ଓଟିଡିସିର ମନସୂନ ପ୍ୟାକେଜ୍! ହାତ ପାହାନ୍ତାରେ ପର୍ଯ୍ୟଟକଙ୍କୁ ମିଳିବ ପ୍ରାକୃତିକ ସୌନ୍ଦର୍ଯ୍ୟ
କନକ ବ୍ୟୁରୋ: ଘଞ୍ଚ ଜଙ୍ଗଲ । ଝିପ୍ ଝିପ୍ ବର୍ଷା । ଚଢ଼େଇଙ୍କ କିଚିରି ମିଚିରି ଶବ୍ଦ । ସମୁଦ୍ରର ନୀଳ ଜଳରାଶିର ଢ଼େଉ । ଆକାଶରେ ଭସା ବାଦଲ । ଏମିତି ଚିତ୍ରକୁ ଭାବିବା ସହଜ ହେଲେ ହାତ ପାହାନ୍ତାରେ ପାଇବା ଏତେ ସହଜ ନୁହେଁ । କିନ୍ତୁ ପର୍ଯ୍ୟଟକଙ୍କୁ ଏହି ସ୍ୱପ୍ନିଳ ଅନୂଭୁତିକୁ ସତରେ ଭେଟିଦେବା ପାଇଁ ରାଜ୍ୟ ପର୍ଯ୍ୟଟନ ଉନ୍ନୟନ ବିଭାଗ ଓଟିଡିସି ସ୍ୱତନ୍ତ୍ର ଅଫର ଆଣିଛି । ଯାହାର ନାଁ ରହିଛି ସ୍ପେଶିଆଲ ମନସୁନ ପ୍ୟାକେଜ ଟୁର ।
Kanak News is now on WhatsApp
Join and get latest news updates delivered to you via WhatsApp
କଂକ୍ରିଟ ସହରରୁ ଦୂରେଇ ଯାଇ ଭିଜା ମାଟିା ବାସ୍ନା ପାଇବାକୁ ସ୍ୱପ୍ନ ଦେଖୁଥିବା ଲୋକଙ୍କ ପାଇଁ ଓଟିିଡିସି ଏହି ପ୍ୟାକେଜ ଆଣିଛି । ଓଟିଡିସି ୱେବସାଇଟରେ ଏ ନେଇ ବିସ୍ତୃତ ସୂଚନା ଦିଆଯାଇଛି । ଏହି ପ୍ୟାକେଜ ପାଇଁ ଅନଲାଇନରେ ବୁକିଂ ଆରମ୍ଭ ହୋଇଗଲାଣି । କମ ଦାମରେ ପର୍ଯ୍ୟଟକଙ୍କ ପାଇଁ ଏହି ପ୍ୟାଜେକ ଆରମ୍ଭ କରାଯାଇଛି । ଏହି ପ୍ୟାଜେକରେ ଗୋଟିଏ ଦିନ ବୁଲିବା ସହ ରାତି ରହଣିର ବ୍ୟବସ୍ଥା ହୋଇଛି ।
ବର୍ଷାଦିନ ପାଇଁ ଶିମିଳିପାଳ ଅଞ୍ଚଳକୁ ନିଷେଧ କରାଯାଇଥିବାରୁ ଏହି ପ୍ୟାଜେକରେ ଶିମିଳିପାଳ ସ୍ଥାନ ପାଇନାହିଁ । କିନ୍ତୁ ପର୍ଯ୍ୟଟକମାନେ ପୁରୀ, ଚିଲିକା, କାଳିଜାଈ, ନାରାୟଣୀ, ପଞ୍ଚଲିଙ୍ଗେଶ୍ୱର, ଭିତରକନିକା, ଗୋପାଳପୁର ବେଳାଭୂମି, ରମ୍ଭା ଓ ତପ୍ତପାଣୀ ଆଦି ସ୍ଥାନ ବୁଲି ଦେଖିପାରିବେ । ଏଥିପାଇଁ ରାଜ୍ୟର ବିଭିନ୍ନ ପାଂଥନିବାସ ସହ ଯୋଗାଯୋଗ କରାଯାଇଛି ।
ଚିଲିକା, ସାତପଡା ବୁଲିବା ପରେ ପୁରୀ ଦେଇ ଫେରିବା ପାଇଁ ଗୋଟିଏ ଦିନ ସ୍ଥିର ହୋଇଛି । ଯେଉଁଥିପାଇଁ ପର୍ଯ୍ୟଟକଙ୍କୁ ୧୧୫୫ଟଙ୍କା ଦେବାକୁ ପଡିବ । ସେହିପରି ଚିଲିକା, ବରକୂଳ, କାଳିଜାଈ, ନାରାୟଣୀ ବୁଲି ଫେରିବା ପାଇଁ ଗୋଟିଏ ଦିନ ପାଇଁ ୧୨୪୫ ଟଙ୍କା ଧାର୍ଯ୍ୟ କରାଯାଇଛି । ତେବେ ପଞ୍ଚଲିଙ୍ଗେଶ୍ୱରରେ ପ୍ରାକୃତିକ ପରିବେଶର ମଜା ଉଠାଇବାକୁ ପର୍ଯ୍ୟଟକଙ୍କୁ ଟିକିଏ ଅଧିକ ଖର୍ଚ୍ଚ କରିବାକୁ ପଡିବ । ଦୁଇଦିନ ଏବଂ ଗୋଟିଏ ରାତି ଏଠାରେ ରହି ନେଚର ଟ୍ରାଏଲ ନେବା ପାଇଁ ପର୍ଯ୍ୟଟକଙ୍କୁ ୪୫୦୦ଟଙ୍କା ଦେବାକୁ ପଡିବ ।
