ସାମ୍ନାକୁ ଆସିଲା ୨ଜଣ ଯୁବକଙ୍କ ନୂଆ ନୂଆ ଅଭିଯୋଗ, ଜଣକୁ ବିବାହର ପ୍ରତିଶ୍ରୁତି, ଅନ୍ୟ ଜଣକୁ ଅଭିନୟର ସୁଯୋଗ ଦେବା ଆଳରେ ଠକିନେଇଛନ୍ତି ଲକ୍ଷାଧିକ ଟଙ୍କା ।
କନକ ବ୍ୟୁରୋ: ଅଭିନେତ୍ରୀ ଚିନ୍ମୟୀ ପ୍ରିୟଦର୍ଶିନୀଙ୍କ ନାଁରେ ନୁଆ ନୂଆ ଅଭିଯୋଗ ସାମନାକୁ ଆସିବାରେ ଲାଗିଛି । କିଏ ଖୋଲାଖୋଲି ଗଣମାଧ୍ୟମକୁ ସାମ୍ନା କରୁଛନ୍ତି ତ ପୁଣି କିଏ ନିଜ ନାମକୁ ଗୋପନ ରଖିବାକୁ ଚାହୁଁଛନ୍ତି । ବିବାହର ପ୍ରତିଶ୍ରୁତି ଦେଇ ଜଣେ ଯୁବକଙ୍କ ଠାରୁ ୨ ଲକ୍ଷ ୭୦ ହଜାର ଟଙ୍କା ଠକି ଦେଇଥିବା ଅଭିଯୋଗ ହୋଇଛି । ଏହି ବ୍ୟକ୍ତି ଜଣକ ସୋସିଆଲ ମିଡିଆରେ ଏକ ଭିଡିଓ ମଧ୍ୟ ଛାଡିଛନ୍ତି । ଏପରିକି ଟଙ୍କା ମାଗିବାରୁ ନେତା ମନ୍ତ୍ରୀଙ୍କ ନାଁ କହି ଚିନ୍ମୟୀ ତାଙ୍କୁ ଧମକ ଚମକ ଦେଉଥିବା ବି ବ୍ୟକ୍ତି ଜଣକ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଯୁବକଙ୍କର ଅଭିଯୋଗ, ୨୦୧୭ ମସିହାରେ ଏକ ମାଟ୍ରିମୋନିଆଲ ସାଇଟରୁ ପରିଚୟ ହେବା ପରେ ସେ ଚିନ୍ମୟୀଙ୍କ ସହ ସଂପର୍କରେ ଥିଲେ । ଉଭୟ ଉଭୟଙ୍କୁ ବିବାହ କରିବା ପାଇଁ ନିଷ୍ପତି ମଧ୍ୟ ନେଇଥିଲେ । ସଂପର୍କ ବଢିବା ପରେ, ଚିନ୍ମୟୀ ବିଭିନ୍ନ ସମୟରେ ତାଙ୍କ ଠାରୁ ଟଙ୍କା ମଧ୍ୟ ନେଇଥିଲେ । ଲକ୍ଷାଧିକ ଟଙ୍କା ଠକାମୀରେ ପଡିବା ପରେ ଯୁବକ ଜଣକ ଏନେଇ କୋର୍ଟରେ ଆଶ୍ରୟ ନେଇଥିବା କଥା ଶୁଣିବାକୁ ମିଳିଛି । ତେବେ ଅଭିଯୋଗକାରୀ ଯୁବକ, ଚିନ୍ମୟୀଙ୍କ ସହ ସଂପର୍କରେ ଥିବା ବେଳେ କେମିତି ମିଠା ମିଠା କଥା ଓ ଗୀତ ଶୁଣାଉଥିଲେ ତାହା ଏବେ ସାମ୍ନାକୁ ଆସିଛି ।
ଅନ୍ୟପଟେ ବ୍ରହ୍ମପୁରର ଜଗନ୍ନାଥ ସେଠୀ ନାମକ ଜଣେ ଯୁବକଙ୍କୁ ଚଳଚିତ୍ରରେ ଅଭିନୟ ଦେବାକୁ କହି ତାଙ୍କ ଠାରୁ ମଧ୍ୟ ଅଭିନେତ୍ରୀ ଚିନ୍ମୟୀ ୯ ହଜାର ଟଙ୍କା ଠକି ନେଇଥିବା ଅଭିଯୋଗ ଆସିଛି । ଫଟୋ ସୁଟ ପାଇଁ ଟଙ୍କା ନେବା ପରେ ତାଙ୍କୁ ପେସବୁକରୁ ବ୍ଲକ କରିବା ସହ ଧରା ଛୁଆଁ ଦେଉନଥିବା ସେ ଅଭିଯୋଗ କରିଛନ୍ତି । ସେପଟେ ଡିସିପି କହିଛନ୍ତି, ଯଦି ଏନେଇ କେହି ବ୍ୟକ୍ତି ଥାନାର ଦ୍ୱାରସ୍ଥ ହୁଅନ୍ତି, ତେବେ ତଦନ୍ତ କରାଯିବ ।
ତେବେ ସବୁଠାରୁ ବଡ଼କଥା ହେଲା, ଅଭିନେତ୍ରୀ ଚିନ୍ମୟୀଙ୍କ ନାଁରେ ଗୋଟିଏ ପରେ ଗୋଟିଏ ଅଭିଯୋଗ ତାଙ୍କ ପାଇଁ ଅଡୁଆ ବଢାଉଛି । ଠକାମିର ଶିକାର ହୋଇଥିବା ଯୁବକମାନେ ପୁଲିସ କମିଶନରଙ୍କ ନିକଟରେ ଫେରାଦ ହେବେ ବୋଲି ଜଣାପଡିଛି । ଏ ନେଇ ଅଭିନେତ୍ରୀ ଚିନ୍ମୟୀଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳି ପାରିନାହିଁ ।