ପବିତ୍ର ମାଘମେଳାରେ ଚନ୍ଦ୍ରଭାଗାରେ ବୁଡ଼ ପକାଇଲେ ଲକ୍ଷାଧିକ ଶ୍ରଦ୍ଧାଳୁ ! ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା
କନକ ବ୍ୟୁରୋ : ଆଜି ମାଘ ସପ୍ତମୀ । ଚନ୍ଦ୍ରଭାଗାରେ ବୁଡ ପକାଇଛନ୍ତି ଶ୍ରଦ୍ଧାଳୁ । ଚନ୍ଦ୍ରଭାଗାରେ ଲକ୍ଷାଧିକ ଶ୍ରଦ୍ଧାଳୁଙ୍କ ଭିଡ ହୋଇଥିବା ବେଳେ ମାଘ ମେଳା ପାଇଁ ଶହ ଶହ ସାଧୁ ସନ୍ଥ ବି ଆସିଛନ୍ତି । ଆଜି ୫ ଲକ୍ଷରୁ ଅଧିକ ଶ୍ରଦ୍ଧାଳୁ ଚନ୍ଦ୍ରଭାଗା ଆସିବା ସମ୍ଭାବନା ରହିଛି । ଏଥିପାଇଁ କେନ୍ଦ୍ରାଂଚଳ ଆଇଜି ସୌମେନ୍ଦ୍ର ପ୍ରିୟଦର୍ଶୀଙ୍କ ସହ ୪ ଜଣ ଆଡିସନାଲ ଏସପି, ୧୪ ଜଣ ଡିଏସପି, ୨୯ ଜଣ ଇନ୍ସପେକ୍ଟର, ୧୨୧ ଜଣ ସବ୍ ଇନ୍ସପେକ୍ଟର ଏବଂ ୮୧ ସେସନ୍ ଫୋର୍ସ ଓ ୩୦ ପ୍ଲାଟୁନ୍ ପୋଲିସ ମୁତୟନ କରାଯାଇଛି । ଶ୍ରଦ୍ଧାଳୁ ରାତି ତମାମ ମାଘମେଳାରେ ଭାଗ ନେବା ସହ ଭୋରରେ ବୁଡ ପକାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଚନ୍ଦ୍ରଭାଗା ପୁଷ୍କରଣୀରେ ସ୍ନାନ କରିବା ପରେ ଚନ୍ଦ୍ରଭାଗା ସମୁଦ୍ର ତଟରେ ସୂର୍ଯ୍ୟଦର୍ଶନ କରିବା ସହ କୋଣାର୍କ ମନ୍ଦିରରେ ନବଗ୍ରହ ପୂଜାର୍ଚ୍ଚନା କରିଛନ୍ତି । ଏହି ଦିନ ସୂର୍ଯ୍ୟଦେବଙ୍କ ଜନ୍ମଦିନ ବୋଲି ବିଶ୍ୱାସ ଥିବାରୁ ଏହି ଦିନ ସୂର୍ଯ୍ୟପୂଜା କରି ପୂଣ୍ୟ ଅର୍ଜନ କରିବାର ପରମ୍ପରା ରହିଛି । ସେହିପରି କୃଷ୍ଣ ପୁତ୍ର ଶାମ୍ବ ଏହି ଦିନ ଚନ୍ଦ୍ରଭାଗାରେ ସ୍ନାନ କରି ରୋଗମୁକ୍ତ ହୋଇଥିବାର କିମ୍ବଦନ୍ତୀ ରହିଛି । ଏହି ଦୃଷ୍ଟିରୁ ମାଘ ସପ୍ତମୀ ବୁଡର ବିଶେଷ ମହତ୍ୱ ରହିଥିବାର ବିଶ୍ୱାସ ଅଛି । ସେପଟେ ଯେ କୌଣସି ଅପ୍ରୀତିକର ପରିସ୍ଥିତିକୁ ଏଡାଇବାକୁ ପୁଲିସ୍ ଓ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ।