ଲୋକଙ୍କ ଲୁହ ଦେଖି ସମ୍ଭାଳି ପାରିଲେନି ବିଧାୟକ, ଛାତିଏ ପାଣିରେ ପଶି କୁନି କୁନି ଶିଶୁଙ୍କୁ ଉଦ୍ଧାର କରି ସମସ୍ତଙ୍କ ହୃଦୟ ଜିତିଲେ ପୂର୍ଣ୍ଣଚନ୍ଦ୍ର ।
କନକ ବ୍ୟୁରୋ : କଥାରେ ଅଛି, ଛବି କଥା କୁହେ । ଯେଉଁ କଥାକୁ ବେଳେ ବେଳେ ଶହ ଶହ ଶବ୍ଦରେ ବୟାନ କରି ହୁଏ ନାହିଁ ତାହାକୁ ଗୋଟିଏ ଫଟୋ ହିଁ ବଖାଣିଦିଏ । ଶୀର୍ଷକ ପରେ ପରେ ଥିବା ଚିତ୍ରଟି ଠିକ୍ ସେମିତି ଏକ କାହାଣୀ କହୁଛି । ଯେଉଁ କାହାଣୀ ବୁଝାଇବାକୁ ହେଲେ ହୁଏତ ଫର୍ଦ୍ଦ ଫର୍ଦ୍ଦ କାଗଜ ଲାଗିଯିବ । କିନ୍ତୁ ଏହି ଗୋଟିଏ ମାତ୍ର ଫଟୋ ହିଁ ସବୁକିଛି କହିଦେଉଛି । ଗଞ୍ଜାମ ଜିଲ୍ଲାର ବନ୍ୟା ପ୍ରପଡୀତ ଗାଁ । ଗାଁ ଦାଣ୍ଡରେ ଛାତିଏ ପାଣି । ଆଉ ତାରି ଭିତରେ ଚାରଟି ମଣିଷ । ଦୁଇ ଜଣ ପୁରୁଷ ଓ ଦୁଇ ଜଣ ମହିଳା । ଆଉ ପୁରୁଷଙ୍କ କାନ୍ଧରେ କୁନି କୁନି ଦୁଇଜଣ ଶିଶୁ । ଏ ଚିତ୍ର ହିଁ ବୟାନ କରୁଛି ବନ୍ୟାର ଭୟାବହତା କେତେ ଏବଂ ବିପଦ ବେଳର ବନ୍ଧୁ କିଏ ।
Kanak News is now on WhatsApp
Join and get latest news updates delivered to you via WhatsApp
ଛାତିଏ ପାଣି ଭିତରୁ କୁନି ପିଲାଟିକୁ କାନ୍ଦରେ ନେଇ ଆସୁଥିବା ବ୍ୟକ୍ତି ଜଣକ ହେଉଛନ୍ତି ଗଞ୍ଜାମର ସୋରଡା ବିଧାୟକ ପୂର୍ଣ୍ଣଚନ୍ଦ୍ର ସ୍ୱାଇଁ । ଜନତାଙ୍କ ଦୁଃଖରେ ନେତାର ଭୂମିକା କଣ ବୋଧେ ପୂର୍ଣ୍ଣଚନ୍ଦ୍ର ବେଶ ଭଲଭାବେ ବୁଝି ପାରିଛନ୍ତି । ଯେଉଁଥିପାଇଁ ରାଜଧର୍ମର ପାଳନ କରିବା ପାଇଁ ରାଜରାସ୍ତାକୁ ଓହ୍ଲାଇ ଆସିଛନ୍ତି । ବିପର୍ଯ୍ୟୟ ପରେ ନେତାଙ୍କ କୁମ୍ଭୀର କାନ୍ଦଣା ଅନେକ ଥର ଦେଖିଥିବେ । ସବୁକିଛି ସରିଗଲା ପରେ ପ୍ରତିଶୃତିର ପୁଡିଆ ନେଇ ଘରେ ପହଞ୍ଚି ଯାଉଥିବାର ଅନେକ ନଜିର ରହିଛି । ଏମିତିକି ଏଇଆ କରିଦେବୁ , ସେଇଆ କରିଦେବୁ କହି ଖସି ଯାଇଥିବେ । କିନ୍ତୁ ପ୍ରକୃତ ବିପଦ ବେଳେ ନେତା ମାନେ ସତେ ଯେମିତି ଉଭାନ ହୋଇଯାଆନ୍ତି । କିନ୍ତୁ ଏ କ୍ଷେତ୍ରରେ ବ୍ୟତିକ୍ରମ ସାଜିଛନ୍ତି ପୂର୍ଣ୍ଣଚନ୍ଦ୍ର ସ୍ୱାଇଁ ।
