ମଧ୍ୟପ୍ରଦେଶ ବିଧାନସଭା ନିର୍ବାଚନରେ ଏବେ ଗଙ୍ଗାଜଳ ରାଜନୀତି । ୧୦ ହଜାର ପରିବାରକୁ ଗଙ୍ଗାଜଳ ବାଣ୍ଟିବ କଂଗ୍ରେସ, ଜାଣନ୍ତୁ କାରଣ
କନକ ବ୍ୟୁରୋ : ନିର୍ବାଚନ ଆସିଲେ ରାଜନୈତିକଦଳମାନଙ୍କର କେତେ ରୂପ କେତେ ରଙ୍ଗ ଦେଖିବାକୁ ମିଳିଥାଏ । କେବେ ଜୟ ଶ୍ରୀରାମ ତ କେବେ ବଜରଙ୍ଗବଲୀ । ହେଲେ ୨୦୧୪ ଲୋକସଭା ନିର୍ବାଚନ ବେଳେ ଗଙ୍ଗା ସଫେଇକୁ ବିଜେପି ଏକ ପ୍ରସଙ୍ଗ କରିଥିବା ବେଳେ ଏବେ ମଧ୍ୟପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ଗଙ୍ଗାଜଳର ସାହାରା ନେଇଛି କଂଗ୍ରେସ ପାର୍ଟି । ମଧ୍ୟପ୍ରଦେଶ କଂଗ୍ରେସ ତରଫରୁ ରାଜ୍ୟର ୧୦ ହଜାର ପରିବାରକୁ ବୋତଲରେ ଗଙ୍ଗାଜଳ ବାଣ୍ଟିବାକୁ ନିଷ୍ପତ୍ତି ନିଆଯାଇଛି । ପ୍ରଥମେ ଏହା ଇନ୍ଦୋର ସହରରେ ବଣ୍ଟାଯିବ ଓ ପରେ ଏହାକୁ ପୂରା ରାଜ୍ୟରେ ବିତରଣ କରାଯିବ । ହେଲେ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ କି ଗଙ୍ଗାଜଣ ବାଣ୍ଟିବା ପଛରେ କଂଗ୍ରେସର କ’ଣ ଉର୍ଦ୍ଦେଶ୍ୟ ରହିଛି । ଗଙ୍ଗାଜଳ ବୋତଲ ସହିତ କଂଗ୍ରେସର ପୂର୍ବତନ ମୁଖ୍ୟମନ୍ତ୍ରୀ କମଲନାଥଙ୍କ ୧୧ ଟି ପ୍ରତିଶ୍ରୁତି ଉଲ୍ଲେଖ ଥିବା ପେପର ବି ବାଣ୍ଟିବାକୁ କଂଗ୍ରେସ ନିଷ୍ପତ୍ତି ନେଇଛି ।
Kanak News is now on WhatsApp
Join and get latest news updates delivered to you via WhatsApp
କମଲନାଥଙ୍କ ତରଫରୁ ରାଜ୍ୟବାସୀଙ୍କ ପାଇଁ ପ୍ରସ୍ତୁତ କରାଯାଇଥିବା ୧୧ ଟି ପ୍ରତିଶ୍ରୁତି ମଧ୍ୟରେ ରହିଛି ମହିଳାଙ୍କୁ ମାସିକ ୧୫୦୦ଟଙ୍କା ସହାୟତା, ୫୦୦ଟଙ୍କାରେ ଗ୍ୟାସ ସିଲିଣ୍ଡର, ୧୦୦ ୟୁନିଟ୍ ପର୍ଯ୍ୟନ୍ତ ମାଗଣା ବିଜୁଳି,୨୦୦ ୟୁନିଟ୍ ପର୍ଯ୍ୟନ୍ତ ବିଜୁଳି ବିଲ୍ ଅଧା , କୃଷକଙ୍କୁ ଋଣ ଛାଡ, ରାଜ୍ୟରେ ପୁରୁଣା ପେନସନ ଯୋଜନା ଲାଗୁ, କୃଷକଙ୍କୁ ମାଗଣା ବିଜୁଳି ଯୋଗାଣ, ଓବିସିଙ୍କୁ ୨୭ ପ୍ରତିଶତ ସଂରକ୍ଷଣ, ରାଜ୍ୟରେ ଜାତିଗତ ଜନଗଣନା ଓ କୃଷକ ଆନ୍ଦୋଳନ ବେଳେ କୃଷକଙ୍କ ଉପରେ ହୋଇଥିବା ମାମଲାର ପ୍ରତ୍ୟାହାର ।
ସେପଟେ କଂଗ୍ରେସର ଗଙ୍ଗାଜଳ ବଣ୍ଟନ କଥା ଶୁଣିବା ପରେ ବିଜେପି ଛାତିରେ ଛନକା ପଶିଛି । ବିଜେପି ଆଶା କରୁଛି କି, କଂଗ୍ରେସ ଗଙ୍ଗାଜଳ ବାଣ୍ଟିବା ବାହାନାରେ ଭୋଟରଙ୍କୁ ଗଙ୍ଗାମାତାଙ୍କ ନାମରେ ନିୟମ କରାଇଦେବ ।