ଏଟି ଚିଟଫଣ୍ଡ ଲିଙ୍କରେ ଯୁବ କଂଗ୍ରେସ ସଭାପତି ରଜତ ଚୌଧୁରୀଙ୍କୁ ଗିରଫ କଲା ସିବିଆଇ
ଭୁବନେଶ୍ୱର ବ୍ୟୁରୋ, କନକ ନ୍ୟୁଜ୍ : ଅର୍ଥତତ୍ୱ ମୁଖ୍ୟ ପ୍ରଦୀପ ସେଠୀଙ୍କୁ ଆଜି ଜେରା କରିବା ପରେ ଏକ ନାଟକୀୟ ମୋଡରେ ଯୁବ କଂଗ୍ରେସ ସଭାପତି ରଜତ ଚୌଧୁରୀଙ୍କୁ ଗିରଫ କରିଛି ସିବିଆଇ । ଏଥିସହ ବରିଷ୍ଠ ଆଇନଜୀବୀ ଦେବାଶିଷ ପଣ୍ଡାଙ୍କୁ ମଧ୍ୟ ଗିରଫ କରାଯାଇଛି । ଏହି ଦୁଇଜଣଙ୍କୁ ଅର୍ଥତତ୍ୱ ସହ ଲିଙ୍କ୍ ନେଇ ଗିରଫ କରାଯାଇଛି । ପୂର୍ବରୁ ମଧ୍ୟ ଏପ୍ରିଲ ମାସରେ ରଜତ ଚୌଧୁରୀଙ୍କୁ ବାରମ୍ବାର ଜେରା କରିଥିଲା ସିବିଆଇ । ରଜତ ଚୌଧୁରୀ ଅର୍ଥତତ୍ୱର ଜମି କିଣାବିକା ମାମଲାରେ ମଧ୍ୟସ୍ଥତା କରୁଥିଲେ ବୋଲି ଅଭିଯୋଗ ହୋଇଥିଲା । ପୂର୍ବ ଜେରା ସମୟରେ ଏହି ଜମି କିଣାବିକାରେ ଆଉ କେଉଁମାନେ ସଂପୃକ୍ତ ଥିଲେ, ଅର୍ଥତତ୍ୱ କେଉଁଠୁ ଟଂକା ଆଣୁଥିଲା , ଏସବୁ ତଥ୍ୟ ଜାଣିବା ପାଇଁ ଚାହିିଁଥିଲା ସିବିଆଇ । ସେପଟେ ଦେବାଶିଷ ପଣ୍ଡାଙ୍କ ସଂପୃକ୍ତିର ପ୍ରମାଣ ବି ପାଇଥିଲା ସିବିଆଇ ।
Kanak News is now on WhatsApp
Join and get latest news updates delivered to you via WhatsApp
ପୂର୍ବତନ ଆଡଭୋକେଟ୍ ଜେନେରାଲ୍ ଅଶୋକ ମହାନ୍ତି ଅର୍ଥତତ୍ୱଠାରୁ କିଣିଥିବା ଘର କାଗଜପତ୍ରରେ ସାକ୍ଷୀ ଭାବେ ଦସ୍ତଖତ କରିଥିଲେ ଦେବାଶିଷ ପଣ୍ଡା । ଏହାଛଡା ଅର୍ଥତତ୍ୱ ସହ ଲିଙ୍କ ନେଇ ଗିରଫ ହୋଇଥିବା ପୂର୍ବତନ କ୍ରାଇମବ୍ରାଂଚ ଡିଏସପି ପ୍ରମୋଦ ପଣ୍ଡାଙ୍କୁ ଜେରା ସମୟରେ ସିବିଆଇ ଦେବାଶିଷଙ୍କ ସଂପୃକ୍ତି ନେଇ ତଥ୍ୟ ପାଇଥିଲା । ଏହାପରେ ଦେବାଶିଷ ପଣ୍ଡାଙ୍କୁ ଜେରା କରାଯାଇଥିଲା । ତେବେ ଏସବୁ ମାମଲାରେ ସେ ନିର୍ଦୋଷ ବୋଲି ପୂର୍ବରୁ ଗଣମାଧ୍ୟମକୁ ପ୍ରତିକ୍ରିୟା ଦେଇଥିଲେ ଦେବାଶିଷ । ଆଜି ଏଟି ମୁଖ୍ୟ ପ୍ରଦୀପ ସେଠୀଙ୍କୁ ତିନି ଘଂଟା ଧରି ଜେରା କରିଥିଲା ସିବିଆଇ । ଝାରପଡା ଜେଲରେ ପ୍ରଦୀପଙ୍କୁ ଜେରା କରିଥିଲେ ସିବିଆଇ ଅଧିକାରୀ । ଏହାପରେ ପ୍ରଦୀପଙ୍କ ସୂଚନା ଅନୁସାରେ ରଜତ ଚୌଧୁରୀ ଏବଂ ଦେବାଶିଷ ପଣ୍ଡାଙ୍କୁ ସିବିଆଇ ଗିରଫ କରିଛି ।