ବିପଦ ବେଳେ ଯିଏ ସାଥୀରେ ଛିଡା ହୁଏ ତାକୁ ପ୍ରକୃତ ବନ୍ଧୁ କୁହାଯାଏ । ଆଉ ଠିକ ଏହାକୁ ପ୍ରମାଣିତ କରି ଦେଖାଇଛନ୍ତି ବିଧାୟକ ପୂର୍ଣ୍ଣଚନ୍ଦ୍ର ସ୍ୱାଇଁ । କୁହାଯାଏ ବିପର୍ଯ୍ୟୟ ବେଳେ ରାଜା ମଧ୍ୟ ପ୍ରଜା ମାନଙ୍କ ପାଇଁ ଗାଦିରୁ ଓହ୍ଲାଇ ଆସିଥାନ୍ତି । ଆଉ ଠିକ୍ ସେହିଭଳି ତିତଲି ବାତ୍ୟା ପରେ ଗଞ୍ଜାମର ସୋରଡା ସହର ବନ୍ୟାରେ ଉବୁଟୁବୁ ହେଉଥିବା ବେଳେ ଉଦ୍ଧାରକାର୍ଯ୍ୟ ପାଇଁ ଅଣ୍ଟାଏ ପାଣିକୁ ଓହ୍ଲାଇ ଆସିଛନ୍ତି ପୂର୍ଣ୍ଣଚନ୍ଦ୍ର । ନିଜ ପଦପଦବୀର ବଡିମାକୁ ପଛ କରି ଲୋକଙ୍କ ପାଖରେ ପହଞ୍ଚିଛନ୍ତି ବିଧାୟକ । ଲକ୍ଷ୍ୟ କେବଳ ଗୋଟିଏ ଲୋକଙ୍କୁ ବିପଦରୁ ରକ୍ଷା କରିବା । କାରଣ ଏହି ପ୍ରତିଶୃତି ପାଇ ଲୋକମାନେ ତାଙ୍କୁ ଭୋଟ ଦେଇଥିଲେ । ଆଉ ଯେତେବେଳେ ଲୋକମାନେ ବିପଦରେ ପଡି ଲୁହ ଗଡାଇଛନ୍ତି ସେତେବେଳେ ନିଜକୁ ସମ୍ଭାଳି ନ ପାରି ଅଣ୍ଟାଏ ପାଣି ଭିତରେ ପହଞ୍ଚିଯାଇଛନ୍ତି ପୂର୍ଣ୍ଣଚନ୍ଦ୍ର । କୁନି କୁନି ଛୁଆଙ୍କୁ କାନ୍ଧରେ ବସାଇ ନେଉଥିବା ବେଳେ ଏହାର ଫଟୋ ଏବେ ସୋସିଆଲ ମିଡିଆରେ ଭାଇରାଲ ହୋଇଛି । ଆଉ ବିଧାୟକଙ୍କ ଏଭଳି କାଯ୍ୟକୁ ସୋରଡାବାସୀଙ୍କ ସମେତ ପୂରା ଓଡ଼ିଶାବାସୀ ବେଶ ପ୍ରଂଶସା କରିଛନ୍ତି । ଆଉ ବିପଦ ସମୟରେ ନେତା ମାନେ ଧରାଛୁଆଁ ଦିଅନ୍ତି ନାହିଁ ବୋଲି ଲୋକଙ୍କ ମନରେ ଯେଉଁ ଧାରଣା ରହିଥିଲା ସେଥିରେ ପୂର୍ଣ୍ଣଚନ୍ଦ୍ର ପକାଇଛନ୍ତି ପୂର୍ଣ୍ଣଚ୍ଛେଦ ।
କେବଳ ବିଧାୟକ ନୁହଁନ୍ତି ବ୍ରହ୍ମପୁର ମହାନଗର ନିଗମର କମିଶନର ମଧ୍ୟ ସଙ୍କଟର ସାଥୀ ଭାବେ ଉଭା ହୋଇଛନ୍ତି । ତିତଲି ବାତ୍ୟା ଯୋଗୁଁ ଅଧିକ ପ୍ରଭାବିତ ହୋଇଛି ଗଞ୍ଜାମ । ବାତ୍ୟା ପରେ ପରେ ବନ୍ୟା ଆସି ଗଞ୍ଜାମବାସୀଙ୍କ ଦୁଃଖ ବଢାଇ ଦେଇଛି । ବନ୍ୟା ଘେରରେ ଥିବା ଲୋକଙ୍କ ପାଖକୁ ରିଲିଫ ପହଞ୍ଚାଇବା ପାଇଁ ଜିଲ୍ଲା ପ୍ରଶାସନ ଦିନରାତିି ଏକ କରି ଦେଇଛି । ଆଉ ଏଭଳି ସମୟରେ ବନ୍ୟା ପୀଡିତଙ୍କ ଦୁଃଖର ସାଥୀ ପାଲଟିଛନ୍ତି ଯୁବ ଆଇଏଏସ ଅଫିସର ଚକ୍ରବର୍ତ୍ତୀ ସିଂ ରାଠୋର ।
