମାକୁ କମାଇ ପାରିବେ । ଏ ପର୍ଯ୍ୟନ୍ତ ସଡ଼କ ପରିବହନ ମନ୍ତ୍ରାଳୟ ବିଭିନ୍ନ ବର୍ଗର ଯାନବାହନ ପାଇଁ ଜାତୀୟ ସର୍ବାଧିକ ବେଗ ସୀମା ସ୍ଥିର କରିଆସୁଥିଲେ । କିନ୍ତୁ, ବର୍ଗୀକରଣ ହୋଇ ନ ଥିବା ରାସ୍ତାଗୁଡ଼ିକରେ ଗାଡ଼ିର ବେଗ ନିର୍ଦ୍ଧାରଣ କରିବା ଦାୟିତ୍ୱ ରାଜ୍ୟ ସରକାର କିଂବା ସ୍ଥାନୀୟ କର୍ତ୍ତୃପକ୍ଷମାନଙ୍କ ନିଷ୍ପତ୍ତି ପାଇଁ ଛାଡ଼ି ଦିଆଯାଉଥିଲା । ସମ୍ପ୍ରତି ସ୍ଥାନୀୟ କର୍ତ୍ତୃପକ୍ଷମାନେ ସ୍ଥିର କରିଥିବା ସହରାଞ୍ଚଳ ପାଇଁ ବେଗ ରହିଛି ୪୦-୪୫ କିଲୋମିଟର । ଏବେ ସହରାଞ୍ଚଳରେ ରିଙ୍ଗ ରୋଡ ଏବଂ ଅନ୍ୟାନ୍ୟ ବହୁ ପ୍ରକାରର ରାସ୍ତା ତିଆରି ହେଉ ଥିବାରୁ ମନ୍ତ୍ରାଳୟ ଗାଡ଼ିର ବେଗ ବଢ଼ାଇବାକୁ ସ୍ଥିର କରିଛି ।
ବୁଧବାର ଦିନ ସଡ଼କ ପରିବହନ ମନ୍ତ୍ରୀ ନୀତିନ ଗଡ଼କରି ଚାରିଟି ବର୍ଗର ରାସ୍ତା ପାଇଁ ବେଗ ସୀମା ନିର୍ଦ୍ଧାରଣ ପ୍ରସ୍ତାବକୁ ଅନୁମୋଦନ କରିଛନ୍ତି । ପରିବହନ ବିଭାଗର ଯୁଗ୍ମ ସଚିବ ଅଭୟ ଦାମଲେଙ୍କ ନେତୃତ୍ୱରେ ଗଠିତ ଏକ କମିଟି ‘ଏକ୍ସପ୍ରେସ ୱେ’ ଏବଂ ରାଜପଥରେ ଦ୍ରୁତ ବେଗର ସୀମା ନିର୍ଦ୍ଧାରଣକୁ ଅନୁମୋଦିତ କରିଛନ୍ତି ।