ଜଙ୍ଗଲକୁ ଭଲ ପାଉଥିବା ଲୋକଙ୍କ ପାଇଁ ମଧ୍ୟ ଏହି ପ୍ୟାକେଜରେ ରହିଛି ସ୍ୱତନ୍ତ୍ର ବ୍ୟବସ୍ଥା । ଭତରକନିକାରେ ବୁଲିବା ସହ ଜଙ୍ଗଲୀ ଅନୂଭୁତି ସାଉଁଟି ପାରିବେ ପର୍ଯ୍ୟଟକ । ଏହି ପ୍ୟାକେଜରେ ଜଣେ ପର୍ଯ୍ୟଟକ ଗୋଟିଏ ରାତି ଓ ଦୁଇଦିନ ରହଣି ଭିତରେ କୁମ୍ଭୀର ପ୍ରଜନନ ଦେଖିବା ସହ ହେନ୍ତାଳ ବଣରେ ବୁଲିବାର ମଜା ଉଠାଇ ପାରିବେ । ପକ୍ଷୀଙ୍କ କଳରବରେ ଉଛୁଳୁଥିବା ଭିତରକନିକାରେ ବିଭିନ୍ନ ପକ୍ଷୀଙ୍କୁ ଦେଖିବା ସହ ଜୈବବିବିଧତାକୁ ଅତି ନିକଟରୁ ଦେଖିବାର ସୁଯୋଗ ନେବା ପାଇଁ ପର୍ଯ୍ୟଟକଙ୍କୁ ୩୮୧୦ ଟଙ୍କା ଦେବା ପାଇଁ ପଡିବ ।
ବେଳାଭୂମିରେ ବୁଲି ସମୁଦ୍ରକୂଳିଆ ହାୱା ଖାଇବାକୁ ପସନ୍ଦ କରୁଥିବା ପର୍ଯ୍ୟଟକଙ୍କ ପାଇଁ ଓଟିଡିସି ବ୍ୟବସ୍ଥା କରିଛି । ଗୋପାଳପୁରର ସ୍ୱର୍ଣ୍ଣିମ ବେଳାଭୂମିରେ ବୁଲି ନାଲି କଙ୍କଡା ଧରିବାର ମଜା ଉଠାଇବା ସହ ଚିଲିକା କୂଳର ରମ୍ଭାରେ ରହି ପ୍ରାକୃତିକ ପରିବେଶକୁ ନିଜର କରିବା ପାଇଁ ବି ଓଟିଡିସିର ଏହି ପ୍ୟାକେଜରେ ବ୍ୟବସ୍ଥା ରହିଛି । ଜଣପିଛା ୪୫୧୦ ଟଙ୍କା ଦେଇ ଏଠାରେ ଗୋଟିଏ ରାତି ଓ ଦୁଇଦିନ ରହି ବେଳାଭୂମିର ମଜା ନେଇ ପାରିବେ । ସେହିପରି ତପ୍ତପାଣିରେ ଗୋଟିଏ ରାତି ଓ ଦୁଇଦିନ ରହି ବୁଲିବା ପାଇଁ ୪୬୫୦ ଟଙ୍କା ଦେବାକୁ ପଡିବ ପର୍ଯ୍ୟଟକଙ୍କୁ ।
ସେପ୍ଟେମ୍ବର ୩୦ ତାରିଖ ପର୍ଯ୍ୟନ୍ତ ଏହି ସ୍ୱତନ୍ତ୍ର ଅଫର ଚାଲିବ । ଏହି ସ୍ୱତନ୍ତ୍ର ମନସୁନ ପ୍ୟାଜେଜରେ ପର୍ଯ୍ୟଟକଙ୍କ ପାଇଁ ଏସି ବସର ବ୍ୟବସ୍ଥା ହୋଇଛି । ଏହାଛଡା, ଭୋଜନ, ରାତି ରହଣି ପାଇଁ ଏସି ଘର, ଚିଲିକା ହ୍ରଦରେ ବୋଟିଂ, ବିଭିନ୍ନ ର୍ଦାନୀୟ ସ୍ଥାନକୁ ଯିବା ପାଇଁ ଦରକାର ପଡୁଥିବା ପ୍ରବେଶ ଶୁଳ୍କ ପ୍ରଭୃତିର ବ୍ୟବସ୍ଥା ହୋଇଥିବା ଓଟିଡିସି ପକ୍ଷରୁ କୁହାଯାଇଛି ।
କିନ୍ତୁ ବିଦେଶୀ ପର୍ଯ୍ୟଟକଙ୍କ ପାଇଁ ଲାଗୁଥିବା ପ୍ରବେଶ ଶୁଳ୍କ କୁ ଏଥିରୁ ବାଦ ଦିଆଯାଇଛି । କ୍ୟାମେରା ଓ ଭିଡିଓ କ୍ୟାମେରା ବାବଦ ଦେୟ ମଧ୍ୟ ପର୍ଯ୍ୟଟକଙ୍କୁ ନିଜେ ଦେବାକୁ ପଡିବ । ପ୍ରତ୍ୟେକ ଟୁର ପାଇଁ ଅତିି କମରେ ୮ଜଣ ପର୍ଯ୍ୟଟକ ରହିବା ଆବଶ୍ୟକ ବୋଲି ସୂଚନା ଦେଇଛି ଓଡିଶା ପର୍ଯ୍ୟଟନ ଉନ୍ନୟନ ନିଗମ ।