ଯୁବ ଆଇଏଏସ ଅଫିସର ଚକ୍ରବର୍ତ୍ତୀ ସିଂ ରାଠୋର । ବ୍ରହ୍ମପୁର ମହାନଗର ନିଗମର କମିଶନର ଭାବେ ମାସ କେଇଟା ହେବ ନିଯୁକ୍ତି ପାଇଛନ୍ତି । ଖୁବ କମ ଦିନ ମଧ୍ୟରେ ଜଣେ ଦକ୍ଷ ତଥା ଲୋକପ୍ରିୟ ଅଫିସର ଭାବେ ନିଜର ଏକ ଭିନ୍ନ ପରିଚୟ ସୃଷ୍ଟି କରି ପାରିଛନ୍ତି ଚକ୍ରବର୍ତ୍ତୀ । କେବଳ ଏତିକି ନୁହେଁ ତିତଲି ବାତ୍ୟା ପରେ ଆସିଥିବା ବନ୍ୟା ପ୍ରଭାବିତଙ୍କ ପାଇଁ ଏବେ ସଙ୍କଟର ସାଥୀ ହୋଇ ଛିଡା ହୋଇଛନ୍ତି ଚକ୍ରବର୍ତ୍ତୀ । କେବଳ ଏସି ରୁମର ଅଫିସ ମଧ୍ୟରେ ବସି ରିଲିଫ୍ କାମର ହିସାବ ନିକାସ ନ କରି ନିଜେ ରିଲିଫ୍ ବାଣ୍ଟିବାକୁ ଆଗେଇ ଆସିଛନ୍ତି ଏହି ଯୁବ ଅଫିସର । ଅନ୍ୟ ମାନଙ୍କ ସହ ମିଶି ରିଲିଫ ସାମଗ୍ରୀ ଧରି ନିଜେ ପ୍ରଭାବିତ ଅଞ୍ଚଳରେ ପହଞ୍ଚିବା ସହ ଲୋକଙ୍କୁ ଖାଦ୍ୟ ସାମଗ୍ରୀ ବାଣ୍ଟୁଛନ୍ତି ।
ସାଧାରଣତଃ ଉଚ୍ଚ ଅଧିକାରୀ ମାନେ ପ୍ରାକୃତିକ ଦୁର୍ବିପାକ ସମୟରେ କେବଳ ରିଲିଫ୍ କାମର ତଦାରଖ କରୁଥିବାର ଦେଖିବାକୁ ମିଳିଥାଏ । କିନ୍ତୁ ରିଲିଫ୍ ସାମଗ୍ରୀ ଭର୍ତ୍ତି ହୋଇଥିବା ବସ୍ତା ଓ ପଲିଥିନ ଅଫିସର ବୋହୁଥିବାର ବହୁତ କମ ଦେଖିବାକୁ ମିଳିଥାଏ । ଆଉ ସେହି ରିଲିଫ୍ ସାମଗ୍ରୀ ବୋହୁଥିବା ଅଫିସରଙ୍କ ମଧ୍ୟରେ ଚକ୍ରବର୍ତ୍ତୀ ସିଂ ରାଠୋର ମଧ୍ୟ ନିଜକୁ ସାମିଲ କରିଛନ୍ତି । ଯାହାର ଫଟୋ ସୋସିଆଲ ମିଡିଆରେ ଭାଇରାଲ ହୋଇଛି । ଆଉ ସଙ୍କଟ ବେଳେ ସାଥୀ ହୋଇ ଛିଡା ହୋଇଥିବାରୁ ଚକ୍ରବର୍ତ୍ତୀଙ୍କୁ ବ୍ରହ୍ମପୁରବାସୀ ପ୍ରଂଶସାରେ ପୋତି ପକାଇଛନ୍ତି । ଯେଉଁ ସମୟରେ ଲୋକମାନେ ଭିନ୍ନ ଭିନ୍ନ କାରଣକୁ ନେଇ ଅଫିସରଙ୍କ ଉପରକୁ ପ୍ରଶ୍ନ ଉଠାଉଛନ୍ତି ସେହିଭଳି ସମୟରେ ଚକ୍ରବର୍ତ୍ତୀଙ୍କ କାର୍ଯ୍ୟ ସମାଲୋଚକଙ୍କ ମୁହଁରେ ତାଲା ପକାଇବାକୁ ବାଧ୍ୟ କରିଛି । ବାସ୍ତବରେ ଏଭଳି ଅଫିସରଙ୍କୁ ଶହେ ସଲାମ ।