୪ର୍ଥ ଅନ୍ତର୍ଜାତୀୟ ଯୋଗ ଦିବସରେ ପ୍ରଧାନମନ୍ତ୍ରୀଙ୍କ ଯୋଗାଭ୍ୟାସ : କହିଲେ ଡେରାଡୁନରୁ ଡବଲିନ୍, ସାଂଘାଇରୁ ସିକାଗୋ ଓ ଜାକର୍ତ୍ତାରୁ ଜୋହାନ୍ସବର୍ଗ ଯାଏଁ ରହିଛି ଯୋଗର ଆଦୃତି
କନକ ବ୍ୟୁରୋ : ବିଶ୍ୱ ଯୋଗ ଦିବସ ଅବସରରେ ଯୋଗାଭ୍ୟାସ କଲେ ପ୍ରଧାନମନ୍ତ୍ରୀ ମୋଦି । ଚତୁର୍ଥ ଅନ୍ତର୍ଜାତୀୟ ଯୋଗ ଦିବସ ଅବସରରେ ଦେଶର ବିଭିନ୍ନ ସ୍ଥାନରେ ଯୋଗାଭ୍ୟାସ କାର୍ଯ୍ୟକ୍ରମର ଆୟୋଜନ କରାଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଡେରାଡୁନରେ ଆୟୋଜିତ ଯୋଗ କାର୍ଯ୍ୟକ୍ରମରେ ଯୋଗ ଦେଇଛନ୍ତି । ପ୍ରାୟ ୫୫ହଜାର ଲୋକଙ୍କ ସହ ମିଶି ମୋଦି ଯୋଗ କରିଛନ୍ତି । ଡେରାଡୁନର ପ୍ରାକ୍ଟିସ ରିସର୍ଚ୍ଚ ଇନଷ୍ଟିଚ୍ୟୁଟରେ ୪୫ ମିନିଟ ପାଇଁ ଏହି ଯୋଗ ଶିବିର ହୋଇଥିଲା । ଏହି ଅବସରରେ ମୋଦି କହିଥିଲେ ଯୋଗ ବ୍ୟକ୍ତି, ପରିବାର, ସମାଜ, ଦେଶ, ବିଶ୍ୱ ତଥା ସମଗ୍ର ମାନବ ସମାଜକୁ ଯୋଡେ । ଡେରାଡୁନରୁ ଡବଲିନ୍, ସାଂଘାଇରୁ ସିକାଗୋ ଓ ଜାକର୍ତାରୁ ଜୋହାନ୍ସବର୍ଗ ଯାଏଁ ରହିଛି ଯୋଗର ଆଦୃତି । ଶିବିରରେ ଉତରାଖଣ୍ଡ ମୁଖ୍ୟମନ୍ତ୍ରୀ ମଧ୍ୟ ସାମିଲ ହୋଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ଏହାସହ ଯୋଗ ଦିବସ ଅବସରରେ ପାଖାପାଖି ଦୁଇ ଲକ୍ଷ ଲୋକଙ୍କ ସହ ଯୋଗାଭ୍ୟାସ କରି ଗିନିସ୍ ବିଶ୍ୱରେକର୍ଡ ପୁସ୍ତକରେ ସ୍ଥାନ ପାଇଛନ୍ତି ବାବା ରାମଦେବ । ରାଜସ୍ଥାନର କୋଟାରେ ବାବା ଅଭ୍ୟାସ କରିଥିବା ବେଳେ ତାଙ୍କ ସହ ସାମିଲ୍ ରାଜସ୍ଥାନ ମୁଖ୍ୟମନ୍ତ୍ରୀ ବସୁନ୍ଧରା ରାଜେ ସିନ୍ଧିଆ ସାମିଲ୍ ହୋଇଥିଲେ । ଏହି ଶିବିରରେ ସ୍ଥାନୀୟ ଛାତ୍ରଛାତ୍ରୀ, ସେନା ଓ ପୁଲିସର ଯବାନ ତଥା ଗ୍ରାମବାସୀ ଯୋଗ ଦେଇଥିଲେ । ଏଥିପାଇଁ ପୂର୍ବରୁ ବ୍ୟାପକ ପ୍ରସ୍ତୁତି କରାଯାଇଥିବା ବେଳେ ବାବା ତିନି ଦିନଧରି ଲୋକଙ୍କୁ ଯୋଗ ଶିଖାଉଥିଲେ । ଯୋଗାଭ୍ୟାସ ପରେ ବାବା ରାମଦେବ ଯୋଗର ଉପକାରିତା ସମ୍ପର୍କରେ ବିସ୍ତୃତ ଭାବେ ଲୋକଙ୍କୁ ସୂଚନା ଦେଇଥିଲେ ।
ସେପଟେ ବିଶ୍ୱବ୍ୟାପୀ ଯୋଗ ଦିବସ ପାଳନ କରାଯାଉଥିବା ବେଳେ ଯୁଦ୍ଧପୋତ ଆଇଏନଏସ୍ ବିରାଟ ଉପରେ ଯୋଗାଭ୍ୟାସ କରିଥିଲେ ନୌସେନା ଯବାନ୍ । ମୁମ୍ବାଇରେ ହୋଇଛି ଏହି ସ୍ୱତନ୍ତ୍ର ଯୋଗ ଶିବିର । ଏଥିରେ ବିଭିନ୍ନ ପ୍ରକାର ଆସନ ଓ ପ୍ରାଣାୟାମ କରିଥିଲେ ଯବାନ୍ । ସେପଟେ ଦିଲ୍ଲୀରେ ଆୟୋଜିତ ଯୋଗ ଶିବିରରେ ଯୋଗ ଦେଇଥିଲେ କେନ୍ଦ୍ର କ୍ରୀଡ଼ା ମନ୍ତ୍ରୀ ରାଜ୍ୟବର୍ଦ୍ଧନ ସିଂ ରାଠୋର । ଯୋଗ ମାନସିକ ଓ ଶାରୀରିକ ସୁସ୍ଥତା ପାଇଁ ସବୁଠୁ ଜରୁରୀ ବୋଲି ରାଠୋର କହିଥିଲେ ।
ବିଶ୍ୱର ସର୍ବୋଚ୍ଚ ସାମରିକ ଘାଟି ସିଆଚେନରେ ଯବାନ କଲେ ଯୋଗାଭ୍ୟାସ । ସଦ ଗୁରୁ ଜଗୀ ବାସୁଦେବଙ୍କ ତତ୍ୱାବଧାନରେ ଯବାନ ଯୋଗାଭ୍ୟାସ କରିଛନ୍ତି । ଶିବିରରେ ୩୫୦ରୁ ଉଦ୍ଧ୍ୱର୍ ଯବାନ ଅଂଶଗ୍ରହଣ କରିଛନ୍ତି । ପୃଥିବୀର ସବୁଠୁ ଆହ୍ୱାନଦାୟକ ତଥା ବିପଦପୂର୍ଣ୍ଣ ସାମରିକ ଘାଟି ଭାବେ ସିଆଚେନ୍ ପରିଚିତ । ଏଠାରେ ତାପମାତ୍ରା ସବୁ ବେଳେ ମାଇନସ୍ ଡିଗ୍ରୀ ରହୁଥିବା ବେଳେ ଆଜି ଯୋଗାଭ୍ୟାସ କରିଛନ୍ତି ଯବାନ । ଜଗୀ ବାସୁଦେବ ପରିବେଶ ସୁରକ୍ଷା ପ୍ରସଙ୍ଗରେ ସବୁବେଳେ ମତ ଦେଇଆସୁଛନ୍ତି । ଆଜି ଯୋଗ ପ୍ରଶିକ୍ଷଣ ବେଳେ ମଧ୍ୟ ସେ ପ୍ରକୃତି ସୁରକ୍ଷା ସମ୍ପର୍କରେ ମତବ୍ୟକ୍ତ କରିଛନ୍ତି ।