ଗାନ୍ଧୀ ପରିବାର ପାଇଁ ନୂଆବର୍ଷରେ ମିଳିପାରେ ନୂଆ ଉପହାର, ବରୁଣ ଗାନ୍ଧୀ କଂଗ୍ରେସରେ ଯୋଗଦେବା ନେଇ ଜୋରଧରିଲା ଚର୍ଚ୍ଚା
କନକ ବ୍ୟୁରୋ : ରାତି ପାହିଲେ ନୂଆ ବର୍ଷ । ସମସ୍ତେ ନୂଆ ଆଶା ନେଇ ଆଜି ପୁରୁଣା ବର୍ଷକୁ ବିଦାୟ ଦେଉଥିବା ବେଳେ ଆସନ୍ତା କାଲି ଠାରୁ ପୁଣିଏକ ବର୍ଷର ଆରମ୍ଭ ହେବାକୁ ଯାଉଛି । ହେଲେ ପୁରୁଣା ବର୍ଷକୁ ବିଦାୟ ଓ ନୂଆବର୍ଷକୁ ସ୍ୱାଗତ କରିବା ଭିତରେ ଗାନ୍ଧୀ ପରିବାର ପାଇଁ ନୂଆ ଖବର ଆସିବା ନେଇ ଚର୍ଚ୍ଚା ହେଉଛି । ଦୀର୍ଘ ଦିନରୁ ଗାନ୍ଧୀ ପରିବାରରୁ ଅଲଗା ରହୁଥିବା ସଂଜୟ ଗାନ୍ଧୀଙ୍କ ପତ୍ନୀ ମେନକା ଗାନ୍ଧୀ ଓ ତାଙ୍କପୁଅ ବରୁଣ ଗାନ୍ଧୀ ପୁଣିଥରେ ଗାନ୍ଧୀ ପରିବାର ସହ ଏକଜୁଟ ହୋଇପାରନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଉତ୍ତର ପ୍ରଦେଶ ପିଲିଭିତରୁ ବିଜେପି ସାଂସଦ ଥିବା ବରୁଣ ଗାନ୍ଧୀ ଦିନକୁ ଦିନ ବିଜେପି ଉପରେ ବିଷ ଓଗାଳିବାରେ ଲାଗିଛନ୍ତି । ଏହାକୁ ଦେଖି ଅନୁମାନ କରାଯାଉଛି କି ସେ କଂଗ୍ରେସରେ ଯୋଗଦେଇ ପାରନ୍ତି । କିଛିଦିନ ପୂର୍ବରୁ ହିନ୍ଦୁ-ମୁସଲିମକୁ ନେଇ ସେ ବିଜେପି ବିରୋଧରେ ବର୍ଷିଥିବା ବେଳେ ଚାଷୀ ଆନ୍ଦୋଳନ ସମୟରେ ସେ ଖୋଲାଖୁଲି ଭାବେ ବିଜେପିକୁ ବିରୋଧ କରିବା ସହ କୃଷକମାନଙ୍କ ସପକ୍ଷରେ ମତ ରଖିଥିଲେ ।
ଏହିସବୁ କାରଣକୁ ନେଇ ଏବେ ଚର୍ଚ୍ଚା ହେଉଛି କି ବରୁଣ ଗାନ୍ଧୀ ୨୦୨୪ ନିର୍ବାଚନ ପୂର୍ବରୁ କଂଗ୍ରେସରେ ଯୋଗଦେଇ ପାରନ୍ତି । ଏନେଇ କଂଗ୍ରେସର ପୂର୍ବ ଅଧ୍ୟକ୍ଷ ତଥା ଭାରତ ଯୋଡ ଯାତ୍ରାର ନେତୃତ୍ୱ ନେଉଥିବା ରାହୁଲ ଗାନ୍ଧୀଙ୍କୁ ଗଣମାଧ୍ୟମ ପଚାରିଥିବା ପ୍ରଶ୍ନର ଉତ୍ତର ରଖିଛନ୍ତି ରାହୁଲ ଗାନ୍ଧୀ । ସେ ଏହାକୁ ସ୍ପଷ୍ଟଭାବେ ସ୍ୱୀକାର କରିନଥିଲେ ବି ସେ କହିଛନ୍ତି ବରୁଣ ଗାନ୍ଧୀ କଂଗ୍ରେସରେ ସାମିଲ ହେବେ କି ନାହିଁ ତାହା ମଲ୍ଲିକାର୍ଜୁନ ଖଡଗେ କହିପାରିବେ । ହେଲେ ଏବେ ସେ ବିଜେପିରେ ଥିବାରୁ ତାଙ୍କୁ ଅସୁବିଧା ହୋଇପାରେ । ଅନ୍ୟପଟେ ବରୁଣ ଗାନ୍ଧୀ କିଛିଦିନ ତଳେ ଏକ ବୟାନ ଦେଇଥିଲେ ଯାହାର ଭିଡିଓ ଏବେ ଭାଇରାଲ ହେଉଛି । ଏହି ଭିଡିଓରେ ବରୁଣ ଗାନ୍ଧୀ କହୁଛନ୍ତି କି ନା ମୁଁ କଂଗ୍ରେସ ବିରୋଧରେ ନା ନେହରୁଙ୍କ ବିରୋଧୀ । ଆମ ଦେଶର ରାଜନୀତି ଦେଶକୁ ଯୋଡିବା ପାଇଁ ହେଉ ବୋଲି ସେ କହିଥିଲେ ।